Read Napu 2 Timotiu 2 Bible Online

2 Timotiu 2 - Napu bible

2 Timotiu 2

¹Mewali, Timotiu anangku! Nupakaroho mpuu lalumu hai karoho au tahumba hangko i Kerisitu Yesu moula kabulana laluna Pue Ala.

²Ope-ope paturo au nuhadimi hangkoia hangko iriko, i lindonda tauna bosa, hangangaa nupaturoa worihe tauna ntanina au peisahe rapoinalai hai au rabuku mopaguru tauna ntanina.

³Hangangaa masilolonga woriko mohalea kapari nodo iko, anti pobagomu i Kerisitu Yesu. Tauna au mampopolumao bagona Pue peisa rapandiri nodo hadua surodado au hangangaa mampeulai liliu hawana tadulakona. Kehapiri molambi kapari, bara mengkaroo mobago. Hai bara wori mokadipura liliu pea urusiana haduduana, lawi napeinao mopamatana laluna tadulakona.

⁵Nodo wori, tauna au mampopolumao bagona Pue peisa rapandiri nodo hadua tauna au mombebeta i hambua wadi. Ia hangangaa mampeulai atura-atura pombebeta iti, lawi ane bara mampeulai atura iti, manotomi kadana molambi parasee.

⁶Hai tauna au mampopolumao bagona Pue peisa rapandiri nodo hadua topobonde. Ane ia madota mobago, batena ia au nguru-nguruna moande wua tuda-tudana.

⁷Nupailalu paturongku, lawi Pue ina mopakanoto lalumu bona moisako hinangkana.

⁸Hangangaa nukatuinao: Yesu Kerisitu, Datu Topehompo, pemuleana Datu Daudi, au tuwo hule hangko i kapate. Itimi ihi Ngkora Marasa au kibambari.

⁹Anti popahawengku Ngkora Marasa, ido hai narumpana kapari, duuna ratakana inde i lalu tarunggu nodo hadua tauna au kadake. Agaiana Ngkorana Pue Ala bara tetaka.

¹⁰Ido hai kubuku mohalea ope-ope kapari ide bona tauna au napileimohe Pue Ala ina mampehadingi hai mampoinalai Ngkora Marasa iti duunda molambi katehorema hai katuwo meawa au bara mokahopoa anti pohintuwunda hai Kerisitu Yesu.

¹¹Tou mpuu lolita kana i Yesu au manguli node: Ane mateke hihimbela hai Ia, ina tuwo worike hihimbela hai Ia.

¹²Ane sabarake mohalea kapari anti peulanta Iria, ina moparenta worike hihimbela hai Ia. Agaiana ane tasapuaka peulanta Iria, ina Nasapuaka wori kaikitana taunaNa.

¹³Kehapirike bara matundu Iria, Ia ina mopabukei liliu ope-ope dandiNa irikita, lawi nodomi poantiNa au bara peisa tebaliki.

¹⁴Timotiu! Ope-ope au kuuli ide hangangaa nupopaingaahe to sarani au ara inditi. Nuweihe lolita i lindona Pue Ala bona ineehe mampombehanaingi rara mpoagama. Lawi pombehahanai iti bara mobundu i lalu katuwonta, agaiana mopakarugi pea pepoinalainda tauna au mohadi.

¹⁵Agaiana oio Timotiu, mopahaweko paturo au tou i kanoto-notoana. Nupakaroho mpuu pampopolumaomu bago iti; ineeko maea. Ane nubabehi nodo, Pue Ala ina mampokatana bagomu hai Naimbako topobagoNa au maroa.

¹⁶Nukaraohi lolita au bara mobundu. Lawi lolita iti bara moanti tauna i katuwo au malelaha, agaiana kakakaroarihe hangko i Pue Ala.

¹⁷Paturo iti melelehi nodo haki au melangaki. Tauna au moanti paturo iti tepesua Himeneus hai Filetus.

¹⁸Mopahala batakamohe paturo au tou, rauli pearonda tomate liumi. Paturonda au sala iti mopawulimohe bahangkia tauna alana pepoinalainda barapi mobundu.

¹⁹Nauri nodo, Ngkorana Pue Ala batena maroho peangkana. Ngkorana Pue Ala rapandiri nodo haogu watu au bara ina tedua. I lalu Ngkorana Pue Ala teuki node, “Pue moisa hema au Napilei mewali anaNa,” hai, “Hema-hema au mopangaku kaYesuna Ampunda, hangangaa mokabahahe babehianda au kadake.”

²⁰I lalu sou au meawa, ara ngkaia pakana parewa. Ara parewa au rababehi hangko i bulawa hai salaka. Ara wori au rababehi pea hangko i kau ba tampo polo. Au maroa, rapake modoko torare au rabila. Hai au bara maroa, rapake alo-alona.

²¹Mewali, ane mokabahake babehianta au kadake, mewalike nodo parewa au maroa, au rapake modoko torare au rabila. Lempona, mewalike topobago au malelaha hai au mobundu i Pue, hai masilolonga peamoke mampopolumao hinangkana bago au maroa.

²²Timotiu, ido hai kuweiko lolita, bona ineeko mampeulai peundeana lalumu nodo au biasa i tauna au mangura manihe. Nupari-pari mampeulai babehia au naunde Pue. Nupakaroho kamatundumu i Pue hai kamaahimu i hangka rangamu. Mohintuwuko hai ope-ope tauna au mekakaehe i Pue hangko i kabulana lalunda.

²³Arahe tauna au mampombehanaingi liliu paturo au bara mobundu, agaiana bara mani manoto i lalunda paturo au tou. Inee nupesuaki pombehahanainda iti, lawi nuisa paturo iti mopaara pea posisala.

²⁴Hai bara hintoto ane ikita au mewali hawina Pue barake hintuwu hai hangka ranganta. Hangangaa tapamaalusu poantita i ope-ope tauna. Hangangaa mapandeke mepaturo, hai sabarake.

²⁵Ane arahe tauna au moewake, hangangaa takambaroahe hai lolita au maalusu, babila nawei manihe Pue katepaka menoso hangko i peewanda. Lawi ane menosohe, ina moisahe paturo au tou duuna manoto lalunda hai tekabahahe hangko i kuasa Datu Tokadake au mopari-parihe mampeulai peundeana.