Read Napu 1 Korintu 9 Bible Online

1 Korintu 9 - Napu bible

1 Korintu 9

¹Barana pae peisa mobabehi apa-apa moula peundeaku haduduangku? Barana pae surona Pue Yesu? Bara manina pae moita Yesu Amputa? Hai bara pae napopewalimona suroNa? Hai bara pae ikamumi wua pobagongku i Pue?

²Nauri tauna ntanina bara mopangaku kaikona surona Pue Yesu, agaiana ikamu halalu, hangangaa nipangaku. Lawi ikomi au mobambari Ngkora Marasa hawe i wanuami. Pepoinalaimi i Pue Yesu mopakanotomi kaikona suroNa.

³I tauna au mosalaina, kuhanaihe node,

⁴Ikami au mewali surona Pue Yesu, bara pae hintoto ane molambingkai paandeki ba paenungki hangko i pobagongki mobambari Ngkorana Pue?

⁵Barangkai pae peisa motambi, hai barangkai pae peisa moanti towawinengki au hampepepoinalai i polumaoangki, nodo au rababehi surona Pue Yesu au ntanina hai halaluna Pue Yesu hai Peturu?[3]

⁶Ba Baranaba pea hai iko au hangangaa mobago mohaoki paandeki? Barangkai pae hintoto ane molambingkai sarongki nodohe surona Pue Yesu au ntanina?

⁷Ara pae hadua surodado au moongkosoi watana haduduana ane lao mombeala? Hintoto mpuu ane ope-ope tauna molambi kiranda hangko i pobagonda. Tauna au mowia, peisahe maande wua tuda-tudanda. Tauna au mamporewu dimba, peisahe moenu susu hangko i porewunda.

⁸Au kupololita ide, bara pea ngkora pandiri au taita alo-alona i katuwonta, agaiana himbela wori hai paturo au tahumba i lalu Atura au nauki Musa.

⁹I lalu Sura Aturana Pue au nauki Musa, teuki node: “Ane japi au tangana rapopobago, inee raboke humena. Pogiangaahe mangkuku ngkalao.” Tou-tou pae japi au natunggai Pue,

¹⁰ba ikitari au Natunggai i lalu ngkora pandiri iti? Manoto apa au teuki hangkoia iti kana wori irikita. Tauna au mobago hangangaa molambi kiranda hangko i wua pobagonda. Tauna au mowia ba au mombau, mobagohe lawi raharunga kaina molambinda kiranda hangko i wua pobagonda.

¹¹Ikami ide motudamongkai Ngkorana Pue i lalu katuwomi. Katouana, hintoto mpuu ane molambingkai paandeki hangko irikamu.

¹²Ane arahe tauna ntanina au peisa molambi saronda hangko irikamu, pelumbunami ikami! Peisa mpuungkai merapi sarongki irikamu halalu, agaiana bara kibabehi. Nauri ngkaia kapari au morumpangkai, barangkai merapi apa-apa irikamu bona dati ara au mopakasusa pekirimi duuna barakau mepoinalai i Ngkora Marasa au kianti.

¹³Bara pae niisa halalu, tauna au mobago i lalu Souna Pue Ala molambi paandenda hangko i Souna Pue Ala? Bara pae tadulako mpenomba au mokadipura popenombanda tauna bosa i meja pohuwea popenomba, molambihe kiranda hangko i popenomba iti?

¹⁴Nodo wori paturo au tahumba hangko i Pue Yesu. Ia mohawa bona tauna au mobambari Ngkora Marasa molambi paandenda hangko i tauna au rapahawea bambari iti.

¹⁵Mewali peisa mpuungkai merapi sarongki irikamu, agaiana iti bara kibabehi. Hai inee nipehangu tunggaiaku mouki sura ide bona kupari-parikau moweingkai ba apa pea. Matana lalungku lawi barana hambela merapi irikamu. Agingkumi mate panena motanta apa au mopamatana lalungku iti.

¹⁶Barana peisa mampemahile anti pobagongku mobambari Ngkora Marasa, lawi natuduna Pue Ala mampopolumao bago iti. Hurewumona ane barana mobambari Ngkora Marasa!

¹⁷Ane rapana moantina Ngkora Marasa anti peundeaku haduduangku, hangangaa raweina sarongku. Agaiana bara nodo, lawi natudu peana Pue Ala mampopolumao bago ide. Kuunde ba bara, hangangaa mopahawena Ngkora Marasa, lawi itimi bago au naweina Pue Ala.

¹⁸Mewali, ane moantina Ngkora Marasa barana merapi sarongku. Sarongku iami: katana lalungku au kuhumba hangko i pobagongku mobambari Ngkora Marasa au kupahawe mbero-mbero i ope-ope tauna.

¹⁹Barana hawina tauna, ido hai peisana moula peundeaku. Agaiana nauri nodo, kuoaka tuwo nodona hawinda ope-ope tauna. Kubabehi iti bona tetambai tauna au kuanti mepoinalai i Kerisitu.

²⁰Ane mobambarina Ngkora Marasa i to Yahudi, mewalina nodo hadua to Yahudi bona bosa to Yahudi kuanti mepoinalai i Kerisitu. Ane iko hihimbela hai tauna au moula Aturana Musa, moula worina Atura iti. Katouana barana tetaka i Aturana Musa, agaiana kupeulai mpuu bona tauna iti kuanti mepoinalai i Kerisitu.

²¹Ane mopahawena Ngkora Marasa i tauna au bara moisa Aturana Musa, mewalina nodo hadua tauna au bara moula Aturana Musa bona kuantihe mepoinalai i Kerisitu. (Agaiana inee rauli: bara kupeulai hawana Pue Ala. Mengkoru liliuna i hawana Kerisitu.)

²²Ane arana hihimbela hai tauna au bara mani maroho pepoinalainda, kubabehi mpuu nodo ihira bona kutulungihe meula i Kerisitu. Mewali, i ope-ope tauna au kupombelambia, kuhaoki rara bona mewalina nodo ihira bona ane peisa, arahe au kuanti mepoinalai i Kerisitu.

²³Ope-ope iti kubabehi bona tetambai tauna au mepoinalai i Ngkora Marasa hai bona molambi worina katuwo maroa hihimbela hai ihira.

²⁴Halalu, niisa ane tauna momberiri melangka, bosa tauna au melangka, agaiana hadua pea au molambi parasee. Ikamu wori halalu peisa rapandiri nodo tauna au momberiri melangka; hangangaa nipari-pari moula peundeana Pue Ala duuna molambikau parasee.

²⁵Tauna au momberiri iti, hangangaa mokampai watanda, molati liliuhe hai mampeulaihe atura pelangka. Hangangaa mokuasaihe watana i paka-pakana bona molambihe parasee. Parasee iti, iami bunga au ina malau pea. Agaiana ikita, hangangaa mantahake i hinangkana kapari lawi mampeinaoke molambi parasee au bara mokahopoa.

²⁶Tauna au momberiri melangka, barahe melangka mbero, ara mpuu au ratunggai. Tauna au motinju, bara peunde-undeanda pea mejangguru. Nodo wori iko, peisana rapandiri nodo tauna au melangka ba au motinju, lawi barana mobago mbero-mbero. Apa au kubabehi, kubabehi bona molambina parasee.

²⁷Hai kulati watangku bona mantahana, hai morempeki worina peundeana lalungku. Bara kuunde ane roo kupahawe Ngkora Marasa i tauna ntanina, ikomi au bara molambi parasee.