Read Napu 1 Korintu 3 Bible Online

1 Korintu 3 - Napu bible

1 Korintu 3

¹Halalu, i tempoku mani hihimbela hai ikamu hangkoia, barakau peisa kupaturo nodo tauna au molambihe Inao Malelaha. Kupaturo peakau nodo tauna au moula manihe peundeana lalunda au kadake. Lawi i tempo iti, bara mani manoto pepoinalaimi i Kerisitu; i pepoinalaimi nodo manikau analei.

²Analei au mentomi mani, bara peisa rawei andea. Nodo wori ikamu hangkoia, kupahaweakau paturo au hintoto i tauna au bara mani maroho pepoinalainda. Bara manikau kupahawea paturo au hintoto i tauna au manotomi pepoinalainda, lawi bara mani nibuku modoko. Hai duuna ide-ide, bara mani nibuku modoko,

³lawi moula manikau peundeana lalumi au kadake. Mahinakau hai mobungka-bungka manikau, itimi au mopakanoto poulami mani peundeana lalumi au kadake, nodo tauna au bara manihe moisa Pue.

⁴Hadua manguli, “Iko meulana i Paulu.” Au hadua manguli, “Iko meulana i Apolo.” Babehiami iti nodo babehianda tauna au bara mani moisa Pue.

⁵Iko hai Apolo, hawina peangkai Pue Ala au moninikau bona mepoinalaikau i Pue Yesu. Ikami hadua-hadua mampopolumao bago au naweingkai Pue.

⁶Iko au mantuda, Apolo au mobumbuhi, agaiana Pue Ala au mopatuwo.

⁷Bara topantuda hai topobumbuhi au mewali patoana bago iti, agaiana Pue Alari, lawi Ia au mopatuwo.

⁸Au mantuda hai au mobumbuhi, himbela peahe. Ihira rodua ina molambihe saronda moula kantimina bagonda.

⁹Ikami hampopobago peangkai i lalu bagona Pue Ala, hai ikamu, halalu, peisakau rapandiri nodo bondena Pue Ala. Ikamu peisa worikau rapandiri nodo souna Pue Ala.

¹⁰Anti kabulana laluna Pue Ala, ikomi au nguru-nguruna mobambari Ngkora Marasa irikamu. Iko nodona hadua topoaro sou au mapande. Moaromona watu pohudaa sou, hai tauna ntanina moaro sou i wongko watu iti. Hai ope-ope topobago hangangaa mobagohe maroa-roa.

¹¹Lawi bara ara rara ntanina mewali anana Pue Ala, batena pea mepoinalai i Yesu Kerisitu. Ido hai Yesu Kerisitu rapandiri nodo watu pohudaa sou au naaro Pue Ala. Bara ara pohudaa sou au ntanina.

¹²Hai i wongko watu pohudaa sou iti, ara au moaro sou mopake bulawa, salaka hai watu au masuli, hai ara wori au mopake kau, hehi bangi ba deami.

¹³Mewali, ane sou iti naande api, ina taisa mpuu pakakasi sou au maroa hai au bara maroa, lawi pakakasi au maroa ina mantaha, agaiana pakakasi au bara maroa ina pumpu naande api. Nodo wori i kahawena hule Pue, Ia ina moparesa pobagonda ope-ope tauna maroa ba bara.

¹⁴Ane pobagona hadua tauna mantaha i poparesana Pue, ia ina molambi sarona.

¹⁵Agaiana ane pobagona bara mantaha i poparesana Pue, ia ina molambi rugi. Lempona, ia ina tekabaha hangko i huku dosana, agaiana bara molambi sarona. Ia peisa rapandiri nodo tauna au naande api souna: matanta ope-ope anu-anuna, watana pearai au mentara.

¹⁶Bara pae niisa halalu: ikamumi sou paidaana Pue Ala, hai Inaona Pue Ala maida i lalumi.

¹⁷Ane ara hadua au mogero sou paidaana Pue Ala iti, ia ina nahuku Pue Ala. Lawi paidaana Pue Ala, malelaha. Hai ikamu halalu, iami sou paidaana Pue Ala.

¹⁸Ineekau mopakanawo watami haduduami. Ane ara hadua tauna i olomi au mengkamapande i lindo manusia, agina tauna iti mewali nodo tontuli i lindo manusia bona ia mewali mapande i lindona Pue Ala.

¹⁹Lawi apa au rauli kapande manusia, nodo pekiri tontuli i peitana Pue Ala. Ara au teuki i lalu Sura Malelaha node: “Pue Ala mopakala tauna au mapande i lalu kamapandenda haduduanda.”

²⁰Ara wori au teuki node: “Pue Ala moisa hinangka tangara lalu manusia, katouana ope-ope iti mbero-mbero pea.”

²¹Mewali, kuperapi bona ineekau mampomahile kapande manusia. Lawi hinangkana au niparaluu, naweimokau Pue Ala,

²²nodo wori iko Paulu, Apolo hai Peturu. Natudumongkai Pue Ala mai irikamu bona kitulungikau hai Naweimokau katuwo au wou hai Nakabahamokau hangko i kapate. Hinangkana au ara i dunia, hai apa au mewali ide-ide, ba apa au mewali i alo-alo au ina mai, ope-ope iti nakadipura Pue Ala bona molambikau katuwo maroa. Ope-ope iti mewalimi kirami halalu.

²³Hai ikamu kiranamokau Kerisitu, hai Kerisitu kirana Pue Ala.