Read Napu Pilipi 2 Bible Online

Pilipi 2 - Napu bible

Pilipi 2

¹Mewali halalu, anti pohintuwumi hai Kerisitu maroho lalumi. Tepalindo lalumi lawi napokaahikau Kerisitu. Naporangai liliukau Inao Malelaha, hai mombepokaahi worikau hadua hai hadua.

²Ido hai kuperapi bona nipamatana mpuu lalungku: hangangaa mohintuwukau hadua hai hadua, mombepokaahi mpuukau, nipahangau-ngau lalumi, hai nipahimbela tunggaiami.

³Ineekau mopaioru peundeami haduduami, ineekau mampemahile. Agina mengkaiwoike hadua hai hadua, hai hangangaa taimba ranganta melumbu hangko irikita.

⁴Inee peake mampekiri watanta haduduanta, hangangaa mampekiri worike katuwonda ranganta.

⁵Poantita hangangaa nodo poantina Kerisitu Yesu.

⁶KatuwoNa, himbela hai Pue Ala, nauri nodo, katuwoNa au himbela hai Pue Ala, bara Napolai.

⁷Agaiana hinangkana iti Nakabaha, hai tuwo himbela hai hawi. Ia mewali himbela hai manusia, hai katuwoNa himbela hai katuwo manusia.

⁸I tempona tuwo mewali manusia i wongko dunia ide, ia mengkaiwoi hai moula hawana Pue Ala, duuna mate rapaku i kau mombehape hihimbela hai tauna au kadake.

⁹Ido hai naangkami Pue Ala i pohudaa au meawa, hai Nawei kuasa au melumbu hangko i ope-ope kuasa au ara,

¹⁰bona ope-ope au tuwo ina mengkoru i Yesu, maroa au i suruga, maroa au i dunia, maroa au i paidaa tomate; ope-opehe ina molingkudu menomba Iria,

¹¹hai mopangaku: “Yesu Kerisitu iami Pue,” alana Pue Ala Umanta rapomahile.

¹²Mewali, halalu au kupokaahi, noumba kanipeulainami hawangku tangangku mani ara hihimbela hai ikamu, hangangaa melumbu mani ide-ide i tempoku karao hangko irikamu. Kuperapi bona nipamaroa-roa babehiami hintoto hai babehia tauna au nahorema Pue Ala hangko i huku dosanda. Mengkorukau i Pue Ala, hai hangangaa langakau mobabehi apa au kadake.

¹³Lawi Pue Ala au mampopokale lalumi pane niunde moula peundeaNa, hai Ia au moweikau karoho moula peundeaNa.

¹⁴I paka-pakana au nibabehi, ineekau mohume-hume ba mombembehehe,

¹⁵bona tongawa i ope-ope tauna ikamu ananakau Pue Ala, bara ara kamasalami, malelaha tuwomi hai bara ara tunggaiami au kadake. Nodo betue au mewangka mosimbaki kamakaindi, nodo worikau ikamu au maida i olonda tauna au motengko babehianda hai au kadake lalunda,

¹⁶i lalu pobambarimi Ngkora Marasa au mopaara katuwo maroa. Mewali halalu, ane nodo liliu babehiami, ina matana lalungku i kahawena hule Kerisitu, lawi babehiami iti ina mopakanoto kadana mbero-mbero pobagongku i olomi; ara mpuu wuana.

¹⁷Halalu, i kakubambariami Ngkora Marasa hangkoia, mewalimokau mepoinalai i Pue Yesu, hai mopaisarekau katuwomi Iria bona moulakau peundeaNa. Mewali, kehapirina rahuku mate anti pobagongku mopahaweakau Ngkora Marasa, bara kupousulia. Batena kuuli liliu ngkaia kamaroana i Pue Ala, hai matanana hihimbela hai ikamu.

¹⁸Kuharunga bona ina matana worikau hihimbela hai iko.

¹⁹Ane napokana Pue Yesu, ara tunggaiaku motudu Timotiu lao mosondakikau bona ane mesule mai, ina tepalindona mohadi bambarimi.

²⁰I olonda tauna au arahe inde, batena pea Timotiu au hampepekiri hai iko, hai au tou-tou mpuu mampeinao bona molambikau roa ngkatuwo.

²¹Ane au ntantaninahe, mampekiri peahe watanda haduduanda, barahe mampekiri peundeana Yesu Kerisitu.

²²Agaiana Timotiu, niisami kamantahana i lalu pobagona, lawi ia mobagomi hihimbela hai iko mopahawe Ngkora Marasa nodo hadua anangkoi modurei umana.

²³Mewali, ane kuisami noumba kabotuana kara-karangku, ia ina kutudu lao mosondakikau.

²⁴Hai kuharunga anti petulungina Pue, barapi mahae ina lao worina mosondakikau.

²⁵Ane halalunta Epafroditus, au mahaemi nitudu mai modureina, kutudumi mesule irikamu. Ikami rodua, nodongkai tauna au hihimbela lao mombeala, lawi hampopobagongkai i lalu bagona Pue, hai natulungimona i lalu kaparingku.

²⁶Ia kutudu mesule, lawi mabilami irikamu hai masusa laluna lawi au liu nihadi kamahaina.

²⁷Tou mpuu au liu rumihi kamahaina, kematemi. Agaiana kahopoana maoha lawi napokaahi Pue Ala. Bara pea ia au napokaahi Pue Ala, iko wori au Napokaahi, lawi ane Epafroditus mate, ina tetambai kamasusana lalungku.

²⁸Idomi pongkana hai kutudumi mesule hoholiga lao irikamu bona ane mohidupamokau hai ia, ina tepalindokau hai tindami lalungku.

²⁹Mewali, hangangaa nidoko i katana lalumi nodo au nibabehi i ope-ope halalunta hampepepoinalai. Nibila wori ope-ope tauna au himbela poantinda hai ia.

³⁰Anti pobagona i Kerisitu, ina naanti matemi. Ia barapi mampekiri watana haduduana, lawi nipeinao mpuu motulungina inde. Ia mewalimi pahurumi, lawi barakau tepaka mai modureina.