Read Napu Kolose 4 Bible Online

Kolose 4 - Napu bible

Kolose 4

¹Ikamu ampu hawi, niweihe hawimi apa au maroa hai au hintoto, lawi niisa kaarana wori Ampumi i suruga.

²Ineekau oha-oha mekakae, hai i lalu pekakaemi hangangaa mainga-ingakau hai niuli liliu ngkaia kamaroana i Pue Ala.

³Hai nipekakaea woringkai bona nabungkahiangkai Pue Ala rara mopahawe NgkoraNa au mampololita tunggaiaNa au napabukei Kerisitu. Hangkoia tunggaiaNa iti tewuniangi mani, agaiana ide-ide bambari kana i Kerisitu kupahawemi. Ido hai ratarungguna.

⁴Nipekakaea wongkoia bona kubuku mopakanoto bambari kana i Kerisitu moula kahihintotoana.

⁵Ane mampogaloakau tauna au barake hampepepoinalai, hangangaa mapande-pandekau moanti watami bona peisakau mampopobundu katepakami mopahaweahe rara mepoinalai i Pue.

⁶Ane molololitakau hai ihira, nipamaalusu lolitami bona moantikau katuwo maroa irihira. Hai nipekiri maroa apa au nipahaweahe bona niisa mohanai pampekunenda.

⁷Kutudumi halalunta Tikikus lao irikamu bona nauliangaakau apa au mewali iriko inde. Tikikus iti iami halalunta au tapokaahi hai rangangku hampopobago au mampopolumao liliu bagona Pue.

⁸Ia kutudu lao mosondakikau bona niisa noumba katuwongki hai bona maroho lalumi.

⁹Hihimbela hai Tikikus, kutudu worimi Onesimus, halalu hambomboeami au tapokaahi, hai ia tauna au peisa rapoinalai. Ihira rodua ina mouliangaakau ope-ope au mewali inde.

¹⁰Aristarkus, rangangku ratarunggu, mopakatu tabeana irikamu. Markus halaluna Baranaba, mopakatu wori tabeana. (Nikatuinao apa au kuperapi hangkoia bona ane hawe Markus deade, nidoko maroa!)

¹¹Tabeana wori Yesu, au rahanga wori Yustus. Hangko i ope-ope to Yahudi au mepoinalai i Pue Yesu, ihira pea talu ide au mobago hihimbela hai iko mampopolumao bago poparentana Pue Ala hai mopakarohohe lalungku.

¹²Tabea wori hangko i Epafras, hawina Kerisitu Yesu au hambomboeami. Napekakaea liliukau bona maroho peangkami hai manoto pepoinalaimi moula ope-ope peundeana Pue Ala bona datikau masala.

¹³Kusabiki kamadotana i lalu pobagona irikamu au ara i Kolose hawe-hawe wori i halalunta au i Laodikia hai Hierapolis.

¹⁴Tabeana wori Dokter Lukasi au tapokaahi, hai hangko i halalunta Demas.

¹⁵Nipahawea wongkamia tabeangki i halalu hampepepoinalainta au arahe i wanua Laodikia. Tabeangki i Nimpa hai i jumaa au mamingguhe i souna.

¹⁶Ane roomi nibasa sura ide, kuperapi bona nipakatuahe to Sarani i Laodikia bona rabasa wori. Hai surangku au kupakatuahe to Laodikia, nibasa wori.

¹⁷Nipahawe i Arkipus bona hangko i laluna mampopolumao bago au nawei Pue!

¹⁸Tabea hangko iriko, Paulu. Kahopoa sura ide kuuki haduduangku. Nikatuinao wongkoia ide-ide tangangku mani i lalu tarunggu. Pue mowatikau. Hangko iriko PAULU