Read Napu 2 Korintu 11 Bible Online

2 Korintu 11 - Napu bible

2 Korintu 11

¹Mewali halalu, kuperapi bona nipehadingi lolitangku, nauri mololitana nodo tontuli.

²Mohirina lawi arahe tauna au mampeinao moalakau hangko iriko. Agaiana pohiringku ide hintoto hai peundeana Pue Ala. Lawi ikomi au nguru-nguruna moantikau mepoinalai i Kerisitu. Peundeaku bona mepoinalai liliukau i Kerisitu, lawi ikamu peisa rapandiri nodo anantowawine au ina kutauna hai hadua tobalilo, iami Kerisitu.

³Agaiana kuperapi ineekau hawe rapakanawo alana barapokau mepoinalai i Kerisitu hangko i lalumi. Nodo ile mokelo Hewa hai lolitana au momi, ara worihe tauna au mampeinao bona moulakau paturonda au mosisala hai pepoinalaimi i Kerisitu.

⁴Arahe guru agama i olomi au mopaturokau kana i Yesu, agaiana paturonda bara himbela hai apa au kipaturoakau. Ane paturonda bara himbela hai paturongki, moapari hai niunde mampehadingi lolitanda? Niunde pae modoko inao ntanina au mosisala hai Inao Malelaha au nidokomi? Niunde pae modoko bambari au mosisala hai Ngkora Marasa au nipoinalaimi? Halalu, inee nodo.

⁵Guru iti mampomahile peahe watanda haduduanda, agaiana kuperapi bona nipeulai paturongku, lawi bara tepaiwoi tuwongku hangko irihira.

⁶Lawi nauri bara gaga kuisa mololita, agaiana kuisa ntepuu paturo au tou. Hai paturo iti nihadimi hai niita mpuumi i hinangkana babehiangki i olomi.

⁷I tempoku mopahawe Ngkora Marasa irikamu hangkoia, barana merapi sarongku irikamu nauri haodi pea. Mengkaiwoina, mobagona haduduangku bona tuwo peana mopahawe bambari au moanti pewati irikamu. Noumba halalu, masalana pae ane barana merapi sarongku irikamu?

⁸Hangkoia tempoku mobago i boeami, to Sarani au arahe i boea ntanina mampopakatuana doi. Peisa tauli: ihira au marugi, lawi doi au raweina kupake i lalu pobagongku mobambari Ngkora Marasa irikamu.

⁹I tempo iti, ara wori kamakurangku, agaiana barana merapi irikamu. Lawi arahe halalunta au hawe hangko i tampo Makedonia moanti doi au mopahandai apa au kuparaluu. Barana merapi apa-apa irikamu bona barakau kupakapari. Hai apa au kubabehi hangkoia, iti au ina kubabehi liliu.

¹⁰Tou mpuu apa au kuuli ide, lawi paturona Kerisitu au tou ara i lalungku. Matana lalungku lawi barana merapi ba apa-apa irikamu. Hai apa au kubabehi iti bara ina tebali iumba pea pobagoangku i humalele tampo Akaya.

¹¹Moapa hai mololitana nodo? Ba barakau kupokaahi, halalu? Pue Ala moisa kamaahina lalungku irikamu.

¹²Apa au kubabehi ide, bara ina kukabaha. Barana ina merapi sarongku irikamu. Arahe tauna au mampemahile hai au mamperapi saronda hai au motoia liliu watanda haduduanda. Agaiana iko, barana mau merapi irikamu bona dati rauli pobagongki himbela hai pobagonda.

¹³Tauna au nodo, iami suro au mepakanawo. Mobagohe i olomi nodo surona Kerisitu, agaiana modongkohe!

¹⁴Bara tapotingkara babehianda, lawi nodo wori babehiana Datu Tokadake au mobaliki watana mewali nodo hadua malaeka au mewangka.

¹⁵Ido hai bara tapotingkara ane topobagona Datu Tokadake motabungihi babehianda au kadake bona raitahe nodo topobagona Pue Ala. Agaiana kahopoana, ina molambihe hurungina au hintoto hai dakenda.

¹⁶Mewali, nodo au kuuli inona, kuperapi bona nipehadingi mpuu lolitangku. Nauri pololitangku nodo tontuli, inee nipehangu ntulina. Agaiana ane ara manikau au manguli ide iko tontuli, nipogiangaa worina hampai motoia watangku haduduangku.

¹⁷Ide-ide ina kupomahile watangku. Agaiana bara Pue au motuduna mololita node. Mololitana nodo tontuli.

¹⁸Bosa tauna motoiahe watanda haduduanda hai mampololita bagonda au rababehi hangko i karohona watanda. Hai ide-ide ina mampomahile worina watangku.

¹⁹Lawi lenggena, nipokatana mpuu paturonda tauna au ntuli, lawi nipehangu mapande mpuumokau!

²⁰Ane arahe guru au mampohawikau, nidokohe. Ane arahe au mopakanawokau hai mobagiukau, nidokohe. Ane arahe au mampemahile hai mohapakau, nitodiha pea.

²¹Ba niuliri ina maeana lawi barangkai bai moula babehianda iti? Agaiana ane baihe motoia watanda haduduanda, hangangaa kupengkabaiki wori, mololita mbulina nodo tontuli motoia watangku.

²²Ane guru iti manguli, to Ibaranihe, iko wori to Ibaranina! Ane rauli pemuleanahe Isaraeli, iko wori pemuleanana Isaraeli! Ane rauli pemuleanahe Burahima, iko, pemuleana worina Burahima.

²³Rauli, ihira topobagona Kerisitu, apa mani iko! (Mololitana nodo tauna au barapi manoto pekirina.) Meliu pobagongku hangko i pobagonda. Bahangkiami belangku ratarunggu, meliu hangko irihira! Rumihi karapopeahi-ahingku, meliu hangko irihira! Bosami belangku kemate.

²⁴Limami belangku rahuku to Yahudi; rakandangi[8] talu pulona hai hahio belana.

²⁵Talumi belangku rahuku to Roma; rawombena hai lai. Hambela worina rawatui tauna au mampeinao mopapatena. Talu belana kapala tahi au kupesawii marugi i tanga tahi. Hambelana monanto-nanto i wongko tahi hambengia hai hangaloa.

²⁶I lalu polumaongku, bosa belangku hurewu; narumpana owai meumbala. Molambina rugi i taienda topanangka. Rapopeahi-ahina to Yahudi. Rapopeahi-ahina tauna au barahe to Yahudi. Molambina rugi i lalu wanua hai i raoa wanua. Molambina rugi i wongko tahi. Molambina rugi hangko i tauna au mouli kaihirana halalungku hampepepoinalai, agaiana katouana bara!

²⁷Mobago mantimina i sukana pebukuangku. Bosa belana barana leta, marimina hai mangkadouna. Bosa belana bara ara paandeku, makulina lawi bara handa hampiku.

²⁸I raoa hangko i hinangkana iti, karao inaongku, lawi mampekiri liliuna noumba katuwona jumaa i boea-boeana.

²⁹Ane arahe halalungku hampepepoinalai au masusa lalunda anti kamaledena pepoinalainda, masusa wori lalungku. Ane arahe au manawo i lalu dosa, rumpuna i tauna au mopakanawohe.

³⁰Ane hangangaa mampomahilena watangku haduduangku, mampomahilena kamaledengku.

³¹Ope-ope au kuuli inona tou, barana modongko. Pue Ala, Umana Pue Yesu, iami sabingku! Tatoiami hawe i hae-haena!

³²I tempoku ara i wanua Damsik, ara hadua gubernur i woi poparentana Datu Aretas au mampeinao mopapatena. Motudu surodadona mokampai baba bente wanua bona rahakana.

³³Agaiana ratulungina rangangku. Rapusana i lalu karanji hai rauluna hangko i sungkeke au ara i bente iti, ido hai tekabahana.