Read Napu Galatia 1 Bible Online

Galatia 1 - Napu bible

Galatia 1

¹Halalungku hampepepoinalai i ope-ope jumaa au ara i Galatia, Iko, Paulu, surona Pue Yesu hai ope-ope halalungku hampepepoinalai au arahe inde, manguli tabea! Kiharunga Pue Ala Amputa hai Pue Yesu Kerisitu ina mowatikau hai moweikau roa ngkatuwo. Iko, mewalina surona Pue Yesu bara anti manusia ba naangkana manusia, agaiana Pue Yesu hai Pue Ala Umanta au mopatuwo hulemi Yesu hangko i kapateNa, au mampopewalimona suroNa.

⁴Pue Yesu mokirami wataNa rapapate mohuru dosanta bona tekabahake hangko i kuasa dunia au kadake ide. Iti Nababehi moula peundeana Pue Ala Umanta.

⁵Tatoiami Pue Ala hawe i hae-haena. Amin.

⁶Kupotingkara mpuu halalu! Bara manikau mahae nakakio Pue Ala anti kabulana laluna Kerisitu bona mampoinalaikau Ngkora Marasa. Agaiana ide-ide barapokau mengkoru i Pue Ala, moularikau paturo au ntanina.

⁷Katouana paturo iti bara peisa mopahaweake noumba rara molambi katuwo maroa hangko i Pue Ala, batena pea Ngkora Marasa au kipahaweakau. Ide-ide arahe tauna au hawe i olomi au mopawulikau hai paturonda au sala, tunggaianda mampeinaohe mobaliki Ngkora Marasa kana i Kerisitu.

⁸Agaiana kuuliangaakau, hema pea au mopahawe “ngkora marasa” au bara himbela hai Ngkora Marasa au kipahaweamokau, hangangaa nahukuhe Pue Ala! Mogalori ikami ba malaeka hangko i suruga, ane mopahawengkai ngkora marasa au bara tou, batengki nahuku Pue Ala!

⁹Kiuliangaamokau hangkoia, i tempoki mani hihimbela hai ikamu inditi, hai ide-ide kuuliangaa mbulikau hambela: ane ara tauna au mobambari ngkora marasa au ntanina hangko i apa au nidokomi, batena nahukuhe Pue Ala!

¹⁰Mewali halalu! Ba nipehangu mampopetoiana i manusia anti pololitangku inona? Bara, agaiana mampeinao peana molambi petoia hangko i Pue Ala. Ba niuli node: “Paulu mampeinao pea mopamatana laluna manusia?” Bara kuunde mopamatana laluna manusia, lawi ide iko, hawinana Kerisitu.

¹¹Bona niisa halalu, Ngkora Marasa au kuanti, bara hangko i pekiri manusia.

¹²Ngkora Marasa iti, bara kudoko hangko i manusia, bara wori ara tauna au mopaguruana. Agaiana Yesu Kerisitumi au mopahawe Ngkora Marasa iti iriko.

¹³Niisa, halalu, lolitakana katuwongku hangkoia i poulangku agama Yahudi. Bosa mpuuhe rangangku au moula agama Yahudi, agaiana ikomi au melumbu peulangku i ope-ope atura agama, lawi hangko i lalungku mpuu moulana adanda toiorungki. Hai i tempo iti, kupari-pari mampopeahi-ahihe ope-ope to Sarani, lawi kupeinaohe kupatuna.

¹⁵Agaiana anti kabulana laluNa Pue Ala, hangko damanina rapoanaka, Napileimona bona mewalina SuroNa.

¹⁶Napopaitaamona AnaNa bona kubambari kana Iria i ope-ope tauna au barahe to Yahudi, hai i tempo iti barana lao merapi paturo i tauna.

¹⁷Bara worina hampai lao i wanua Yerusale meguru irihira au iorumohe mewali surona Pue Yesu. Agaiana laona hampai i tampo Ara, hangko mesule mbulirina lao i wanua Damsik.

¹⁸Talu parena roo indo, hangko laorina i Yerusale mampohidupaa Peturu. Maidana hihimbela hai ia hampulo hai lima alona kamahaena.

¹⁹Tempo iti, kupohidupaa wori Yakobu halalu ntepuuna Pue Yesu. Agaiana surona Pue Yesu au ntanina, barahe kuita.

²⁰(Tou mpuu apa au kuuki ide. Pue Ala moisa lalungku!)

²¹Hangko inditi, laomona i tampo Siria hai Kilikia.

²²Hungkaku inditi, barana hambela lao i tampo Yudea; ido hai to Sarani inditi bara manihe hambela moita lenggeku.

²³Mohadi peahe lololita au manguli, “Hadua tauna au hangkoia mampopeahi-ahike, ide-ide mopahawemi Ngkora Marasa au hangkoia napari-pari napatuna.”

²⁴Ido hai motoiamohe Pue Ala, lawi mohadihe apa au mewali iriko.