Read Napu 2 Korintu 10 Bible Online

2 Korintu 10 - Napu bible

2 Korintu 10

¹Iko, Paulu, ara perapingku irikamu. Arahe tauna i olomi au manguli: “Ane Paulu karao hangko irikami, pololitana makasara i lalu surana, agaiana ane mombelindoke, ia maalusu.” Mewali, hangko i lalungku au mengkaiwoi hai au maalusu, nodo laluna Kerisitu,

²kuperapi bona barapi paraluu kutudungiakau kuasangku ane hawena irikamu! Lawi ara mpuu tunggaiaku mampetudungia kuasangku i tauna au manguli babehiangki nodo pea babehianda tauna au bara moisa Pue Ala.

³Ikami tauna biasa peangkai. Agaiana barangkai mopake kapande manusia.

⁴Kuasa-kuasa au kipopobundu i lalu pobagongki bara kuasa hangko i manusia agaiana kuasa hangko i Pue Ala. Hai kuasa iti kipake mogero bentenda iwalingki hai kipake moewa tauna au mosapuaka paturo au tou.

⁵Kuasa iti kipake monangi tauna au mampemahilehe hai kapandenda mohomboki hangka ranganda au mampeinao moisa Pue Ala. Anti karoho au kihumba hangko i Pue Ala, kibaliki lalunda tauna iti bona mengkoruhe i Kerisitu.

⁶Mewali, ane mengkoru mpuumokau irikami, ina kihukuhe tauna au mosapuaka maningkai.

⁷Nipekiri maroa-roa! Ane nipakanoto i lalumi kaikamuna topeulana Kerisitu, hangangaa nipangaku kaikamina wori topeulana Kerisitu.

⁸Ba niuli mampemahilena? Barana mampemahile, agaiana barana maea mopatongawa kuasangku mopaturokau. Lawi au kupakanoto, iami kuasa au naweina Pue bona mopakaroho pepoinalaimi, barari au mopakanawo pepoinalaimi.

⁹Mewali, bara kuunde ane ara au manguli kupopalanga peakau hai surangku au makasara.

¹⁰Lawi arahe tauna i olomi au mokakabosaina, rauli: “Ane i surana, ara kuasana lolitana hai pemoso pepaturona, agaiana ane ara inde hihimbela hai ikita, bara manoto pololitana hai malede watana!”

¹¹Mewali, hangangaa niuliangaahe tauna iti: kuasangki au ara i lalu surangki ina kipetudungiahe i kahawengki irikamu ane ara manihe au mosapuakangkai!

¹²Barangkai mau moula babehianda tauna au mampemapande gagahe i olomi. Barangkai himbela hai ihira. Tauna iti, motoiahe watanda haduduanda, rauli, “manoto mpuu babehianta,” mole rumihiri kantulinda, lawi lolitanda moula pea pekirinda haduduanda.

¹³Ikami bara nodo. Ane motoiangkai watangki, bara kipopelumbu-lumbu hangko i apa au hintoto. Ane motoiangkai watangki, mampololita peangkai bagongki au nakiraiangkai Pue Ala. Hai bagongki iti hawe worimi irikamu, lawi Pue Ala motudungkai mobambari Ngkora Marasa i boeami.

¹⁴Mewali, ane mopatongawangkai kuasangki irikamu, barangkai moliungi apa au hintoto. Ane rapana barangkai hawe i boeami mobambari Ngkora Marasa, kebara ara kuasangki mopaturokau. Agaiana ara kuasangki, lawi ikami au nguru-nguruna mobambari Ngkora Marasa irikamu.

¹⁵Ikami barangkai nodo tauna itihe. Barangkai mampololita wua i raoa hangko i pobagongki au nakiraiangkai Pue Ala. Agaiana kiharunga halalu, ane tetambai kamarohona pepoinalaimi, ina tetambai wori kamahilena pobagongki i olomi,

¹⁶duuna kamalalambariari pobagoangki. Lawi kipeinao mobambari Ngkora Marasa i boea-boea au karao hangko irikamu. Bara kiunde mobambari Ngkora Marasa i tauna au mohadimohe bambari iti bona datingkai mampemahile anti wua pobagongki au katouana rapobago tauna ntanina i bonde pobagoanda.

¹⁷Ara au teuki i lalu Sura Malelaha node: “Hema au naunde mampololita kamatanana laluna, hangangaa napololita kamatanana iti anti kamaroana Pue iria.”

¹⁸Lawi ane mampomahileke watanta haduduanta, barake ina nadoko Pue. Agaiana ane napomahileke Pue, manotomi kaNadokonta.