Read Napu 1 Tesalonika 2 Bible Online

1 Tesalonika 2 - Napu bible

1 Tesalonika 2

¹Halalu-halalu, niisato kadana mpuu mbero-mbero wowengki mosondakikau i boeami.

²Niisami tuntukana halalu! Hangko damaningkai hawe i boeami, rapopeahi-ahingkai hai rakakabosaingkai i wanua Pilipi. Hai nauri raewangkai tauna, Pue Ala mopakaroho lalungki datingkai langa mopaliliu pobagongki mopahaweakau Ngkora Marasa au hangko i Pue Ala.

³Barakau kiwawaha mampeulai paturo au sala. Bara wori ara tunggaiana lalungki au kadake, hai barangkai mampeinao mopakanawo ba hema pea.

⁴Bara woringkai mololita bona mopamatana peangkai lalunda tauna, agaiana mopahawengkai apa au mopamatana laluna Pue Ala, lawi Ia au moparesa lalungki hai Napoinalaimongkai mopahawe Ngkora Marasa.

⁵Bona niisa halalu-halalu, barangkai mopahawe lolita au momi. Bara ara tunggaiaki au kadake bona molambingkai ba apa hangko irikamu. Pue Ala sabingki!

⁶Bara woringkai mampopetoia irikamu ba i tauna ntanina. Katouana, bara sala ane merapingkai ba apa irikamu halalu, lawi ikami ide surona mpuungkai Kerisitu.

⁷Agaiana bara turu inaongki mobabehi nodo. I tempoki hihimbela hai ikamu, maalusu poantiki, nodo hadua ina au mokadipura anana.

⁸Anti kakipokaahimi, matana lalungki mopahaweakau Ngkora Marasa hangko i Pue Ala. Hai bara pea ido, mogalori tuwongki kihuhu bona peisakau kitulungi.

⁹Halalu, manoto nikatuinao mpuu noumba karumihina pobagongki hangkoia. Mabaa ba kaindi mohaoki liliungkai paandeki datikau kipakapari tangangki mopaturoakau Ngkora Marasa au hangko i Pue Ala.

¹⁰Niisa kamanotona babehiangki irikamu au mepoinalai i Pue Yesu. Babehiangki manoto, bara ara kamasalangki. Ikamu au mewali sabingki hihimbela hai Pue Ala.

¹¹Niisami poantiki irikamu ope-ope, nodo hadua uma i anana. Kipakaroho lalumi hai kiweikau lolita,

¹²bona babehiami moula peundeana Pue Ala. Lawi Pue Ala mokakiokau mewali taunaNa i lalu poparentaNa bona molambikau kirami i lalu peawana tuwoNa.

¹³Ara mani hampaka au morua lalungki manguli ngkaia kamaroana i Pue Ala, iami Ngkorana Pue au nihadi hangko irikami, bara nidoko nodo lolita au hangko i manusia pea. Agaiana nidoko hai nipoinalai bambari iti, ami hangko i Pue Ala. Hai ide-ide, Ngkorana Pue Ala iti mokale liliu i lalumi, lawi mepoinalaimokau i Pue Yesu.

¹⁴Kiisa iti halalu, lawi apa au mewali i halalu hampepepoinalai i tampo Yudea mewali wori irikamu. Nodo halalunta hampepepoinalai, ope-ope jumaa i tampo Yudea rapopeahi-ahihe hangka to Yahudinda, ikamu wori rapopeahi-ahikau to hambomboeami.

¹⁵Hangkoia to Yahudi iti mopapatehe nabi-nabi, hai mopapate worimohe Pue Yesu. Ide-ide ikami wori au rapopeahi-ahi. Barahe napokatana Pue Ala, hai mampoiwalimohe ope-ope tauna.

¹⁶Lawi mohomboki liliuhe rarangki bona datingkai mopahawe Ngkora Marasa i tauna au barahe to Yahudi au peisa mohoremahe hangko i dosanda. Mewali, anti ope-ope babehianda au kadake, melumbu mpuumi dosanda, hai molambihe karumpuna Pue Ala.

¹⁷Halalu, hangko i pogaanta au sangka ide, mabila mpuungkai irikamu. Kehapirike mogaa-gaa, agaiana ara liliukau i lalungki. Anti kamabilangki, kihaoki mpuu rara bona laongkai mesonda irikamu.

¹⁸Arami tunggaiaki lao mosondakikau. Iko Paulu, bahangkiami belana kutunggai lao irikamu, agaiana Datu Tokadake mohomboki liliuna.

¹⁹Kipeinao mpuu mosondakikau, lawi ane hawemi Amputa Pue Yesu hai moguluke i lindoNa, ikamumi au mewali wua pobagongki au kipokatana. I tempo iti ina mahile ntepuu kamatanana lalungki anti kaikamuna.

²⁰Batena ikamu au kipomahile hai au kipokatana!