Read Napu 1 Timotiu 3 Bible Online

1 Timotiu 3 - Napu bible

1 Timotiu 3

¹Tou mpuu lolita au manguli node: tauna au mampeinaohe mewali penatua, mohaokihe bago au maroa.

²Ido hai hadua penatua hangangaa au bara ara kamasalana. Hangangaa hadua pea towawinena, hai hangangaa nabuku morempeki peundeana laluna au kadake. Hangangaa manoto laluna hai maroa adana. Hangangaa matana modoko torarena. Hangangaa naisa mepaturo.

³Bara peisa au malangu-langu ba au paka mobungka-bungka. Hangangaa au maalusu poantina, au mohintuwu hai rangana, hai au bara mohaoki pea doi.

⁴Hangangaa naisa mokadipura maroa tauna au maida i lalu souna, hai anana hangangaa mengkoruhe i tosaenda hai mebilahe.

⁵Lawi ane ara hadua tauna au bara naisa mokadipura tauna i lalu souna, noumbami kanabukuna mokadipura halaluna hampepepoinalai.

⁶Ane ara hadua tauna au hangko mepoinalai i Pue Yesu, ia bara peisa raangka mewali penatua, dati mampemahile, alana molambi pehuku nodo au rahukua Datu Tokadake.

⁷Kaliliuana, hadua tauna au mewali penatua hangangaa au bara wori ara kamasalana i peitanda tauna au barahe to Sarani dati nakelo Datu Tokadake alana manawo hai kahopoana ina rakakabosai tauna.

⁸Tauna au rapilei mewali diaken hangangaa nodo wori poantinda. Hangangaa manoto babehianda hai au hintotohe rabila. Barahe au mobatantimali ba au malangu-langu ba au mohaoki peahe doi.

⁹Hangangaa modoko mpuuhe paturo kana i pepoinalai au napahaweake Pue Ala, hai mampeulaihe paturo iti hangko i kamalelahana lalunda.

¹⁰Ane ara hadua tauna au mampeinao mewali diaken, nipeita hampai babehiana, ane bara masala, hangko peisari raangka mewali diaken.

¹¹Nodo wori towawinenda,[1] hangangaa manoto babehianda hai au hintotohe rabila. Barahe topoanti-anti lolita. Hangangaa raisa morempeki peundeana lalunda au kadake, hai hangangaa rapoinalaihe i paka-pakana.

¹²Hadua au mewali diaken, hangangaa au hadua pea towawinena, hai hangangaa raisa mokadipura maroa ananda hihimbela hai tauna au maida i lalu sounda.

¹³Ane maroa pokingkinda bagona Pue, ina rabilahe tauna, hai ina tetambai kapebainda mampololita kana i pepoinalainda i Kerisitu Yesu.

¹⁴Timotiu, ara mpuu tunggaiaku lao mosondakiko. Nauri nodo, kupakatuako sura ide,

¹⁵bona ane rapana mahae manina pane hawe irio, nuisa babehia au hintoto i ope-ope taunana Pue Ala. Lawi ikita ide, menombake i Pue Ala au tuwo i hae-haena. Ikita au mokingki paturo au tou au hangko i Pue Ala. Maroho mpuu pepoinalainta i paturo iti, hai takampai paturo iti bona dati ara au mobaliki.

¹⁶Maroa ntepuu paturo au tapeulai anti pengkorunta i Pue Ala. Hangkoia paturo iti bara raisa tauna, agaiana ide-ide natudungiamoke Pue Ala. Lawi idemi au tapoinalai kana i Yesu Kerisitu: Iami au mewali manusia,[2] au napakanoto Inao Malelaha, hai au raita malaeka. BambariNa rapahawe i tauna au bara manihe moisa Pue Ala, hai Ia rapoinalai tauna i humalele dunia, hai naore Pue Ala lao i suruga i lalu peawaNa.