Read Napu Galatia 4 Bible Online

Galatia 4 - Napu bible

Galatia 4

¹Mewali, halalu: ane pandirina ara hadua anantuana au kokoi mani, ia nodo hadua hawi, nauri ope-ope anu-anuna umana, ia ampuna.

²Ia nodo hadua hawi lawi tauna ntaninari au mokadipura hai mourusi anu-anuna duuna hawe tempo au napakanotomi umana.

³Nodo wori ikita halalu: hangko damanike moisa Pue Ala, nodoke anangkoi iti, lawi mengkoruke i ada hai hinangka kuasa dunia ide.

⁴Agaiana i tempo au Napakanotomi Pue Ala, Ia motudumi AnaNa mai i dunia, au napoanaka hadua anantowawine, hai Ia tuwo nodo to Yahudi au mengkoru i Aturana Musa.

⁵Pue Ala motudu AnaNa mai i dunia bona mokabahake hangko i Aturana Musa hai peisake mewali anaNa.

⁶Mewali, anti kanapoananta Pue Ala, Ia motudumi Inaona AnaNa maida i lalunta. Anti pobagona Inao Malelaha iti i lalunta, ido hai peisake mokakio Pue Ala, “Uma!”

⁷Mewali, ide-ide barapoke hawi, agaiana Napoanamoke Pue Ala, hai ane Napoanamoke Pue Ala batenta molambi pewati au Napasilolongaamoke.

⁸Hangkoia hangko damanikau moisa Pue Ala, mengkorukau i anitu, au bara makuasa.

⁹Agaiana ide-ide moisamokau Pue Ala. Moleri Pue Alami au ioru moisakau! Mewali, moapari hai moula hulekau ada hai hinangka kuasa dunia ide? Nipeulai ope-ope ada agama to Yahudi, mokadipurakau alo, wula hai pare[1] au rapakanoto i lalu Aturana Musa. Ada hai atura iti bara mopaara pewati, hai barakau ina tekabaha hangko i dosami anti peulami i atura iti. Mewali, moapari hai nipeulai hule ada iti?

¹¹Au kupokalanga, bara ina mobundu kamawowengku mopahawe Ngkora Marasa irikamu.

¹²Halalungku to Galatia! Kuperapi bona nipeulai mpuu babehiangku. Lawi naurina to Yahudi, kukabahami peulangku i adanda to Yahudi bona mewalina nodo ikamu au barakau to Yahudi. Bara manina hambela modoko au bara maroa hangko irikamu.

¹³Manoto nikatuinao mani kahawengku i boeami nguru-nguruna hai popahawengku Ngkora Marasa irikamu lawi tempo iti mahaina.

¹⁴Agaiana kehapiri meringkui hakingku iti, bara mpuuna nikaraohi ba nipokarika. Nidoko maroana, nodokau modoko hadua malaeka ba nodokau modoko Kerisitu Yesu.

¹⁵I tempo iti, matana mpuu lalumi. Agaiana ide-ide, iumbami kamatanami iti? Hangkoia, kuisa mpuu, halalu, ane ara ba apa pea au kuparaluu, barana nipokabohia. Mogalori matami haduduami, ane kepeisa nidungkiki hai niweina, bara ina nipokabohi.

¹⁶Ba niimbarina pae iwalimi, lawi kupahaweakau apa au tou?

¹⁷Arahe tauna au mampeinao mangala lalumi. Agaiana tunggaianda bara maroa, lawi rapeinao mogaakikau hangko iriko bona meulakau irihira.

¹⁸Barakau kusalai ane arahe au modiikau mewali ranganda, asala maroa tunggaianda. Hai tunggaianda hangangaa maroa liliu, bara pea i tempoku ara i olomi.

¹⁹Halalu, kuimba mpuumokau anangku. Hai ide-ide mapari lalungku mampepekirikau. Kamaparina lalungku ide nodo kamaparina hadua towawine au ina moana. Hai ina mapari liliu lalungku duuna poantimi himbela hai poantina Kerisitu.

²⁰Ide-ide kupeinao mpuu bona hihimbelana hai ikamu bona lolitangku au makasara i sura ide anti kawuntunami pekiringku, peisa kubaliki.

²¹Halalungku, ikamu au mampeinao moula Aturana Musa, nipehadingi lolitangku! Ina kupakanotoakau apa au teuki i lalu Sura Aturana Musa.

²²Inditi teuki: Burahima rodua anana. Anana au hadua napoanaka Hagari, au hawi katuwona. Hai anana au hadua napoanaka towawinena au rahanga Sara, au bara hawi.

²³Anangkoi au napoanaka towawine au hawi tuwona, rapoanaka moula peundeana manusia. Agaiana anangkoi au napoanaka towawine au bara hawi, rapoanaka mopabukei dandina Pue Ala i Burahima.

²⁴Tuntukana iti peisa mewali ngkora pandiri irikita. Towawine au rodua iti lempona rompaka dandi au nawei Pue Ala i manusia: dandi au hampaka mokanai Aturana Musa; hai dandi au hampakana iami dandi au nawei Pue Ala i Burahima. Ope-ope tauna au mampeulai Aturana Musa, katuwonda nodohe katuwo hawi, lawi mengkoruhe i Aturana Musa.

²⁵Mewali, Hagari au hawi tuwona rapandiri nodo Atura au nadoko Musa i wongko Bulu Sinai i tampo Arabia. Hai Hagari iti peisa wori rapandiri nodo wanua Yerusale au ara i dunia ide. Lawi ampu wanua Yerusale tuwohe nodo hawi, lawi mengkoruhe i Aturana Musa.

²⁶Agaiana Sara iami towawinena Burahima au bara hawi. Ia nodo wanua Yerusale au i suruga. Sara itimi au tapoina, lawi tekabahamoke hangko i Aturana Musa; barapoke napohawi Atura iti.

²⁷Iti mewali moula apa au teuki i lalu Sura Malelaha au manguli: “Matanako, oio towawine au lalo, au barako hambela moana! Matanako hai mengeleko, au bara hambela mantodiha moana! Lawi nauri napalehiko tobalilomu, ina meliu kabosanda pemuleamu pane towawine au tuwo hihimbela hai tobalilona.”

²⁸Halalu-halalu! Ikamu ananamokau Pue Ala au rapoanaka hintoto hai dandina Pue Ala; ikamu himbelakau hai Isaki.

²⁹I tempo iti, anana Burahima au rapoanaka moula peundeana mampopeahi-ahi adina au rapoanaka moula kuasana Inao Malelaha. Nodo wori au mewali i tempo ide: ikita au mampeulai peundeana Inao Malelaha rapopeahi-ahike tauna au mampeinaohe mopari-parike mampeulai Aturana Musa.

³⁰Agaiana apa au teuki i lalu Sura Malelaha? Ara au teuki node, “Wuramide hawinta au towawine iti hihimbela hai anana! Lawi anangkoi hawi iti bara peisa modoko sosora hangko i umana. Sosora iti hangangaa rawei pea i anangkoi au napoanaka towawine au bara hawi.”

³¹Mewali, ikita ide halalu, barake nodo anana Hagari, au hawi katuwona. Ikita ide, nodoke anana Sara au bara hawi.