Read Napu Kolose 3 Bible Online

Kolose 3 - Napu bible

Kolose 3

¹Ikamu nodokau tauna au rapatuwo hule hangko i kapate hihimbela hai Kerisitu. Ido hai hangangaa mohaokikau apa au ara i suruga, iumba Kerisitu ara, mohuda ntanda i koanana Pue Ala.

²Lempona, hangangaa nipekiri katuwomi au mohintuwu hai Kerisitu i suruga. Inee peakau mampekiri katuwomi au i dunia ide.

³Lawi ikita matemoke hihimbela hai Ia.[2] Hai mohumbake katuwo au wou hangko i Kerisitu, au maida hihimbela hai Pue Ala i suruga. Kerisitu au moweike katuwo au wou. Ide-ide, bara mani taita, agaiana ane hawe hule deade, Ia ina motudungiake kuasaNa hai peawana tuwoNa. Hai ikita halalu, ina rapomahile worike hihimbela hai Ia.

⁵Mewali, anti kamatenta hihimbela hai Kerisitu, hangangaa takabaha babehianta hai katuwonta au hangkoia. Ineekau motambi-tambi dele, ineekau mobabehi babehia au merikai. Ineekau mohaoki au kadake, ineekau mampokaelu anu-anuna rangami. Lawi hema au mobabehi iti, himbela hai tauna au menomba i anitu.

⁶Ope-ope babehia itimi au mopaara karumpuna Pue Ala i tauna au moliungi hawana.

⁷Hangkoia, hangko damanikau mengkoru i Pue Ala, manoto nodo wori babehiami.

⁸Agaiana ide-ide, hangangaa nikabaha ope-ope babehia kadake iti, nodo: karumpu kahengke pekahihi poanti-anti lolita au bara tou kana i tauna ntanina, petatarahu.

⁹Inee worikau modongko i rangami. Ineemokau mobabehi nodo, lawi nikabahami ope-ope babehiami hangkoia au nodo,

¹⁰hai ide-ide mohumbamoke katuwo au wou, lawi napopewalimoke Pue Ala manusia au wou. Ia mowouki liliu lalunta bona mampeulaike babehiaNa, hai bona moisake apa au tou kana Iria.

¹¹Mewali, anti kaNapopewalintami manusia au wou, barapi ara pontaniana to Yahudi hai au barahe to Yahudi, lawi i peitana Pue Ala, tauna au ratile hai au bara ratile himbela pea. Ia bara mampopontani tauna au mosikola hai au bara mosikola, tuana ba hawi. Kerisitu iami au tepaioru. Ia au tuwo i lalunta ope-ope.

¹²Pue Ala mampokaahikau hai mopileimokau mewali kiraNa au malelaha. Idomi hai: hangangaa mombetulungikau, hangangaa maroa lalumi hadua hai hadua, mengkaiwoikau, nipamaalusu poantimi, hai sabarakau.

¹³Hangangaa sabarakau i poantinda hangka rangami. Niampungi rangami au masala irikamu. Nodo Pue moampungi salanta, ikita wori hangangaa moampungike ranganta au masala irikita.

¹⁴Au paraluu ntepuu, hangangaa mombepokaahikau, lawi ane nibabehi nodo, ina hintuwukau hai bara ara kamakurami.

¹⁵Pue Ala mokakiokau hai Napopewalikau hawata-wata anti pohintuwumi hai Kerisitu. Mewali, nipakaroho liliu kahintuwumi au hangko i Kerisitu. Hai niuli liliu ngkaia kamaroana i Pue Ala.

¹⁶Hangangaa nipailalu liliu Ngkorana Kerisitu. Mombepakaroho mpolalumokau hai mombepaturokau moula sukana kanotona lalumi. Mampolingakau nani petoia, hai nani pepomahile, hai nani ntanina au naweikau Inao Malelaha. Hangko i lalumi mpuu, monanikau manguli ngkaia kamaroana i Pue Ala.

¹⁷Apa pea au nibabehi ba au nipololita, hangangaa nibabehi hai nipololita hintoto hai poanti tauna au meula i Pue Yesu. Hai niuli ngkaia kamaroana i Pue Ala Umanta i lalu hangana Pue Yesu.

¹⁸Ikamu towawine, hangangaa mengkorukau i tobalilomi, lawi itimi au hintoto i tauna au meula i Pue.

¹⁹Hai ikamu wori tobalilo, hangangaa mampokaahikau towawinemi. Ineekau makasara irihira.

²⁰Ikamu anangkoi, hangangaa mengkorukau i tosaemi i lalu paka-pakana, lawi itimi peundeana Pue Ala.

²¹Hai ikamu torapouma, ineekau mobelai lalunda anami bona dati masusa lalunda.

²²Halalu au mewalikau hawi, nipeulai liliu ope-ope hawana ampumi au i dunia ide. Ineekau mampeulai hawanda i lindonda pea, anti kamampeinaomi ratoia. Agaiana hangangaa mengkorukau i hawanda hangko i kabulana lalumi, lawi mengkorukau i Pue.

²³Bago apa pea au ratuduakau, nipobago mpuu hangko i lalumi. Nipopolumao bago iti nodokau mobago i Pue, bara pea i manusia.

²⁴Hai nipailalu lolita ide: Pue ina moweikau saromi moula apa au Nadandimi i ope-ope taunaNa. Kerisitu iami Ampumi, hai ikamu hawiNakau.

²⁵Hema pea au mobabehi dake ina mohumba wori hurungina au kadake, lawi Pue bara mampopontani tauna.