Read Napu 1 Tesalonika 3 Bible Online

1 Tesalonika 3 - Napu bible

1 Tesalonika 3

¹Kahopoana, barapi kibuku motaha kamabilangki. Ido hai kiuli, agina mepegiangkai i wanua Atena, hai halalunta Timotiu kitudu lao irikamu halalungki i Tesalonika. Timotiu iti, rangangki i lalu bagona Pue Ala, lawi ia wori mopahawe Ngkora Marasa kana i Kerisitu. Mewali kitudumi Timotiu lao irikamu, kiuliangaa, “Oiomi au lao mosondakihe halalunta i Tesalonika, hai nupakaroho pepoinalainda.”

³Kiuliangaa nodo bona dati ara hadua au mousuli hangko i pepoinalaina anti kapari au morumpakau. Lawi niisato halalu, kapari au morumpake ide moula tunggaiana Pue Ala.

⁴Tangangki mani hihimbela hai ikamu hangkoia, kiuli amimi kaina rapopeahi-ahinta tauna. Hai ide-ide mewalimi.

⁵Ido hai kutudu Timotiu lao irikamu bona kuisa noumba pepoinalaimi, lawi barapi kubuku motaha kamabilangku. Hai kupokalanga, nakelokau pae Datu Tokadake duuna napakanawokau hai barapi mobundu pobagongki mobambari Ngkora Marasa irikamu.

⁶Mewali, ide-ide, Timotiu mesulemi inde, hai napahaweamongkai bambari au mopamatana lalungki. Nauli, “To Tesalonika iti, maroho mpuu pepoinalainda hai kamaahinda. Mabila worihe irikita, hai ikita ara liliu i lalunda. Nodo katapeinaona mampohidupaahe, ihira wori mampeinao mampohidupaake.”

⁷Kakihadina bambari au naanti Timotiu, tepalindomongkai halalu. Nauri rapopeahi-ahingkai hai molambingkai kapari inde, tepalindo lalungki mohadi kamarohona pepoinalaimi.

⁸Mewali, maroho hulemi buungki, lawi maroho pepoinalaimi i Pue Yesu.

⁹Rumihi kamatanangki anti kaikamuna, halalu. Mewali, apa au peisa kiuli i Pue Ala hangko i ope-ope katana au Naweingkai ide? Bara ara ntanina, batena pea kiuli ngkaia kamaroana i lalu pekakaengki i Pue Ala Umanta.

¹⁰Wengi-wengina hai alo-alona merapingkai i Pue Ala hangko i lalungki bona peisa mbulingkai mosondakikau hai bona kipahandai apa au makura mani i pepoinalaimi.

¹¹I lalu pekakaengki kiuli, “Pue Ala Umangki! Ampuki Pue Yesu! Kiperapi bona Nubungkahiangkai rara bona kibuku mampohidupaahe halalungki i Tesalonika.

¹²Kiperapi bona katetetambaia ahinda, alana mombepokaahi mpuuhe hadua hai hadua, hai mampokaahihe ope-ope tauna, nodo kamaahingki irihira.

¹³Pue, kiperapi bona Nupakaroho lalunda bona malelahahe hai bara ara kamasalanda i lindoMu ane hawe hule Pue Yesu hai ope-ope taunaNa au malelaha. Amin.”