Read Napu 1 Timotiu 5 Bible Online

1 Timotiu 5 - Napu bible

1 Timotiu 5

¹Ane mopaturoko hadua tobalilo au matinuwu hangko irio, ineeko makasara. Agina nukambaroa hai lolita au maalusu, nuimba umamu. Nodo wori i anantomoane, nuimbahe halalumu,

²towawine au matinuwu nuimbahe inamu, hai towawine au mangura nuimbahe adimu; nupamaroa mpuu ope-ope babehiamu irihira.

³Ane arahe towawine au bemba, au meahi-ahi mpuu tuwonda, hangangaa tabila hai takadipura wohiraia.

⁴Agaiana ane tobemba au ara anana ba ampuna, anana hai ampuna iti hangangaa nupaturoahe noumba rara mokadipura tosaenda bona mohurungihe kamaroana tosaenda. Lawi iti au mopamatana laluna Pue Ala.

⁵Tobemba au tou-tou mpuu meahi-ahi tuwona, iami tobemba au tuwo sadudua pearai, bara ara au mokadipura. Batena pearai meharunga hai mekakae liliu i Pue Ala.

⁶Agaiana tobemba au mohaoki peahe katana-tana, nuimbamohe mate nauri tuwo manihe, lempona matehe i lalu pepoinalainda.

⁷Nupahawe ope-ope paturongku ide i halalunta hampepepoinalai bona bara masala babehianda.

⁸Lawi ane ara hadua tauna au manguli maroho pepoinalaina i Pue Ala, agaiana bara mokadipura halaluna hai tinana, babehiana iti mosapuaka pepoinalaina. Melumbu kakadakena hangko i tauna au bara mepoinalai i Pue Ala.

⁹Tobemba au peisa rapopesua hanganda i lalu sura poukia hanga-hanga tobemba bona ratulungi hangka topepoinalainda, batena pea tauna au node: tinuwunda bara makura hangko i ini pulona parena hai au hadua pea tobalilona.[3]

¹⁰Hangangaa au manoto babehianda, pandirina: hangkoia mokadipura maroamohe ananda, matanahe modoko torare i sounda, motulungihe halalunda hampepepoinalai, mokadipurahe tauna au i lalu kapari, hai mobabehihe hinangkana bago au maroa.

¹¹Ane tobemba au mangura mani, inee rauki hanganda i lalu sura poukia hanga-hanga tobemba. Lawi ane ara mani peundeana lalunda motambi, batenda ina motambi. Kahopoana masalahe lawi moliungihe dandinda i Kerisitu.

¹³Mewali, ane mangura manihe, inee rauki hanganda i lalu sura poukia hanga-hanga tobemba. Lawi biasana lohehe mampopolumao bagonda au hintoto i lindona Pue, hai mesonda-sonda pea bagonda. Hai bara pea iti, agaiana moanti-anti worihe lolita i ranganda. Raunde peami mampesuaki urusiana ranganda, hai mopahawe liliuhe lolita au bara hintoto rahowara.

¹⁴Ido hai kuuli, tobemba au mangura manihe, agina motambi hulehe, bona moanahe, hai mokadipura maroahe tauna au i lalu sounda dati ara raranda iwalinta mokakabosaike.

¹⁵Lawi ara tobemba au barapohe mampeulai peundeana Kerisitu, mampeulai pearaihe peundeana Datu Tokadake.

¹⁶Ane arahe to Sarani hai ara tinanda au bemba, agina ihira au mokadipurahe datihe mopamantimi jumaa au mokadipurahe tobemba iti. Lawi jumaa hangangaa mokadipura worihe tobemba ntanina au meahi-ahi mpuu tuwonda au barapohe ara mokadipura.

¹⁷Penatua au maroa pobagonda, hintoto mpuuhe rawei peadai au rombela hangko i tauna ntanina, pelumbunami penatua au mepaturo hai au mopahawe Ngkorana Pue.

¹⁸Lawi i lalu Sura Malelaha teuki node: “Ane japi au tangana rapopobago inee raboke humena.”[4] Hai teuki wori: “Topobago hangangaa molambi sarona.”

¹⁹Ane ara hadua penatua au rasalai tauna, inee hoholiga nudoko pesalainda. Ane arami rodua ba talu sabi au mopakanoto katouna kamasalana, hangko peisari nudoko.

²⁰Ane ara mpuu salana, nukambaroa i lindonda jumaa bona au ntanina langahe mampeulai babehiana.

²¹Kuweiko lolita ide Timotiu bona nupeulai mpuu ope-ope hawangku, hai ineeko mampopontani tauna. Pue Ala hai Kerisitu Yesu hai malaekaNa au tepilei mampetiroke.

²²Ineeko hoholiga moangka tauna mewali penatua, nuparesa hampai babehianda bona dati oio au mohuru ane mobabehihe dosa. Maroa-roako bona manoto liliu babehiamu.

²³Inee owai bula pea au nuenu agaiana hangangaa nugalo wori haodi hai anggoro, lawi kuisa doko mahai taimu.

²⁴Arahe tauna, au kehapiri bara mani rapohuda-hudaa kara-karanda, tongawami kamadosanda. Ara worihe tauna au bara mani taisa dosanda. Ane roorai rapohuda-hudaa kara-karanda, hangko taisari.

²⁵Nodo wori, arahe tauna au tongawa kamaroana babehianda. Hai ara worihe tauna au bara raisa ranganda kamaroana babehianda, agaiana i alo au ina mai babehianda au maroa iti ina tongawa.