Read Napu 1 Timotiu 6 Bible Online

1 Timotiu 6 - Napu bible

1 Timotiu 6

¹Halalunta hampepepoinalai au hawi tuwonda, nupaturohe bona mobilahe hai mampeulaihe ampunda i hinangkana dati ara hadua tauna au mopapakoi hangana Pue Ala ba mosapuaka paturonta.

²Ane ampunda iti to Sarani, bara hintoto ane hadua hawi manguli node, “Bara paraluu kupeulai hawana, lawi ia halalungku i lalu hangana Pue.” Agina napamaroari kamampopolumaona bagona ampuna, lawi ampu au napobagoa iti iami halaluna hampepepoinalai au napokaahi. Ope-ope au kuuki ide, hangangaa nupaturoahe tauna bona maroho pepoinalainda.

³Ane arahe au moanti paturo au mosisala hai paturonta, barahe mampoinalai paturo au tou hangko i Amputa, Pue Yesu Kerisitu hai bara worihe mampoinalai lolita au mopaturoke bona mengkoruke i Pue Ala,

⁴tauna iti mengkamapande peahe, moleri baratohe moisa apa-apa. Peundeanda bona mombehehe liliuhe hai mohaoki peahe posisisala i lolita au mopaara kamahina, pobungka-bungka, pekakabosai, pesasalai,

⁵hai pombembehehe. Pekirinda tauna iti barapi maroa, barahe moisa paturo au tou. Rauli, peisahe molambi rasi hangko i poagamanda.

⁶Katouana, poagamanta moanti rasi au mahile, asala apa au ara irikita tapohandaka.

⁷Lawi kahawenta i dunia ide, bara mai ara au taanti. Nodo wori i pesulenta, bara ara au ina taanti mesule.

⁸Mewali, ane arami paandeta hai hampita, handami.

⁹Agaiana tauna au mampeinaohe pebuku, mamurahe tekelo mobabehi dosa lawi teheahe hai peundeana lalunda au kadake. Peundeana lalunda iti bara mobundu, moanti peahe i kahurewu. Kahopoana manawohe i lalu dosa, alana molambi mpuuhe rugi.

¹⁰Lawi ane mampokaelu peamoke doi, itimi au mopaara ngkaia pakana babehia kadake. Arahe tauna au nodo, au mohaoki liliu peahe doi, alana mopalehihe pepoinalainda, hai narumpahe mampopengaa kapari.

¹¹Agaiana oio Timotiu, hawinamoko Pue Ala. Nupakarao tuwomu hangko i ope-ope babehia au nodo. Nupari-pari mampeulai babehia au manoto hai mengkoruko i Pue Ala. Nupakaroho pepoinalaimu i Kerisitu hai kamaahimu i hangka rangamu, mantahako i lalu kapari hai Nupamaalusu poantimu i hangka rangamu.

¹²Nupari-pari bona tuwoko hintoto hai apa au nupoinalai, hai nupakaroho pepoinalaimu au moantiko i katuwo maroa au bara mokahopoa. Lawi itimi tunggaiana Pue Ala mokakioko mewali taunaNa bona molambiko katuwo maroa au bara mokahopoa hai au nupangakumi i lindonda tauna bosa, kamepoinalaimu i Pue Yesu.

¹³Mewali Timotiu, i lindona Pue Ala au mopatuwo hinangkana, hai i lindona Kerisitu Yesu au mopahawe notoNa i Pontiu Pilatu kuuliangaako:

¹⁴hangangaa nupeulai ope-ope hawa ide i karoa-roakana dati ara kamasalamu duuna hawe hule Amputa Yesu Kerisitu

¹⁵i tempo au napakanotomi Pue Ala moula peundeaNa. Batena pea Ia au makuasa hai au hintoto ratoia. Iami Datu hangko i ope-ope datu, Pue hangko i ope-ope pue.

¹⁶Batena pea Ia au bara ina mate. Ia maida i lalu kamabaa au meawa ntepuu. Bara ara hadua au peisa mohungkuki ba moita, lawi Ia bara raita. Batena pea Ia au hintoto rabila hai au hintoto moparenta hawe i hae-haena. Amin.

¹⁷I tauna au pebuku, nupaturohe bona ineehe mampemahile hai ineehe meharunga i anu-anu dunia, lawi anu-anu dunia batena pea marugi. Agina mepoinalaihe i Pue Ala au moweike ope-ope pewati au bara ara hokana. Iami au tapokatana.

¹⁸Nuweihe lolita bona manoto liliu babehianda, maroa lalunda: motulungihe hangka ranganda hai ineehe bohi.

¹⁹Lawi ane nodo babehianda, himbela peahe hai morampu anu-anu au maroa i lalu suruga, hai batena molambihe katuwo au maroa ntepuu.

²⁰Oio Timotiu, napoinalaiamoko Pue Ala moanti paturo au manoto. Mewali, hangangaa nukingki maroa paturo iti dati ara au mobaliki. Karaohi lolita au bara mobundu hai paturo au bara manoto au rauli kapande agaiana bara tou.

²¹Katouana tauna au mampeulai paturo iti, mopalehimohe pepoinalainda. Pue mowatikau ope-ope. Hangko iriko PAULU