Read Napu 2 Korintu 2 Bible Online

2 Korintu 2 - Napu bible

2 Korintu 2

¹Mewali, nauli lalungku: ineekau hampai lao kusondaki, lawi bara kuunde mopakapari mbuli lalumi, nodo au mewali i tempomi kusondaki hangkoia.

²Lawi ane kupakasusa lalumi, hema mani pae au ina mopalindona?

³Ido pongkana pane kupakatumi hambua sura irikamu hangkoia bona ane hawena deade, barapi nipakasusa lalungku. Lawi katouana, ikamuri au hangangaa mopakatana lalungku. Hai kuisa, ane matanana, ikamu wori ina matana.

⁴I tempona kuuki sura iti hangkoia, mapari pehadingku hai karao inaongku; tudomi owai matangku. Sura iti bara kuuki bona mopakasusa lalumi, agaiana sura iti kuuki bona niisa noumba kamahilena ahingku irikamu.

⁵Hangkoia ara hadua tauna i olomi au masala. Anti babehiana, mapari lalungku, hai ane Ia mopakasusa lalungku, apa mani lalumi. Agaiana bona inee gaga makasara lolitangku iria, kuuli pea ia mopakasusa lalunda bahangkia tauna i olomi.

⁶Pehuku tauna bosa iria, handami. Mewali, kuuliangaakau, handami pehukumi iria.

⁷Ide-ide hangangaa niampungi. Nipalindo laluna dati gaga masusa pekirina duuna barapi ara peharungana.

⁸Ido hai kuperapi bona nitudungia kamaahimi iria.

⁹I lalu surangku hangkoia, kutudukau nihuku. Tunggaiaku mouki sura iti bona kupetandakakau ba nipeulai mpuu ope-ope hawangku. Hai nipeulai mpuumi hawangku iti,

¹⁰agaiana ide-ide kuuliangaakau, ineemi woia nihuku liliu. Ane niampungimi, hangangaa kuampungi worimi. Ane arato mpuu salana iriko, kuampungimi. Kerisitu moisa lalungku! Lawi peundeaku bona mohintuwukau hadua hai hadua.

¹¹Ido hai kuuli agina taampungi woia bona dati ara katepakana Datu Tokadake mokeloke. Lawi taisa, Datu Tokadake iti mapande moakalangi tauna bona manawohe i dosa.

¹²Kaliliuana halalu, hangkoia i kapadungku hangko i wanua Epesu, laona mobambari Ngkora Marasa kana i Kerisitu i wanua Troas. Kahawengku i Troas, Pue mobungkahiana rara bona mobagona inditi.

¹³Agaiana nauri nodo, bara tinda lalungku, lawi bara manina mampohidupaa Titu au moanti bambari kana irikamu halalu. Ido hai mepalakanamona i halalungku inditi bona maina inde mohaoki Titu i Makedonia.

¹⁴Agaiana kuuli ngkaia kamaroana i Pue Ala, lawi anti pohintuwuta hai Kerisitu, menangike, hai Ia mewali tadulakonta au monini liliuke. Iumba pea kalaoangki, mopahawengkai Ngkora Marasa i ope-ope tauna bona peisahe moisa Pue Ala. Ngkora Marasa iti peisa rapandiri nodo lana mawongi.

¹⁵I peitana Pue Ala, ikami nodo dupa au rahuwe, au mawongi raenga ope-ope tauna. I tauna au mampoinalai Ngkora Marasa, ikami nodo dupa au mawongi, lawi kipahaweahe bambari au moantihe i katuwo maroa au bara mokahopoa. Agaiana i tauna au mosapuaka Ngkora Marasa, ikami nodongkai enga tomate au bangka, lawi kipahaweahe kaina nahukunda Pue Ala i lalu naraka. Hema au peisa mampopolumao bago ide? Hangko i rohona haduduana, bara ara.

¹⁷Agaiana ikami, barangkai nodo tauna au mohaoki peahe doi hangko i popahawenda Ngkorana Pue. Mopahawengkai Ngkorana Pue hangko i kabulana lalungki anti pohintuwuki hai Kerisitu moula tunggaiana Pue Ala au motudungkai mampopolumao bagoNa. Iami au mampetirongkai.