Read Napu Kolose 2 Bible Online

Kolose 2 - Napu bible

Kolose 2

¹Kupeinao bona niisa noumba kakupari-parina bago ide irikamu au bara manina niisa, tepesua ikamu au i wanua Kolose hai au ara i wanua Laodikia.

²Tunggaiaku bona maroho lalumi hai mombepokaahikau, alana mohintuwukau hadua hai hadua. Peundeaku bona tongawa i lalumi tunggaiana Pue Ala au tewuniangi hangkoia hai bara bata-bata lalumi; tunggaiaNa iti bona moisakau Kerisitu.

³Lawi Kerisitumi au mopakanoto lalunta bona moisake ope-ope tunggaiana Pue Ala irikita.

⁴Ope-ope ide kuuliangaakau datikau rapakanawo tauna au moakalangikau hai lolita au momi.

⁵Lawi nauri karaona hangko irikamu, agaiana aratokau i lalungku. Matana mpuuna mohadi kamarohona pohintuwumi hai pepoinalaimi i Kerisitu.

⁶Ido hai, halalu, anti kanidokonami Kerisitu Yesu mewali Ampumi, babehiami alo-alona hangangaa moula peundeaNa, lawi mohintuwumokau hai Ia.

⁷Mewali, hangangaa nipakaroho hai nipatetida lalumi Iria. Nipakaroho pepoinalaimi, nodo au rapaturoamokau. Hai niuli liliu ngkaia kamaroana i Pue Ala.

⁸Maroa-roakau bona dati ara tauna au mopawulikau hai mopari-parikau meula i paturo agama au sala hai au bara mobundu. Lawi paturonda iti iami paturo au mesupa pea hangko i pekiri manusia hai rapaturokau moula ada hai atura au mokanai pea dunia ide. Paturonda iti mosisala hai paturo au tou au mampopatoa Kerisitu,

⁹lawi i Kerisitu au mewalimi manusia tahumba ope-ope kuasana hai poantina Pue Ala au bara ara kamakurana.

¹⁰Mewali, ane mohintuwumokau hai Kerisitu, barapi ara kamakurami, lawi ope-ope au ara i Kerisitu ara wori irikamu, hai Ia au meliu kuasaNa hangko i ope-ope au makuasa hai au moparenta.

¹¹Anti pohintuwumimi hai Kerisitu, himbela pea ratilemokau. Karatilemi iti, bara petile au napobago manusia, agaiana petile au napobago Kerisitu i lalumi. Lempona, Nakabahamokau hangko i kuasa dosa.

¹²I tempomi rariu i lalu hangana Kerisitu, himbela pea matemokau, hai ratawumokau hihimbela hai Kerisitu, lawi nikabahami katuwomi hai babehiami au hangkoia. Hai i lalu karariumi iti, rapatuwo hule worimokau hihimbela hai Ia, lawi molambimokau katuwo au wou anti pepoinalaimi i kuasana Pue Ala au mopatuwo hule Yesu hangko i kapate.

¹³Hangkoia hangko damanikau mepoinalai i Kerisitu, nodo manikau tauna au mate, lawi moliungikau hawana Pue Ala, hai barakau ratile. Agaiana nauri hangkoia nodokau tauna au mate, ide-ide anti pohintuwumi hai Kerisitu, Napatuwo hulemokau hihimbela hai Kerisitu, hai Naampungimi ope-ope dosami.

¹⁴Anti kapatena Yesu i kau mombehape, Pue Ala mogewomi ope-ope dosanta au teukimi, hai Nakabahamoke hangko i atura-atura au ina moantike i pehuku.

¹⁵I kapatena Kerisitu i kau mombehape, Pue Ala monangimi ope-ope tokadake hai ope-ope au makuasa bona kaNananginda tongawa i humalele dunia.

¹⁶Halalu, arahe tauna au rapeinao mopari-parikau moula ada agamanda. Rasalaikau lawi barakau mampeulai palianda kana i paande hai i paenu. Rasalai worikau lawi barakau moula ada alo mahile agama Yahudi, nodo alo mahile wula wou hai palia mobago i Alo Pengkarooangaa. Ineekau mampeulai paturonda kana i atura iti.

¹⁷Pue Ala moweike atura iti hangkoia mewali pandiri irikita kana i apa au ina mewali, hai ope-ope atura iti napabukeimi Kerisitu.

¹⁸Mewali, ineekau hawe rapakanawo tauna iti. Mengka-mengkahe mengkaiwoi hai menombahe i malaeka. Rauli kapandenda iti hangko i apa au natudungiahe malaeka. Paturonda iti mesuwu hangko i lalunda haduduanda au mokanai pea dunia ide. Ineehe nipogiangaa tauna iti mosalaikau.

¹⁹Tauna iti barapohe mohintuwu hai Kerisitu. Kerisitu peisa rapandiri nodo waa hai ikita ope-ope au mepoinalai Iria rapandiri wataNa. Waa mokuasai ope-ope wata. Nodo wori Kerisitu, Ia au moteteke hai au mopahintuwuke bona kamaroho-rohoa peulanta Iria hintoto hai peundeana Pue Ala.

²⁰Ikita au mepoinalai i Kerisitu himbela pea matemoke hai Kerisitu, lawi anti pohintuwuta hai Ia, tekabahamoke hangko i ada hai atura-atura iti. Barapoke mampeulai ada hai atura iti bona mewalike manoto i peitana Pue Ala. Mewali, ane matemoke hihimbela hai Kerisitu, ineemokau mengkoru i atura au ngkaia pakana iti, nodo tauna au bara mani moisa Kerisitu.

²¹Inee nipeulai atura au manguli, “Inee nitobo ide!” “Inee niande iti!” “Ineekau moiho ide hai iti!”

²²Atura au nodo bara moanti katuwo maroa irikita, lawi atura iti kana pea i paande hai anu-anu au peisa ope; hampalai pea rapake. Atura iti mesuwu hangko i hawa hai paturo manusia.

²³I peitana tauna, atura iti maroa, lawi tauna au moula atura iti, moagamahe, mengkaiwoihe, hai mampopeahi-ahihe watanda moula ada agamanda. Agaiana atura iti bara mobundu, lawi bara peisa motulungi morempeki peundeana lalunta au kadake.