Read Napu Epesu 6 Bible Online

Epesu 6 - Napu bible

Epesu 6

¹Anangkoi, anti pohintuwumi hai Kerisitu, hangangaa nipeulai hawana tosaemi, lawi iti au hintoto nibabehi.

²I lalu Sura Malelaha ara parenta au teuki node, “Bila umamu hai inamu.” Hangko i hawa hampulo, itimi parenta au nguru-nguruna ara dandina, iami,

³“bona maroa tuwomu hai ngkararu tinuwumu i lalu dunia ide.”

⁴Hai ikamu uma-uma, ineekau mobelai lalunda anami. Agaiana hangangaa nikadipurahe, nipaturohe hai niweihe lolita au hangko i Pue.

⁵Halalungku au mewali hawi, nipeulai hawana ampumi i lalu dunia ide. Nibila hai nipengkoruihe hangko i kabulana lalumi. Nibabehi iti nodo pengkorumi i Kerisitu.

⁶Inee nibabehi nodo i lindonda pea ampumi bona ratoiakau. Mobagokau nodo hawina Kerisitu au moula peundeana Pue Ala hangko i lalumi.

⁷Mobagomokau i lalu kamatana nodokau mobago i Pue, bara pea i manusia.

⁸Bona niisa: ope-ope tauna, maroa hawi ba au bara hawi ane mobabehi apa au maroa batena molambihe saronda hangko i Pue.

⁹Hai ikamu ampu hawi, hangangaa nipamaroa-roa wori babehiami i hawimi. Ineehe nipopopara. Hangangaa nikatuinao ikamu ampu hai hawi, hadua pea Ampumi, iami Pue i lalu suruga au bara mampopontani tauna.

¹⁰Kahopoana halalu, hangangaa marohokau i lalu karoho au nihumba hangko i kuasana Pue, lawi mohintuwumokau hai Ia.

¹¹Hangangaa mopakekau hinangka parewa pombeala au napasilolongaamokau Pue Ala bona maroho peangkami moewa akalana Datu Tokadake.

¹²Lawi i pombealata ide, barake moewa manusia agaiana moewake au makuasa au bara taita. Moewake tadulako-tadulako kamakaindi au makuasa i dunia. Moewake hinangka seta hai tokadake au mokuasai laerawa.

¹³Ido hai, ide-ide hangangaa nipake hinangka parewa pombeala au hangko i Pue Ala bona ane hawe alo pombeala, ina nibuku moewa pebungkana iwalimi duuna i kahopoana, hai batena maroho liliu peangkami.

¹⁴Mewali, nipakaroho peangkami hai parewa pombeala au hangko i Pue Ala. Nipakaroho peulami i paturo au tou kana i Pue mewali nodo pampou i pekomi. Nipamanoto babehiami mewali nodo badu besi au motabungi watami.

¹⁵Hangangaa masilolonga peamokau mopahawe Ngkora Marasa au mopahintuwu tauna hai Pue Ala, iti mewali nodo kandupami.

¹⁶Hai hangangaa mepoinalai liliukau i Pue Ala. Pepoinalaimi iti mewali labami. Anti pepoinalaimi, peisakau mohungki hinangka mata pana au napatotoiakau Datu Tokadake.

¹⁷Hangangaa niharunga katehoremami au hangko i Pue Ala. Katehorema iti mewali nodo songko besi au mopakarohokau bona mantahakau. Hai hangangaa nipopobundu Ngkorana Pue Ala nodo piho au naweike Inao Malelaha.

¹⁸Hai i lalu pombealami moewa Datu Tokadake, mekakaekau hai merapi tulungi liliukau i Pue Ala. I hinangkana, mekakaekau moula peninina Inao Malelaha. Ineekau oha-oha mekakae hai hangangaa nipekakaea liliuhe ope-ope tauna au mepoinalai i Pue Yesu.

¹⁹Hai nipekakaea worina bona i tempoku mololita, Pue Ala moweina lolita au manoto bona datina langa mopahawe Ngkora Marasa au tewuniangi hangkoia.

²⁰Anti pobambaringku Ngkora Marasa iti, ide-ide ratarungguna. Mewali, nipekakaea wongkoia bona bai peana mopahawe Ngkora Marasa moula kahihintotoana.

²¹Mewali bona niisa noumba katuwongku hai pobagongku, kutudu halalunta Tikikus lao mosondakikau bona napahaweakau hinangka apa au mewali inde. Tikikus iti, iami halalunta hampepepoinalai au tapokaahi, hai au mampopolumao liliu bagona Pue Ala i lalu kamatundu.

²²Ido hai kutudumi lao irikamu nauliangaakau kanoumbaki inde bona tepalindo lalumi.

²³Halalungku hampepepoinalai! Kuharunga Pue Ala Umanta hai Pue Yesu Kerisitu ina moweikau roa ngkatuwo. Hai kuharunga wori bona Pue Ala ina motambai liliu ahimi hai pepoinalaimi.

²⁴Pue mowati ope-ope tauna au mampokakaia Amputa Yesu Kerisitu hai ahi au bara ara kahopoana. Hangko iriko PAULU