Read Napu 2 Korintu 3 Bible Online

2 Korintu 3 - Napu bible

2 Korintu 3

¹Agaiana ineeri nipehangu mampopetoia mbulimongkai! Barangkai nodo bahangkia guru agama au hawe irikamu. Kahawenda i boeami, ihira mampetudungiahe sura petoia hangko i ranganda bona nidokohe. Hai ane paduhe hangko i boeami, merapi worimohe sura petoia hangko irikamu. Ikami bara paraluu sura au nodo.

²Ikamumi sura mpetoia au kianti hai au teuki i lalungki. Anti katebalikina lalumi, ope-ope tauna au moita katuwomi moisa kamaroana pobagongki mobambari Ngkora Marasa irikamu.[1]

³Nipetudungia i ope-ope tauna wua pobagongki moanti bambari kana i Kerisitu irikamu. Ikamu nodo hambua sura au nauki Kerisitu. Sura iti bara Nauki hai tinta ba i watu poukia. Lawi Kerisitu mouki lolitaNa i lalumi anti kuasana Inaona Pue Ala, au tuwo.

⁴Mololitangkai nodo, lawi meharungangkai i Pue Ala anti pohintuwuki hai Kerisitu, au mopileimongkai mewali topobagoNa.

⁵Bara kiuli kibuku mpuu mampopolumao bagona Pue. Bara kibuku hangko i kapandeki haduduangki; Pue Alami au moweingkai kapande.

⁶Ia moweingkai kapande mewali topobagoNa au mopaguru tauna i dandiNa au wou. Barahe kipaguru bona mampeulaihe atura-atura au teuki bona mewalihe manoto i peitana Pue Ala. Agaiana kipaguruhe bona molambihe katuwo au wou hangko i Inao Malelaha. Lawi ane mampeinaoke mewali manoto i peitana Pue Ala i kamampeulainta atura au teuki, ina molambike kapate, lawi bara buke katapeulaina. Agaiana ane meulake i Pue Ala anti kuasana Inao Malelaha, molambike katuwo maroa au bara mokahopoa.

⁷Hangkoia Pue Ala mouki AturaNa i watu poukia au Nawei i nabi Musa. I tempo iti peawana Pue Ala tongawa i lindona Musa au mewangka, ido hai bara rabuku to Isaraeli mototoki lindona Musa. Aturana Pue Ala au teuki i watu iti moanti kapate i manusia, lawi bara tabuku moula atura iti. Agaiana nauri nodo, mahile peawana Pue Ala au raita to Yahudi i lindona Musa. Mewali, ane peawana Pue Ala au mahile tongawa i atura au moanti kapate iti,

⁸apa mani pobagona Inao Malelaha.

⁹Ane peawana Pue Ala au mahile raita i kaNaweinta atura au moanti kapate, apa mani i kaNaweinta dandi au wou, au moanti tauna mewali manoto i peitana Pue Ala.

¹⁰Mahile mpuu peawana aturana Pue Ala au hae, agaiana ane tapahintoto hai peawana dandiNa au wou, atura au hae iti barapi meawa.

¹¹Lawi ane dandiNa au hampalai pea iti, mahile peawana, apa mani dandiNa au wou au bara mokahopoa.

¹²Mewali, anti peharungangki i dandina Pue Ala au wou, ido hai barangkai langa mopahawe Ngkora Marasa i kanoto-notoana.

¹³Bara ara au kiwuniangi. Barangkai nodo nabi Musa hangkoia, au motolombungi lindona bona pewangkana lindona au hampalai pea bara raita to Isaraeli.

¹⁴Agaiana pekirinda tetuko mani, lawi hawe ide-ide natabungi manihe tolombu iti. Ane mobasahe atura au hae, tetuko mani pekirinda. Ane mepoinalaimohe i Kerisitu, hangko tebungkahiri pekirinda.

¹⁵Haweto mani ide-ide, bela-belanda mobasa surana nabi Musa, ara mani au motabungi lalunda hai pekirinda.

¹⁶Agaiana ane mepoinalaimohe i Pue Yesu, tolombu iti ina rawungkehi hangko irihira.

¹⁷Lawi Pue iami Inao Malelaha. Hai ane Inaona Pue maida i lalunta, ina tekabahake hangko i hinangka kuasa au mogaakike hangko i Pue.

¹⁸Mewali, ikita ope-ope au mepoinalai i Pue, barapi ara tolombu au mobalungkuhi lalunta. Taisami kuasana Pue, hai kuasaNa iti mobaliki liliu lalunta. Kamahae-haea, katetetambaia kuasana Pue i katuwonta duunta mewali nodo Ia. Inaona Pue haduduaNa au mampopolumao bago iti i lalunta.