Read Napu 1 Tesalonika 5 Bible Online

1 Tesalonika 5 - Napu bible

1 Tesalonika 5

¹Halalu ope-ope, bara paraluu kiukiakau impira alo kahaweana hule Pue.

²Lawi niisa halalu: alo kahaweana Pue iti ina mai nodo topanangka i tanga kaindi; ope-ope tauna i dunia ina tingkarahe.

³I temponda tauna au barahe moisa Pue Ala manguli, “Maroa mpuu katuwonta, bara ara kalanganta,” unga pea hawe kapari mahile au morumpahe, nodo pantodihana hadua towawine au ina moana. Bara mpuu huba hadua au tekabaha hangko i kapari iti.

⁴Agaiana ikamu, halalu, moisamokau Pue Ala, hai barapokau ara i lalu kamakaindi. Mewali, i alo kahawena hule Pue Yesu, barakau ina tingkara nodo tauna au nasuaki topanangka.

⁵Ikamu ope-ope arakau i lalu kamabaa. Lempona, mobabehikau apa au maroa; barake nodo tauna au ara i lalu kamakaindi.

⁶Mewali, ineeke lera, ineeke leta mposo nodo tauna au bara mani moisa Pue Ala. Mainga-ingake, hai hangangaa tapamanoto pekirinta.

⁷Lawi tauna au ara i lalu kamakaindi, leta peahe, malangu-languhe hai bara manoto pekirinda.

⁸Agaiana ikita ide iamoke tauna au ara i kamabaa; ido hai pekirinta hangangaa manoto. Hangangaa mepoinalai liliuke i Pue Ala hai hangangaa mampokaahike ranganta, hangangaa tapakaroho peharaunganta i kaNahoremanta Pue Ala. Itimi parewa pombeala au ina tapolaba moewa kamakaindi.

⁹Napileike Pue Ala bona barake rahuku, agaiana Napileike bona molambike katuwo maroa i lalu kaNahoremanta Amputa Yesu Kerisitu.

¹⁰Yesu Kerisitu mate mopahuruke bona ane hawe deade, ina tuwoke hihimbela hai Ia. Kehapiri matemoke ba tuwo manike i tempo iti, batenta ina tuwo hihimbela hai Ia.

¹¹Idomi hai halalu, hangangaa mombepaturokau hai mombepakaroho mpolalukau nodo au nibabehi ide-ide.

¹²Halalu, kiperapi bona nibilahe tauna au mobago mantimi i lalu bagona Pue i olomi, lawi ihira napileimohe Pue bona monini hai mopaturokau.

¹³Nibila hai niadaihe, hai nipokaahihe anti pobagonda. Mohintuwukau hadua hai hadua.

¹⁴Halalu, kiperapi bona rangami au lohehe mobago niweihe lolita. Nipalindohe au masusa lalunda. Nipakarohohe au malede pepoinalainda, hai hangangaa sabarakau i ope-ope tauna.

¹⁵Ane ara au mobabehi dake irikita, inee wori tahurungi hai dake. Agina mobabehi liliuke au maroa i ranganta hai i ope-ope tauna.

¹⁶Anti pohintuwuta hai Yesu Kerisitu, hangangaa matana liliuke, mekakae liliuke hai manguli liliu worike ngkaia kamaroana i Pue Ala kehapiri apa au mewali, lawi itimi peundeana Pue Ala irikita.

¹⁹Inee nihomboki pobagona Inao Malelaha.

²⁰Inee bara nipoinalai lolitana Pue Ala au rapahawe tuduaNa.

²¹Niparesa maroa-roa hinangka lolita iti, hai nikingkimi apa au maroa.

²²Nikaraohi ope-ope babehia kadake.

²³Mekakaengkai i Pue Ala au moweike roa ngkatuwo, kiuli, “O, Pue Ala! Kiperapi bona babehianda to Tesalonika Nupamanoto liliu, duuna malelaha ntepuu katuwonda. Nuporangaihe i lalu katuwonda, maroa lalunda ba pekirinda ba watanda bona dati ara kamasalanda i kahaweNa hule Amputa Yesu Kerisitu.” Nodomi pekakaengki.

²⁴Pue Ala au mokakiokau, au ina mopabukei hinangkana iti, lawi Ia madudu.

²⁵Halalu, kiperapi bona nipekakaea woringkai.

²⁶Nipahaweangkai tabeangki hai niuliangaahe kamaahingki i ope-ope halalunta hampepepoinalai.

²⁷I lalu kuasa au naweina Pue Yesu, kuuliangaakau bona sura ide rabasa i lindonda ope-ope halalunta hampepepoinalai au arahe inditi.

²⁸Amputa Yesu Kerisitu mowatikau ope-ope. Hangko iriko PAULU