Read Napu 2 Korintu 5 Bible Online

2 Korintu 5 - Napu bible

2 Korintu 5

¹Lawi taisa, ane bambaruta i dunia ide ragero,[4] Pue Ala ina mopasilolonga haogu sou i suruga au tapaidai,[5] hambua paidaa au bara mokahopoa, au bara nababehi tauna.

²Tanganta mani tuwo i dunia ide, mantodihake lawi mampeinaoke molambi paidaa au wou i suruga.

³Paidaa iti iami wata au wou. Tapeinao mopahuru watanta ide hai wata au wou iti datike nodo tanoana au bara mowata.

⁴Lawi tanganta mani tuwo i dunia ide, mantodihake lawi mantimi haleanta. Agaiana bara taunde mopalehi watanta ide. Bara taunde mate, agaiana taunde bona watanta ide liliu rapahuru hai wata au bara mokahopoa.

⁵Pue Ala haduduaNa au mopasilolongaake hinangkana iti, hai Ia moweike Inao Malelaha mewali tanda kaina Naweinta wata au wou i suruga.

⁶Ido hai maroho lalunta hai taisa, tanganta mani tuwo i dunia ide, karao manike hangko i paidaanta hihimbela hai Pue Yesu hangalo.

⁷Meulake i Pue anti pepoinalainta, kehapiri bara mani taita.

⁸Ido hai maroho liliu lalunta. Kehapirike mate, taporasi lawi ane mogaake hai watanta ide, tanoananta ina hihimbela hai Pue.

⁹Mewali tapeinao mobabehi apa au maroa, au mopakatana laluna Pue, i tempota mani tuwo i dunia ide ba i tempona hihimbelamoke hai Pue.

¹⁰Lawi hambela tempo, ikita ope-ope hangangaa molindo Kerisitu bona Naparesa babehianta, hai ikita ope-ope ina molambi hurungina hintoto hai apa au tababehi tanganta mani tuwo i dunia ide.

¹¹Mewali, langangkai mobabehi apa pea au bara naunde Pue, lawi kiisa Ia ina moparesa babehianda ope-ope tauna. Ido hai kipari-pari moanti tauna mepoinalai i Pue Yesu. Pue Ala moisa lalungki. Peundeaki halalu bona barapi ara au bata-bata lalumi irikami. Kipeinao bona ope-opekau moisa kabulana lalungki.

¹²Inee nipehangu kipeinao motoia watangki haduduangki. Kipopaisaakau babehiangki au maroa au peisa nipomahile bona ara rarami mohanaihe tauna au moewangkai. Lawi tauna iti mampomahilehe kamapandenda hai lantinda i dunia ide, agaiana kadake lalunda.

¹³Barato moapa ane rauliangangkai magila anti pobagongki i Pue Ala, lawi kiunde mpuu mobago i Pue Ala hangko lalungki. Agaiana ane manoto pekiringki, iti mewali lawi kiunde mpuu motulungikau.

¹⁴Anti kamaahina Kerisitu irikami, ido hai kipari-pari mampopolumao bagongki mopahawe Ngkora Marasa. Lawi kiisa, Kerisitu mate mohuru dosa ope-ope tauna, iti lempona mate hahamoke.

¹⁵Lawi tunggaiana Kerisitu mate mohuru dosa ope-ope tauna bona ikita au tuwo manike i dunia ide barapoke moula peundeata haduduanta, agaiana moulamoke peundeana Kerisitu, au matemi mohuru dosanta hai au rapatuwo hulemi.

¹⁶Mewali, ido hai barapongkai mampeita tauna moula apa au raita i raoa. Hangkoia kiuli, Kerisitu manusia biasa pea, agaiana ide-ide barapi nodo pekiringki.

¹⁷Mewali, hema au mohintuwu hai Kerisitu, ia mewalimi manusia au wou. Katuwona au hangkoia liumi; ia molambimi katuwo au wou.

¹⁸Hinangka iti napopolumao Pue Ala, melempo i Kerisitu, bona Napopohintuwu huleke hai wataNa haduduaNa, hai Ia moweingkai bago mopahawe bambari iti i tauna ntanina bona peisa worihe mohintuwu hai Pue Ala.

¹⁹Idemi bambari au kipahawe: melempo i Kerisitu, Pue Ala mopahintuwu tauna hai wataNa haduduaNa, hai barapi Napailalu salanda. Ikami ide, Naweingkai bago moanti bambari iti i tauna ntanina bona peisa worihe mohintuwu hai Pue Ala.

²⁰Ikami ide sarungkoronangkai Kerisitu. Napokamba humengkai Pue Ala mopahawe lolitaNa irikamu. Moula peundeana Kerisitu, kiperapi mpuu irikamu bona mohintuwukau hai Pue Ala.

²¹Kerisitu, bara madosa, agaiana napahimbela Pue Ala tauna madosa hai Napahaleangi dosanta. Tunggaiana Pue Ala bona ikita au mohintuwu hai Kerisitu raimbamoke manoto i peitaNa.