Read Napu 1 Korintu 7 Bible Online

1 Korintu 7 - Napu bible

1 Korintu 7

¹Kaliliuana halalu, ide-ide ina kuhanai pekunemi i lalu surami au nipakatuana. Ikamu tobalilo, maroa ane barakau motambi.

²Agaiana bona datihe ara au mobabehi sala, agina motambi peamokau. Maroa ane ope-ope tobalilo ara towawinenda hai ope-ope towawine ara tobalilonda.

³Bara maroa ane tobalilo mokaraohi towawinena ba towawine mokaraohi tobalilona alana barapohe moluhi. Tobalilo hangangaa mopabukei ada potambi i towawinena, nodo wori towawine i tobalilona.

⁴Towawine bara makuasa i watana haduduana agaiana tobalilonari. Nodo wori tobalilo bara makuasa i watana haduduana agaiana towawinenari.

⁵Ikamu tohamboko, ineekau mombekaraohi alana barapokau moluhi. Ba tauli ane popakanoto sambelamimi, lawi nipeinao bona peisakau mekakae. Agaiana roo iti, hangangaa moluhi mbulikau bona datikau nakelo Datu Tokadake mobabehi sala anti kadana nibuku morempeki peundeana lalumi.

⁶Au kuuli ide, bara mewali hambua parenta irikamu, agaiana paturongku pea irikamu.

⁷Katouana, kuunde ane ope-ope tauna nodo iko, bara motambi. Agaiana bara ope-ope tauna au rabuku ane barahe motambi. Hadua-hadua tauna molambi pewati au montani-ntani hangko i Pue Ala.

⁸I tauna au bara mani motambi ba i tobemba, idemi lolitangku: maroa ane ineemokau motambi nodo iko.

⁹Agaiana ane bara nibuku morempeki peundeana lalumi, agimimi motambi datikau naanti peundeana lalumi i babehia au kadake.

¹⁰Ikamu au motambimokau, idemi hawangku (katouana bara hawangku, agaiana hawanari Pue Yesu): ikamu towawine, ineekau mampogaaki tobalilomi.

¹¹Agaiana ane nipogaakihe, ineekau motambi hule. Ane bara nodo, hangangaa mesule hulekau i tobalilomi. Hai ikamu tobalilo, inee worikau mampogaaki towawinemi.

¹²Kaliliuana halalu, idemi lolitangku (ide lolitangku haduduangku, bara hawana Pue Yesu): ane arahe tohamboko au barahe to Sarani, hai tobalilona iti mosaranimi, inee mampogaaki towawinena au bara mani mosarani, asala towawine iti naunde tuwo sambela hai ia.

¹³Nodo wori ane towawine mosaranimi, inee mampogaaki tobalilona au bara mani mosarani, asala tobalilo iti naunde tuwo sambela hai ia.

¹⁴Lawi tobalilo to Sarani iti mopamalelaha potambinda, hai towawine to Sarani iti mopamalelaha wori potambinda. Ane rapana bara nodo, ananda ina raimba nodo anangkoi au bara moisa Pue. Agaiana ananda iti mewalimi kirana Pue Ala lawi hadua hangko i tosaenda mepoinalai i Pue Yesu.

¹⁵Agaiana ane tauna au bara mani mepoinalai i Pue iti mampeinao mampogaaki towawinena ba tobalilona, pogiangaamide megaaki. Ane nodo, tobalilo ba towawine au mepoinalaimi i Pue barapi tetaka hai sambokona. Agaiana Pue Ala mokakioke mewali anaNa bona mohintuwuke.

¹⁶Lawi ane barakau mepogaaki, ikamu towawine, ara mani katepakami moanti tobalilomi mepoinalai i Pue. Hai nodo wori ikamu tobalilo, ara mani katepakami moanti towawinemi mepoinalai i Pue.[2]

¹⁷Hangangaa tapokatana katuwonta au Napakanotoake Pue Ala i kaNakakionta mewali anaNa. Itimi parentaku au kupaturoahe ope-ope jumaa iumba pea kalaoangku.

¹⁸Pandirina, ane hadua to Yahudi mepoinalai i Pue Yesu, ia bara hangangaa mosapuaka katoYahudina. Nodo wori ane hadua tauna au bara to Yahudi mepoinalai i Pue Yesu, ia bara hangangaa ratile mewali nodo to Yahudi.

¹⁹Lawi i peitana Pue, ane ratile ba barake ratile, himbela pea. Au paraluu ntepuu, tapeulaimi hawana Pue Ala.

²⁰Ikita ope-ope, noumba katuwonta i kanakakionta Pue mewali to Sarani, itimi au hangangaa taporarai, lawi itimi katuwo au napakanotoake Pue.

²¹Ane rapana hawi tuwonta hai nakakioke Pue Ala mewali to Sarani, inee masusa lalunta mampekiri kahawinta. Agaiana ane ara katepakanta bona tekabahake hangko i kahawinta, agina tapepakai tempo iti.

²²Hawi tuwonta ba bara, himbela peake i peitana Pue Ala. Lawi hadua hawi au nakakio Pue Ala mewali to Sarani, tekabahami hangko i huku dosana anti pohintuwuna hai Pue. Nodo wori, hadua tauna au bara hawi tuwona au nakakio Pue Ala mepoinalai i Pue Yesu, ina mewali hawina Kerisitu.

²³Masuli kanaholomi Pue Ala. Ineemokau moula peundeana manusia.

²⁴Mewali, halalu-halalu, nodo au kuuli inona: kehapiri ba noumba katuwonta i kanakakionta Pue Ala mewali to Sarani, bara paraluu tabaliki. Agina tapokatana katuwonta iti hai tapeulai apa au napakanotoake Pue Ala.

²⁵Ide-ide kupaturoahe tauna au bara mani motambi. Paturongku ide bara parenta hangko i Pue Yesu. Agaiana kupaturokau moula pekiringku, hai peisana rapoinalai, lawi naangkana Pue mewali suroNa anti ahiNa.

²⁶Mewali, idemi pelambiaku: i tempo ide ikita to Sarani narumpake ngkaia pakana kapari. Ido hai kuuli agina inee tabaliki katuwonta au Napakanotoake i dunia ide.

²⁷Pandirina: ikamu tobalilo au motambimokau, ineekau mohaoki rara mampogaaki towawinemi. Ikamu au bara manikau motambi, inee nipari-pari bona motambikau.

²⁸Agaiana ane ara hadua anantomoane au mampeinao motambi, barato wori madosa. Hai ane ara hadua anantowawine au mampeinao motambi, barato wori madosa. Agaiana nikatuinao: tauna au motambi ina molambi kapari i lalu dunia ide. Hai peundeaku bona datikau narumpa kapari iti.

²⁹Halalu, tunggaiaku node: ikita to Sarani, hangangaa takatuinao kadanapi ngkaia tempota i dunia ide. Ido hai kuuli, mepongka ide-ide, ikamu au motambimokau, inee nipaioru potambimi. Batena bagona Pue au hangangaa tapaioru.

³⁰Ikamu au moteria, inee gaga masusa lalumi. Ikamu au matana, inee melumbu kamatanami. Ikamu au meholo ba apa-apa, inee mentaka lalumi i anu-anu iti.

³¹Ikamu au mowulai anu-anu dunia, inee peakau mampekiri katuwomi i dunia ide. Lawi dunia au tapaidai ide ina tuna.

³²Halalu, peundeaku ineekau mampepekiri liliu katuwomi. Tobalilo au barahe motambi, peisahe mampopolumao liliu bagona Pue, hai peisahe mampekiri liliu apa peundeana Pue irihira.

³³Agaiana tobalilo au motambimi, hangangaa mampekiri worihe katuwonda i lalu dunia ide, lawi mampeinaohe mopamatana lalunda towawinenda,

³⁴ido hai morompenga lalunda. Nodo wori, towawine au bara motambi, peisahe mampopolumao liliu bagona Pue, hai peisahe mampekiri liliu apa peundeana Pue irihira bona malelaha katuwonda i lindona Pue. Agaiana towawine au motambimi, hangangaa mampekiri worihe katuwonda i dunia ide, lawi mampeinaohe mopamatana lalunda tobalilonda.

³⁵Ope-ope ide kuuliangaakau halalu bona maroa tuwomi. Bara kuunde ane tetakakau hai ngkaia pakana parenta. Tunggaiaku bona nibabehi liliu apa au hintoto bona moulakau peundeana Pue hai bona dati ara au mosalempori peulami Iria.

³⁶Ane rapana ara hadua anantomoane mampomanua hadua anantowawine, hai nauli anantomoane iti: “Bara hintoto ane bara kupotambia hampomanungku, lawi kasae-saeami.” Mewali, ane barapi rabuku morempeki peundeana lalunda hai ane mampeinaomohe motambi, agina motambi peamohe, baratohe madosa.

³⁷Agaiana ane rapana anantomoane iti manguli i laluna, “Ineena motambi,” bara anti karapari-parina, ia peisa moula peundeana haduduana. Hai ane nabukuto morempeki peundeana laluna, agina ineemi motambi.

³⁸Mewali ane motambi, maroa. Agaiana ane bara motambi, meliu kamaroana.

³⁹Moula atura potambi, hadua towawine tetaka liliu i tobalilona ane tuwo mani. Ane matemi tobalilona, tekabahami hangko i atura au motaka i tobalilona. Towawine iti peisa mbuli motambi, asala mampotambia tobalilo to Sarani.

⁴⁰Agaiana meliu kamaroana ane barapi motambi. Iti pelambiaku pea. Agaiana kupekiri paturongku ide napahaweana Inaona Pue Ala au ara i lalungku.