Read Napu 2 Korintu 7 Bible Online

2 Korintu 7 - Napu bible

2 Korintu 7

¹Halalu-halalu au kupokaahi, anti kanaweinta Pue Ala dandiNa iti, ido hai hangangaa takabaha hinangkana au moantike i babehia au kadake, maroa au i watanta ba i lalunta. Hangangaa mampeulai mpuuke peundeana Pue Ala, hai hangangaa langake mobabehi apa pea au bara moula peundeaNa.

²Kiharunga, halalu, nidoko wongkamia! Lawi barangkai masala i hema pea, barangkai mopakanawo tauna, barakau kiakalangi bona mohaoki apa pea irikamu.

³Tunggaiaku, barakau kusalai. Lawi nodo au kuuli inona, rumihi kakipokaahimi. Ane tuwo, tuwo sambelake hai ane mate, mate sambelake.

⁴Halalu, barana langa mololita irikamu i katou-touana. Matana mpuu lalungku lawi meulakau i Pue. Kehapiringkai narumpa ngkaia kapari, agaiana anti kaikamuna, tepalindo lalungku hai matanana.

⁵Nodo au kutuntumi, hangkoia meangkamongkai hangko i Troas lao i tampo Makedonia. Agaiana i kahawengki i Makedonia, bara wori tinda lalungki, lawi iumba pea kalaoangki, narumpangkai ngkaia kapari maroa hangko i raoa ba hangko i lalungki au buke kalanga.

⁶Agaiana Pue Ala au mopalindo tauna au masusa lalunda, mopalindowomongkai i kahawena Titu.

⁷Hai meliu hangko indo, matanangkai mohadi lolitana kana irikamu. Titu mopahawe irikami noumba kanipalindona laluna tangana maida i olomi. Nauli rumihi kamabilami iriko. Nauli wori: tebalikimi lalumi hai merapi ampumokau lawi nipeinao mohintuwu hai iko hangko i lalumi. Kakuhadina iti, tetambaimi kamatanangku, halalu.

⁸Nauri ihi surangku hangkoia mobelai lalumi, agaiana bara kupenosoi mopakatuakau sura iti. Nguru-nguruna mapari mpuu kuhadi, lawi kuisa hangangaa masusa lalumi ane mobasakau sura iti. Agaiana kamasusana lalumi iti hampalai pea.

⁹Mewali, ido hai kuuli barapi masusa lalungku; matanamona. Barana matana anti kamasusami. Agaiana matanana lawi kamasusami iti moantikau menoso hangko i babehiami au bara maroa. Lawi nauri masusa lalumi mobasa surangku iti, kamasusana lalumi naporara Pue Ala mowatikau. Mewali, lolitangku i lalu sura iti barakau kupakanawo.

¹⁰Lawi ara kasusa lalu au moula peundeana Pue Ala, hai kasusa iti moantike menoso hangko i babehianta au kadake, alana Pue Ala mohoremake hangko i huku dosanta. Kasusa iti inee tapenosoi, agaiana tapokatanari. Agaiana ane masusa lalunta nodo i tauna au bara mepoinalai i Pue Ala, kasusa iti barake moanti menoso hangko i babehianta au kadake, alana molambike kapate au mogaakike hangko i Pue Ala.

¹¹Kamasusami mobasa surangku hangkoia, iami kasusa au moula peundeana Pue Ala. Nipekiri maroa ba apa wuana kamasusami iti. Anti kamasusami iti, mampeinaokau mobabehi apa au manoto. Bara niunde babehianda tauna au mosapuaka paturongki. Nikahihi babehia au masala, hai langakau moula babehia iti. Mabilakau iriko, mampeulaikau hawangku, hai maumokau mohuku tauna au masala. I hinangkana, tongawami kabulana lalumi.

¹²Halalu-halalu, i lalu surangku hangkoia au kuukiamokau, bara ara tunggaiaku mokambaroa hadua tauna au masala iti. Bara wori ara tunggaiaku bona motulungi pea tauna au molambi rugi anti tauna au masala iti. Tunggaiaku mouki sura iti, bona nipatongawa i peitana Pue Ala, noumba kamahilena ahimi irikami.

¹³Mewali, tepalindomi lalungki! Hai meliu hangko inditi, matana woringkai moita kamatanana Titu. Tepalindo laluna moita babehiami au maroa tangana maida i olomi.

¹⁴Hangko damani kutudu lao irikamu hangkoia, kupahawea amimi noumba kamaroana lalumi. Morasina halalu, lawi barana nipakaea. Ope-ope au kuuliangaamokau, tou mpuu, nodo wori ope-ope au kupahaweami Titu kana irikamu, bara ara au sala, tou mpuu ope-ope.

¹⁵Hai ia wori, tetambai ahina irikamu, lawi nakatuinao noumba peulami i hawana. Nidoko maroami hai mengkoru mpuukau iria.

¹⁶Mewali halalu, hambela mani kuuli: matana mpuuna, peisamokau kuharunga i hinangkana.