Read Napu Pilipi 3 Bible Online

Pilipi 3 - Napu bible

Pilipi 3

¹Mewali halalu, hangangaa matanakau, lawi mohintuwumokau hai Pue. Bara kupomapari mohuleki apa au kuuki hangkoia, lawi kupeinao bona mepoinalai liliukau i paturo au tou.

²Mainga-ingakau i tauna au moanti paturo au kadake. Babehianda nodo dike. Tauna iti mopari-pari bona ratilekau moula Aturana Musa, lawi moula paturonda, itimi au mopamanotoke i peitana Pue Ala.

³Katouana ikitami au manoto i peitana Pue Ala lawi menombake Iria moula peninina Inaona haduduaNa, hai matana mpuu lalunta anti pohintuwuta hai Kerisitu Yesu. Barake moharunga ada au raita pea i raoa bona mewalike manoto i peitana Pue Ala.

⁴Ane kekuunde, peisa worina mampoinalai ada iti. Ane ara tauna au mouli rumihi poulanda ada au raita pea i raoa, pelumbunami iko!

⁵I kaualuna alona tinuwungku, ratilemona moula Aturana Musa. Iko to Ibarani[1] mpuuna, pemuleanana to Isaraeli hangko i tina Benami. Hangko damanina mepoinalai i Pue Yesu, kupeulaimi Aturana Musa moula pepaturonda toParisi.

⁶I tempo iti mampeulai mpuuna agama Yahudi, duuna kupari-pari mampopeahi-ahi tauna au mepoinalai i Yesu. Kupeulai hinangka parenta au teuki i lalu Aturana Musa, bara ara tauna au peisa molambi kamasalangku.

⁷Hangkoia ope-ope iti kuimba pewati iriko. Agaiana ide-ide kuimba mepakarugi pea, lawi batena pea Kerisitu au kuharunga.

⁸Hai bara pea ido, ide-ide kuisami: hinangkana iti bara ara bunduna iriko, lawi ara au melumbu kamaroana, iami pohintuwuku hai Kerisitu Yesu Ampuku. Ido hai kukabahami ope-ope au ntanina, kuimba pea pupu bona meulana i Kerisitu,

⁹hai mohintuwuna hai Ia. Pue Ala moimbana manoto i peitaNa, bara anti peulangku i Aturana Musa, agaiana anti pepoinalaingku i Kerisitu. Mewalina manoto i peitana Pue Ala anti kabulana laluNa, lawi mepoinalaina i Kerisitu.

¹⁰Kupeinao moisa ntepuu Kerisitu i lalu katuwongku, bona mohadiana kuasaNa i lalu katuwongku, iami kuasa au mopatuwo hule Yesu hangko i kapate. Kupeinao molambi kapari hai kapate, nodo au Nahumba Yesu,

¹¹hai kuharunga ina rapatuwo hule worina hangko i kapate.

¹²Halalu, bara kuuli kuisa mpuumi Kerisitu, ba kuuli malelahami tuwongku. Bara wongkoia. Agaiana kupari-pari bona mewalina himbela hai Ia, lawi nodomi tunggaiana Kerisitu Yesu au mokakiona mewali taunaNa.

¹³Halalungku ope-ope, mangakuna: bara mani malelaha tuwongku; ara mani dosangku. Agaiana ara hampaka au kubabehi: naliumi inaongku ope-ope au i taleungku, hai kupari-pari monontohi apa au ara i lindoku.

¹⁴Iko nodona hadua tauna au momberiri melangka: barapi kupembalilingi apa au i taleungku, melangka liliuna monontohi au kutunggai. Kupari-pari moula peundeana Pue Ala bona molambina parasee penangi au naweina Pue Ala i suruga, ido hai pane Nakakiona mohintuwu hai Kerisitu Yesu.

¹⁵Mewali, ikita au manoto peulanta i Pue, hangangaa hampepekirike mobabehi nodo au kuuli inona. Agaiana ane arakau au bara himbela pekirimi, Pue Ala batena ina mopakanotoakau paturo au tou.

¹⁶Ide paraluu ntepuu: hangangaa tuwoke moula apa au taisami hawe ide-ide.

¹⁷Halalungku ope-ope, kuperapi bona nipeulai babehiangku. Tangangki hihimbela hai ikamu, kipopaitaamokau babehia au maroa. Hangangaa mampopandirikau tuwonda tauna au moula babehiangki.

¹⁸Lawi apa au paka kuuliangaakau, iti wori au kuuliangaa mbulikau ide-ide i lalu poteriangku: arahe bosa tauna au manguli katoSaraninda, agaiana kadake babehianda hai mosapuakahe tunggaiana kapatena Kerisitu i kau mombehape.

¹⁹Tauna au nodo batenda molambi pehuku i lalu naraka. Mampenombaihe peundeana watanda haduduanda. Mampomahilehe babehianda au mepakaea. Mopaioruhe katuwonda i dunia ide.

²⁰Agaiana halalu, ikita ampu surugake. Hai hangko indora mai, tapegia kahawena Amputa Yesu Kerisitu. Ia au mohoremake hangko i huku dosanta,

²¹hai Ia ina mobaliki watanta au meahi-ahi ide duuna himbela hai wataNa au meawa ntepuu. Ope-ope iti, Nababehi moula kuasaNa au peisa mampopengkoru hinangkana Iria.