Read Napu Pilipi 4 Bible Online

Pilipi 4 - Napu bible

Pilipi 4

¹Mewali halalu au kupokaahi hai au kukabilai: nipakaroho pepoinalaimi i Pue. Ikamumi au kupomahile hai au kupokatana lalu.

²Halalungku Euodia hai Sintike! Kuperapi bona hintuwukau nodo au hintoto i tauna au mepoinalai i Pue.

³Hai kuperapi irikamu rangangku hampopobago (Sunsugos) au tetida lalumi, nitulungi wohiraia towawine au rodua iti bona ineehe mosisala. Tangangku mani hihimbela hai ikamu, madotahe mamporangaina mopahawe Ngkora Marasa hihimbela hai Klemens hai rangangku au ntanina au hampopobago. Hanganda ope haha teuki i lalu Sura Ngkatuwo.

⁴Halalu, hangangaa matana-tana liliukau i lalu pohintuwumi hai Pue. Hambela mani kuuli: hangangaa matana-tanakau.

⁵Kuharunga ope-ope tauna ina moita kamaroana lalumi. Nikatuinao, barapi mahae Pue ina hawemi.

⁶Inee karao inaomi kana i apa pea. I paka-pakana mekakae liliukau, merapikau i Pue Ala, hai niuli ngkaia kamaroana Iria.

⁷Mewali Pue Ala ina mopatinda lalumi anti pohintuwumi hai Kerisitu Yesu. Hai ane Ia mopatinda lalumi, barapokau ina langa, lawi kuasaNa melumbu hangko i ope-ope au peisa tapekiri.

⁸Kahopoana halalu, kuperapi bona nipailalu liliu hinangkana au maroa hai au hintoto ratoia. Apa au tou, apa au hintoto rabila, apa au manoto, apa au malelaha, apa au merae, hai apa au teadai, itimi au hangangaa nipailalu.

⁹Apa au nipegurui hangko iriko, maroa paturongku au nihadi hai au nidoko, maroa babehiangku au niita, itimi au hangangaa nibabehi. Ane nodo nibabehi, Pue Ala ina mamporangaikau hai mopatinda lalumi.

¹⁰Matana mpuu lalungku halalu, hai motoiana Pue, lawi nauri mahaemona bara mohadi bambari hangko irikamu, agaiana ide-ide nipopakatuana petulungimi. (Barari kuuli barapona nikatuinao agaiana kadanari ara katepakami motulungina.)

¹¹Tunggaiaku manguli nodo bara anti kamakurangku, lawi biasamona mampokatana apa au ara iriko.

¹²Peisana tuwo i anu-anu au haodi pea, peisa worina tuwo i anu-anu au ngkaia. Nauri apa pea au morumpana, kupamatana liliu lalungku maroa i tempo buhu, ba i tempo rimi, ngkaia ba haodi.

¹³Kubuku molindo hinangka au merumpa, lawi Kerisitu mopakaroho lalungku.

¹⁴Nauri nodo, maroa mpuu lalumi lawi nitulungimona tangangku i lalu kapari.

¹⁵Halalungku to Pilipi, niisami, hangkoia mopahawena Ngkora Marasa i boeami, hai i kapadungku hangko i tampo Makedonia, bara ara jumaa i boea ntanina au motulungina. Batena pea ikamu au motulungina i tempo iti.

¹⁶Agaiana bara ido pea, i kamakurangku i tempoku mani i wanua Tesalonika, bahangkiami belangku nipopakatua apa au kuparaluu.

¹⁷Kuuli nodo, bara anti kamampeinaongku mbuli molambi kabula lalumi. Agaiana peundeaku bona hangko i kamaroana lalumi, katetetambaia pewatina Pue Ala irikamu.

¹⁸Mewali bona niisa: ope-ope au nipakatu, kulambimi hangko i Epafroditus. Pakatumi iti bara pea handa, agaiana melabitori hangko i apa au kuparaluu. Kabula lalumi iti nodo anu-anu mawongi au nipopenomba i Pue Ala. Popenombami iti Napokana mpuu, hai matana laluNa modoko.

¹⁹Pue Ala au kupenombai ina mopabukei hinangka au niparaluu, moula peawaNa au mahile ntepuu, lawi mohintuwumokau hai Kerisitu Yesu.

²⁰Tetoiami Pue Ala Umanta hawe i hae-haena! Amin.

²¹Nipahaweana tabeangku i ope-ope tauna au mepoinalai i Kerisitu Yesu au arahe inditi. Nidoko wori tabea hangko i halalumi hampepepoinalai au arahe hihimbela hai iko inde.

²²Ope-ope to Sarani i wanua ide, pelumbunami au arahe i souna Kaisar, mopakatu worihe tabeanda irikamu, halalu.

²³Kuharunga Amputa Yesu Kerisitu mowatikau ope-ope. Hangko iriko PAULU