Read Napu 2 Korintu 1 Bible Online

2 Korintu 1 - Napu bible

2 Korintu 1

¹Sura ide hangko iriko Paulu, au naangka Pue Ala mewali surona Kerisitu Yesu moula peundeaNa, hai hangko i Timotiu, halalunta hampepepoinalai, kipakatu irikamu jumaa au ara i wanua Korintu hai i ope-ope to Sarani au i propinsi Akaya.

²Kiharunga Pue Ala Umanta hai Pue Yesu Kerisitu mowatikau hai moweikau roa ngkatuwo.

³Tetoiami Pue Ala Umana Amputa Yesu Kerisitu! Lawi Ia Umanta au mahile ahiNa hai au mopakaroho liliu lalunta.

⁴Ia mopakaroho lalungki i lalu paka-pakana kapari au morumpangkai bona karoho au kidoko hangko Iria, kipake wori mopakaroho lalunda hema pea au narumpa kapari apa pea.

⁵Kapari au nahumba Kerisitu, kihumba worimi. Agaiana tetambai wori karoho lalu au kilambi hangko i Kerisitu.

⁶Ane narumpangkai kapari, kapari iti kihalea bona mopakarohongkai lalumi hai bona molambikau katuwo maroa. Mewali, karoho lalu au kihumba hangko i Pue Ala, ina kipake wori mopakaroho lalumi bona sabarakau hai mantahakau mantodiha i lalu kapari nodo au kihumba

⁷Ido hai bara bata-bata lalungki. Kiisa kaina mantahami i lalu kapari, lawi mantodiha sambela womokau hai ikami, hai kiisa Pue Ala ina mopakaroho lalumi himbela hai ikami.

⁸Halalu bona niisa, rumihi mpuu kapari au morumpangkai hangkoia i propinsi Asia, meliu hangko i pebukuangki. Mapari mpuu lalungki, barapi ara peharungangki tuwo.

⁹Pehadingki nodomongkai au rahuku mate. Agaiana narumpangkai kapari iti bona datingkai meharunga i rohongki haduduangki, agaiana meharunga peangkai i Pue Ala, lawi Iami au mopatuwo tomate.

¹⁰Mewali halalu, Nakabaha mpuumongkai Pue Ala hangko i kapari au rumihi iti, ido hai barangkai mate. Hai kiisa Pue Ala ina mokabahangkai hangko i hinangka kapari, maroa au morumpangkai ide-ide ba i alo-alo au ina mai.

¹¹Hai nipekakaea woringkai. Lawi ane bosa tauna mampekakaengaangkai, Pue Ala ina motulungingkai, alana bosa tauna ina manguli ngkaia kamaroana Iria.

¹²Matana lalungki halalu, lawi kiisa, katuwongki i dunia ide pelumbunami i lalu pohintuwuki hai ikamu, hangko i kabulana mpuu lalungki kipopolumao. Hai apa au kibabehi iti bara hangko i kapande manusia agaiana hangko i kapande au Nakiraiangkai Pue Ala.

¹³Ihi surangki au kipakatu irikamu, au peisa pea nibasa hai niisa lempona, bara ralelempingi. Nauri ide-ide bara mani niisa ntepuu ope-ope tunggaiaki, agaiana kiharunga kahopoana ope-ope iti ina niisa ntepuu. Hai i kahawena hule Pue Yesu Amputa, ina matana lalumi anti kaikamina hai ikami wori ina matana lalungki anti kaikamuna.

¹⁵Itimi peharungangku i apa au kuuli inona, ido hai hangkoia mangkaliwona lao mosondakikau, bona molambi mbulikau pewati.

¹⁶Tunggaiaku nguruna kelaokau hampai kusondaki, hangko laorina i Makedonia, hai kemehupe mbulina irikamu i tempoku mai mesule bona peisana nitulungi mopapulo polumongku lao i Yudea.

¹⁷Agaiana tunggaiaku iti tebalikimi. Mewali ba nipehanguri bara tou dandiku? Ba niuliri, kubabehi pea tunggaiaku moula peundeaku haduduangku; hambelana manguli, “Io,” roo indo, kuuli mbuli, “Bara”?

¹⁸Bara nodo halalu! Nodo Pue Ala mopabukei ope-ope dandiNa irikita, nodo wori dandiki irikamu. Bara kiuli, “Io” irikamu ane tunggaiaki: “Bara.”

¹⁹Lawi Yesu Kerisitu, Anana Pue Ala, au kibambariamokau, iko, Silas hai Timotiu, bara nodo tauna au bara tetida pekirina, hambela manguli “io” hambela manguli “bara”. Agaiana Ia ane Naulimi “io” barapi ina tebaliki.

²⁰Lawi Yesumi au mopabukei ope-ope dandiNa Pue Ala irikita. Meangka hangko indo mohowarangkai “Amin” i Pue Ala, i lalu pohintuwuta hai Yesu Kerisitu bona Pue Ala rapomahile.

²¹Pue Ala haduduaNa au mopakaroho lalungki hai lalumi bona mohintuwuke hai Kerisitu. Napileimoke mewali taunaNa,

²²hai Naweike Inao Malelaha au mopakanoto kamewalintami taunaNa. Inao Malelaha iti mewali tanda i lalunta kaina Napabukeina haha dandiNa irikita.

²³Halalu, barana modongko, Pue Ala sabingku. Ia au moisa lalungku. Barana lao i Korintu hangkoia lawi barana mau mokambaroakau hai lolita au makasara.

²⁴Barapokau kupari-pari kana i apa au hangangaa nipoinalai, lawi marohomi pepoinalaimi i Kerisitu. Agaiana kiunderi mobago sambela hai ikamu bona matana lalumi.