Read Napu 2 Korintu 9 Bible Online

2 Korintu 9 - Napu bible

2 Korintu 9

¹Katouana, barapi paraluu kuukiakau sura kana i doi au ina kianti lao i halalunta hampepepoinalai i wanua Yerusale.

²Kuisa niunde mpuu metulungi, ido hai kutoia amimokau i to Makedonia, kuuliangaahe: “Ane halalunta au maidahe i tampo Akaya,[7] mepongka pare liu, masilolongamohe motulungi halalunta hampepepoinalai au meahi-ahi tuwonda.” Mewali, kamohadinda kamaahina lalumi mokira doi iti, tehuweki worimi lalunda, alana bosahe au mokira petulunginda.

³Agaiana nauri nodo, kutuduhe Titu hai rodua rangana moioru lao irikamu bona motulungikau mokadipura kabula lalumi. Hai kuharunga ane hawe worina deade, masilolongamokau bona lolitangku au motoiakau bara raimba dongkoku pea. Lawi kuuliangaamohe to Makedonia kana i petulingimi au masilolonga amimi.

⁴Lawi ane hawehe to Makedonia au mamporangaina lao irikamu, hai ane rapana bara mani ragulu doi petulungimi, ina rumihi kamaeangki, lawi roomokau kitoia i lindonda. Ikamu ina maea worikau.

⁵Ido hai nauli lalungku agina kutuduhe Titu hai rodua rangana moioru bona doi kabulana lalumi au nidandi peisa rakadipura ami. Mewali, ane hawena deade hai kabula lalumi masilolongami, ina tongawa i ope-ope tauna doi iti nikira hangko i lalumi, bara anti karapari-pariami.

⁶Nipailalu lolitangku ide: apa au tatuda, iti wori au tapupu. Tauna au motuda haodi, haodi pea au napupu. Tauna au motuda ngkaia, ngkaia wori au napupu.

⁷Agina hadua-hadua tauna mokira popenombana i sukana kabulana laluna. Ineekau mokira hangko i kasusa lalu, hai ineekau mokira anti karapari-pariami. Lawi Pue Ala mampokaahi tauna au mokira hangko i katana lalu.

⁸Hai Pue Ala ina moweikau hinangkana pewati duuna barapi ara kamakurami bona nibuku mampopolumao hinangkana bago motulungi rangami.

⁹Lawi ara teuki i lalu Sura Malelaha au manguli: “Ia motulungihe tauna au meahi-ahi tuwonda hangko i kabulana laluNa. Kamaroana laluNa bara ara kahopoana.”

¹⁰Pue Ala mopasilolonga tinuda i topohawu, hai hangko i tinuda iti, Ia mopaara paande. Nodo wori, Pue Ala ina motambai apa au ara irikamu bona tetambai kamaroana lalumi motulungi tauna ntanina.

¹¹Ikamu ina napoporasikau Pue Ala i hinangka pewati bona bula lalumi i rangami. Mewali, ane kiantimi popenombami i hangka ranganta au meahi-ahi tuwonda, bosa tauna ina manguli ngkaia kamaroana i Pue Ala.

¹²Popenombami iti ina mopabukei kamakuranda to Sarani i Yerusale. Hai bara iti pea, anti kabulana lalumi, bosa tauna manguli ngkaia kamaroana i Pue Ala.

¹³Ane moitamohe petulungimi, ina motoiahe Pue Ala lawi anti kamaroana lalumi tongawami kamarohona pepoinalaimi i Ngkora Marasa kana i Kerisitu hai pengkorumi i hawaNa. Ina motoiahe Pue Ala, lawi bula lalumi motulungi tauna iti hai tauna ntanina.

¹⁴Hai ihira ina mampekakaengaakau hangko i lalunda hai rakabilaikau lawi mahile mpuu ahina Pue Ala au mobago i lalumi.

¹⁵Tauli ngkaia kamaroana i Pue Ala, lawi mahile mpuu kabulana laluNa irikita, melumbu hangko i apa au peisa tapololita!