Read Napu 2 Timotiu 3 Bible Online

2 Timotiu 3 - Napu bible

2 Timotiu 3

¹Bona nuisa, i alo-alo kahopoana, katuwonta i dunia ina masusa, lawi babehia manusia ina rumihi kakadakena.

²Bosa tauna ina mampokakaia peahe watanda haduduanda, mampeinaohe mewali topebuku, mampopetoiahe, mampemahilehe, hai mokakabosaihe ranganda. Barahe mengkoru i tosaenda, bara raisa manguli ngkaia kamaroana i Pue Ala, hai barahe mobila Pue Ala.

³Barahe maahi, hai bara raisa mohintuwu. Ina mokakabosai liliuhe ranganda, barahe morempeki peundeana watanda, masekehe, hai mokahihihe apa pea au maroa.

⁴Mopakanawohe hangka ranganda, bara kaladu pampekirinda, hai mengkaiwongkohe. Barahe mampeulai peundeana Pue Ala, agaiana mampeulai peahe peundeana lalunda.

⁵Ane i petotokinda ranganda, babehianda mampeulai mpuuhe atura-atura agama nodohe tauna au mengkoru i Pue Ala, moleri mosapuakatohe kuasana Pue Ala au peisa mobaliki lalunda. Tauna au nodo babehianda, ineehe nupogaloa.

⁶Aramohe i olonda au mandii-ndii moanti paturo au sala i sounda ranganda, hai mopakanawohe towawine au malede au ngkaia dosanda hai au nakuasaihe mampopengaa peundeana lalunda.

⁷Raunde mampehadingi liliu paturo, agaiana barahe mongilo kana i paturo au manoto hangko i Pue Ala.

⁸Guru au mepakanawo iti, kadake pekirinda, hai barapi ara pepoinalainda, alana Pue Ala mosapuakahe. Moewahe paturo au tou, nodo Yanes hai Yambres au moewa nabi Musa i tampo Masiri hangkoia.[2]

⁹Yanes hai Yambres iti, bara rabuku moewa kuasana Pue Ala au ara i Musa. Apa au mewali irihira, ina mewali wori i guru au mepakanawo i tempo ide. Bara rabuku moewa paturo au tou, lawi kantulinda batena ina raisa ope-ope tauna.

¹⁰Agaiana oio Timotiu, lawi mahaemoko kuporanga, nuisami paturongku hai babehiangku hai tunggaiana lalungku. Nuita mpuumi pepoinalaingku, kasabarangku, kamaahingku, hai kamantahaku i lalu kapari.

¹¹Nuitami kamantahaku i pepopeahi-ahi hai kapari au morumpana i wanua Antiokia, i Ikonium hai i Listra. Rumihi mpuu kapari iti! Agaiana nakabahana Pue hangko i hinangka kapari iti.

¹²Taisami: ope-ope tauna au meula i Kerisitu Yesu hai au mengkoru i Pue Ala batena ina rapopeahi-ahi.

¹³Agaiana tauna au kadake hai au modongko, ina tetambai kakadakena babehianda. Mopakanawohe ranganda hai paturonda au sala, agaiana tepakanawo worihe.

¹⁴Agaiana oio Timotiu, hangangaa mokingki liliuko paturo au roomoko rapaturoa hai au nupoinalaimi. Hai nuisa katouna paturo iti, lawi nuisa kahemanda au mopaguruko.

¹⁵Hai hangko koi-koi peamoko, nuisami apa au teuki i lalu Sura Malelaha. Sura Malelaha iti au peisa mopakanoto lalunta duuna mepoinalaike i Kerisitu Yesu hai tehoremake hangko i huku dosanta.

¹⁶Ope-ope au teuki i lalu Sura Malelaha, rauki moula popakanotona Pue Ala melempo i Inao Malelaha, hai mobundu irikita bona: taisa mopahawe paturo au tou, moewa paturo au sala, mopakaroa babehia au kadake, hai mopaguru tauna bona manoto babehianda.

¹⁷Sura Malelaha iti moparewaihe ope-ope tauna au mengkoru i Pue Ala bona rabuku mampopolumao hinangka bago au maroa.