Read Napu Epesu 1 Bible Online

Epesu 1 - Napu bible

Epesu 1

¹Sura ide hangko iriko, Paulu, au mewali surona Kerisitu Yesu moula peundeana Pue Ala. Sura ide kupakatu irikamu taunana Pue Ala i Epesu au tetida pepoinalaimi i Kerisitu Yesu.

²Pebila hai peadai! Kuharunga Pue Ala Umanta hai Pue Yesu Kerisitu mowatikau hai moweikau roa ngkatuwo.

³Tatoiami Pue Ala, Umana Amputa Yesu Kerisitu, au mowatike hai hinangka pewati au maroa hangko i suruga, anti pohintuwuta hai Kerisitu.

⁴Hangko damani dunia rapopewali, Napileimoke Pue Ala mohintuwu hai Kerisitu bona mewalike taunaNa au malelaha au bara ara kamasalanta i peitaNa.

⁵Anti kamaahina laluNa irikita, Napakanoto amimi kaNaangkata mewali anaNa. Naangkamoke mewali anaNa anti kanahoremanta Yesu Kerisitu, lawi itimi au Natunggai hai au Napokatana.

⁶Ido hai tatoiami Pue Ala, lawi mahile mpuu ahiNa irikita. Hangko i kabulana laluNa, Nawei mberomoke ahiNa anti pohintuwuta hai Yesu, AnaNa au Napokaahi.

⁷Hai wahena Pue Yesu au mabubu i kapateNa, tehompokimoke hangko i huku dosanta, lempona naampungimi Pue Ala hinangka dosanta, hangko i kabulana laluNa au mahile.

⁸Ia mobabehi iti anti kamaahiNa au bara ara hokana, moula kamatopaNa hai kapandeNa.

⁹Moula peundeaNa, Napopaisaamoke tunggaiaNa au tewuniangi mani. TunggaiaNa iti iami bona hinangkana, maroa au i suruga ba i dunia, ina Napahintuwuhe hai Kerisitu au mewali tadulako i hinangkana. Hai tunggaiaNa iti batena Napopewali melempo i Kerisitu ane hawemi tempona.

¹¹Pue Ala mobabehi hinangkana moula peundeaNa hai pobotusiNa haduduaNa. Napileimoke hai Napakanotomi kaikitana au mewali taunaNa anti pohintuwuta hai Kerisitu.

¹²Nababehi nodo, bona ikami to Yahudi au nguru-nguruna meharunga i Kerisitu motoia hai mampomahile Pue Ala.

¹³Nodo wori ikamu. I kamohadimi bambari au tou mewalimokau taunana Pue Ala. Mampoinalaimokau Ngkora Marasa iti, ido hai Nahoremamokau Pue Ala hangko i huku dosami. Hai Naweimokau Inao Malelaha au Nadandi hangkoia, au mewali pekatandaina Pue Ala i lalumi au mopatongawa pewalimimi taunaNa.

¹⁴Inao Malelaha itimi au mopakaroho dandiNa irikita bona manoto kaina Naweinta ope-ope sosora au Nadandiake, iami Nakabahake hangko i huku dosanta hai Napopewalike taunaNa. Ido hai hintoto mpuuke motoia hai mampomahile Pue Ala.

¹⁵Mewali, anti kakuhadina bambari au mampololita noumba pepoinalaimi i Pue Yesu hai noumba kamaahimi i rangami hampepepoinalai,

¹⁶ido hai barana botu-botu manguli ngkaia kamaroana i Pue Ala anti kaikamuna, hai kukabelai liliukau i lalu pekakaengku.

¹⁷Mekakaena i Pue Ala au meawa, Umana Amputa Yesu Kerisitu. Kuperapi Iria bona Naweikau Inao Malelaha au mopamanoto lalumi, duuna moisa ntepuukau Pue Ala.

¹⁸Kuperapi Pue Ala ina mopamanoto lalumi bona niisa apa au peisa taharunga hangko i kanakakionta Pue Ala mewali anaNa, hai ina Niisa wori noumba kamahilena sosora au Napasilolongaahe tauna au Napoana,

¹⁹hai bona niisa wori kamahilena kuasana Pue Ala au mobago i lalunta ope-ope tauna au mepoinalai Iria. KuasaNa iti mahile ntepuu

²⁰itimi au Napake mampopearo Kerisitu hangko i kapate bona Napopohuda ntanda i koanaNa i lalu suruga.

²¹Kuasa au Nawei Pue Ala i Kerisitu iti, meliu kamahilena hangko i kuasanda ope-ope topoparenta, tomakuasa, tadulako, hai au rapenombai. KuasaNa iti meliu kamahilena hangko i ope-ope au molambi pohudaa au teadai, maroa au tuwo ide-ide, maroa au tuwo i alo au ina mai.

²²Pue Ala mampopengkoru hinangkana i Kerisitu, hai moangka Kerisitu mewali Tadulako au moparenta ope-ope tauna au mepoinalai Iria.

²³Ikita au mepoinalai Iria, mewalimoke Watana Kerisitu. Iami au mampobago hinangkana bona ope-ope mewali moula tunggaiaNa.