Read Napu Galatia 6 Bible Online

Galatia 6 - Napu bible

Galatia 6

¹Halalu, ane moitakau rangami hampepepoinalai mobabehi sala, ikamu au mampeulaikau peundeana Inao Malelaha, hangangaa ninini wohiraia mesule i rara au manoto i lalu kamaalusu. Hai mokampai worikau watami datikau hawe mobabehi dosa.

²Hangangaa mombembetulungikau hadua hai hadua bona hai babehiami iti, nipeulaimi hawana Kerisitu.

³Ane ara hadua tauna au moimba tuwona melumbu, moleri barato, himbela pea mampodongkoa watana haduduana.

⁴Agina ope-ope tauna mampekiri babehiana haduduana, maroa ba bara. Ane maroa, peisa napokatana. Hai ineemi napapahintoto hai babehiana rangana.

⁵Lawi ope-ope tauna hangangaa mohalea babehiana haduduana.

⁶Tauna au modoko paturo kana Ngkorana Pue Ala, hangangaa mampokiraia tauna au mepaturo, hangko i apa pea rasi ba pewati au nahumba.

⁷Mainga-ingakau, halalu! Pue Ala bara peisa rapodongkoa, lawi apa au tatuda, iti wori au tapupu.

⁸Hema-hema pea au mobabehi liliu peundeana laluna au kadake, ina molambi wori wua au kadake iami ragaaki hangko i Pue Ala hawe i hae-haena. Agaiana hema pea au mampeulai liliu peundeana Inao Malelaha, ina molambi katuwo maroa hihimbela hai Pue Ala hawe i hae-haena lawi katuwo au maroa iti hangko i Inao Malelaha.

⁹Mewali, ineeke oha-oha mobabehi apa au maroa, lawi ane mobabehi liliuke apa au maroa, batena ina tapupu wuana i tempo au tepakanotomi.

¹⁰Ido hai, liana mani ara loga au raweike, hangangaa mobabehike apa au maroa i ope-ope tauna, pelumbunami i halalunta hampepepoinalai.

¹¹Nipeita maroa-roa kahopoana sura ide au kuuki hai taiengku haduduangku. Niita noumba kamahilena ukingku.

¹²Mainga-ingakau i tauna au mepakanawo, au raunde moula ada au raita pea i raoa bona ratoiahe tauna. Rapari-parikau ratile moula Aturana Musa. Agaiana iti rababehi lawi langahe rapopeahi-ahi hangka to Yahudinda, anti pepoinalaindami i Kerisitu au matemi i kau mombehape.

¹³Katouana tauna au mampeulai ada mpetile iti, barato worihe mampeulai ope-ope Aturana Musa. Tunggaianda mopari-parikau ratile bona rapomahilehe anti kanipeulaina hawanda iti.

¹⁴Agaiana iko, bara kuunde rapomahile i raoa hangko i kapatena Pue Yesu Kerisitu i kau mombehape. Lawi ope-ope au peisa raita i dunia ide hai au raimba mahile holona barapi ara bunduna iriko. Hai tauna i dunia ide, bara ara au tedii lalunda i apa au kupomahile.

¹⁵Ratile ba bara, iti bara paraluu. Au paraluu iami katuwo au wou hangko i Pue Ala.

¹⁶Mekakaena bona ope-ope tauna au tuwo moula paturo ide hai au mewali taunana Pue Ala ina molambi roa ngkatuwo hai ahina Pue Ala.

¹⁷Kahopoana, kuperapi bona datipi ara au mopakasusana. Lawi lari i watangku ide[2] mopakanoto kaikona surona Pue Yesu.

¹⁸Halalu-halalungku! Amputa Yesu Kerisitu, mowatikau ope-ope. Amin. Hangko iriko PAULU