Read Napu Epesu 4 Bible Online

Epesu 4 - Napu bible

Epesu 4

¹Halalu, nihadimi ope-ope paturongku. Ide iko, au ratarunggu anti pobagongku i Pue Ala, kuperapi mpuu irikamu bona mobabehikau apa au hintoto rababehi anana Pue Ala, lawi Nakakiomokau mewali anaNa.

²Hangangaa mengkaiwoikau hai hangangaa maalusu poantimi i paka-pakana. Hangangaa peisakau modoko hangka rangami nauri niisa kamakurana, hai hangangaa sabarakau anti kamaahimi hadua hai hadua.

³Nipari-pari mohintuwu, inee ara posisisala bona kahintuwumi i lalu Inao Malelaha tekadipura liliu.

⁴Ikita ope-ope au mepoinalai i Yesu Kerisitu, nodo peake hawata-wata, hai hadua pea Inao Malelaha au mampaidaike. Hai himbela wori peharunganta ope-ope, lawi nakakiomoke Pue Ala mewali anaNa.

⁵Hadua pea Amputa, hambua pea pepoinalainta, hai rariuke i lalu hanga au himbela.

⁶Hadua pea Pue Ala au rapouma ope-ope tauna, au makuasa irikita ope-ope, au ara i lalunta hai au mampobago ope-ope melempo irikita.

⁷Nauri himbelake, agaiana karawatinta bara himbela, lawi ikita ope-ope raweike kapande hadua-hadua mampopolumao bagona Pue hintoto hai apa au naweike Kerisitu.

⁸Ido hai i lalu Sura Malelaha teuki node: “Karoona monangi iwaliNa, mengkaoremi i kapangkaaNa, hai bosahe tawani au Naanti; hai Ia mokira-kira pewati i manusia.”

⁹Mewali ane rauli, “Ia mengkaore hulemi i kapangkaaNa”, manoto hangkoia Ia mendaulumi mai i paidaa au tepaiwoi i dunia ide.

¹⁰Hai Ia au mendaulumi iti, Ia wori au mengkaore hule duuna molambi pohudaa au meliu kapangkana hangko i ope-ope au i langi bona Ia mopabukei hinangkana.

¹¹Iami au mokira-kira pewati i ope-ope tauna au mepoinalai Iria: arahe au Napopewali suroNa, arahe au Napopewali nabi mopahawe lolitaNa, hai ara worihe au Napopewali topobambari Ngkora Marasa, guru jumaa, hai guru agama.

¹²Ia mokira-kira pewati iti bona ikita ope-ope au mepoinalai Iria raparewaike bona tabuku mampopolumao bagona Pue. Lawi ane iti au tababehi, ikita au rauli Watana Kerisitu ina tetambai kamarohona pepoinalainta,

¹³duuna hambela tempo ina mewalike hampepekiri i lalu pepoinalainta, hai ina moisa ntepuuke Anana Pue Ala. Ina kanoto-notoake, duuna mewalike nodo Kerisitu au bara ara kamakuraNa.

¹⁴Mewali, ane nodo kamarohona pepoinalainta, barapoke ina holi-holi rapakanawo nodo anangkoi, lawi pekiri anangkoi nodo hehi au nawui himburu node hou node mai. Agaiana ikita, barapoke nodo. Barapoke ina mampeulai hinangka paturo hangko i tauna au mepawuli hai mepakanawo.

¹⁵Agaiana ina tapatongawa paturo au tou hangko i lalunta au buke ahi, bona i paka-pakana, kamahae-haea kanoto-notoake duuna mewalike nodo Kerisitu, au mewali Tadulakonta.

¹⁶Ikita hadua-hadua au mepoinalai, rapandirike nodo hangkira hangko i Watana Kerisitu. Ane i wata manusia, hinangka kirana mombeusu maroa hai hiumpu maroa bona mewali hambua wata. Nodo wori ikita au mepoinalai: anti pohintuwuta hai Kerisitu, mohintuwuke hadua hai hadua. Hai ane ikita hadua-hadua mokadipura bago au nakira-kiraamoke Pue, ina kamaroho-rohoa peulanta i Pue hai pohintuwuta hadua hai hadua anti pombepokaahinta.

¹⁷Mewali, hai kuasa au naweina Pue, kuuli hai kupaturoakau: Ineemokau tuwo nodo katuwomi hangkoia au bara moisa Pue Ala, lawi au rapekiri bara mobundu

¹⁸hai makaindi lalunda. Barahe mohumba katuwo au wou hangko i Pue Ala, lawi barahe moisa Pue Ala. Ntulihe lawi matua lalunda.

¹⁹Barapi raisa maea, ido hai moula pearaihe peundeana lalunda au merikai, hai raunde peami mobabehi hinangkana babehia au bara hintoto.

²⁰Agaiana, ikamu, inee nodo babehiami, lawi bara iti au rapaturoakau hangko i Ngkora Marasa kana i Kerisitu.

²¹Ane nihadi mpuumi kana Iria, hai rapaturoamokau paturo au tou moula kamanotoNa,

²²hangangaa nitendemi babehiami au hangkoia hangko damanikau mepoinalai i Pue. Ope-ope peundeana lalumi au nipeulai i tempo iti mopakanawokau hai mopakarugi katuwomi.

²³Ido hai hangangaa merapikau bona Pue Ala mowouki lalumi hai pekirimi.

²⁴Hai hangko inditi, hangangaa niula babehia wou au hintoto, lawi napopewalimokau Pue Ala manusia au wou, tunggaiana bona manoto hai malelahakau moula poantiNa haduduaNa.

²⁵Mewali halalu, nitendemi dongko. Nipololitami apa au tou i hangka rangami, lawi ikita ope-ope hangkirake hangko i Watana Kerisitu.

²⁶Ane rumpukau, inee nipogiangaa karumpumi iti moantikau madosa. Ineekau mowoli karumpumi duuna tampu alo,

²⁷dati ara katepakana Datu Tokadake mokelokau.

²⁸Tauna au manangka, ineemohe manangka. Aginda mobago bona molambihe apa au raparaluu hai bona peisa worihe motulungi ranganda au mapari.

²⁹Inee ara lolita kadake mesuwu hangko i humemi. Agina mohowarakau lolita au hintoto au ina motulungi hai mopakaroho laluna hangka rangami. Lolita au nodo ina moanti roa ngkatuwo i tauna au mohadi.

³⁰Nikampai babehiami datikau mopakasusa Inao Malelaha au naweikau Pue Ala. Nikatuinao, Inao Malelaha iami pampekatandaina Pue Ala i lalumi au mopakanoto kaikamuna taunaNa. Anti kaarana Inao Malelaha i lalumi, niisa kaina hawena tempona Pue Ala mokabahakau hangko i dunia au kadake ide.

³¹Mewali, nikabahami ope-ope babehia au node: hai lalu, karumpu, pepailalu, pobungka, pepakadake, hai pekakabosai. Nikabahami babehia iti hai hinangka babehia au kadake.

³²Hangangaa maroa lalumi, mampokaahikau rangami, hai niampungi salana hangka rangami, nodo Pue Ala moampungi salami anti pohintuwumi hai Kerisitu.