Read Napu 2 Timotiu 4 Bible Online

2 Timotiu 4 - Napu bible

2 Timotiu 4

¹Timotiu! Paturongku ide kupahawe hangko i lalungku mpuu. Ane hawe hulemi Pue Yesu i dunia ide, Ia ina moparenta nodo hadua Datu, hai mobotusi kara-karanda ope-ope tauna, maroa au tuwo manihe, maroa au matemohe. Ido hai i lindona Pue Ala hai Kerisitu Yesu kuweiko lolita ide:

²Hangangaa masilolonga peamoko mopahawe Ngkorana Pue Ala i tempo au maroa ba i tempo mapari. Nukambaroahe au moanti paturo au sala, nukontohe au kadake babehianda, hai nupakaroho lalunda bona maroa babehianda. Hangangaa sabara liliuko mopaguruhe.

³Lawi i alo-alo au ina mai, tauna barapi ina raunde mampehadingi paturo au tou. Ina mohaokihe guru-guru au mopaturoahe lolita au mopakatana pea lalunda bona peisahe mampeulai apa peundeana lalunda.

⁴Mengkantulihe ane mohadihe paturo au tou, agaiana paturo au rapapatunda, itiri au raunde rapehadingi.

⁵Timotiu, kuweiko lolita bona nuisa morempeki peundeana lalumu. Mantahako mohalea kapari. Mobambari liliuko Ngkora Marasa, hai nupahopo maroa ope-ope bago au naweimoko Pue.

⁶Kuweiko paturongku ide, lawi kuisa barapona mahae i dunia ide; ina hawemi alongku. Hai ane rapapatena deade, katuwongku ide kupaisare i Pue Ala mewali popenombaku Iria.

⁷Kupeulai maroami rara au napakanotoana Pue. Kupahopomi bagongku. Pepoinalaingku bara tebali hawe i kahopoana.

⁸Mewali ide-ide, tepasilolongami paraseengku i suruga anti penangingku, lawi kupeulaimi peundeana Pue. Paraseengku iti ina naweina Pue, Topebotusi au manoto i alo pebotusi. Hai bara iko pea au ina molambi parasee iti. Agaiana ina rawei worihe ope-ope tauna au hangko i lalunda mampegia kahaweNa hule Pue.

⁹Timotiu, kuperapi bona maina nusondaki holiga.

¹⁰Lawi ina barapi ara au mamporangaina inde. Napalehimona Demas, lawi laomi i Tesalonika mohaoki katuwona i dunia ide. Kreskes, lao i Galatia. Titu lao i Dalmatia.

¹¹Batena pearai Lukasi au hihimbela hai iko. Ane maiko, moropoliuko mai Markus nuporanga, lawi ia peisa motulungina i lalu bagongku.

¹²Tikikus inditi houmi kutudu lao i Epesu.

¹³Kuperapi wori bona nuantiana mai badu makumbaku au kupalehi i wanua Troas i souna Karpus. Nuantia worina mai sura-surangku au inditi, pelumbuna sura au rababehi hangko i koli.

¹⁴Mainga-ingako i Aleksander, topobabehi parewa hangko i tambaga, lawi Ia au moewa mpuuke bona dati ara tauna au mampoinalai paturonta. Ngkaia babehiana au kadake iriko. Babehiana iti ina nahurungi Pue.

¹⁶Nguru-nguruna kara-karangku rapohuda-hudaa hangkoia, bara mpuu ara hadua au motulungina. Ope-opehe mopalehina. Mekakaena i Pue dati Nahurungi babehianda iti.

¹⁷Nauri bara ara rangangku au mamporangaina, agaiana naporangai liliuna Pue. Naweina karoho mopahopo bagongku mopahawe Ngkora Marasa bona ope-ope tauna au barahe to Yahudi peisahe mohadi bambari iti. Kahopoana, tekabahana hangko i kapate.

¹⁸Hai ide-ide batengku nakabaha Pue hangko i ope-ope au kadake, hai Naantina mesua i lalu poparentaNa i suruga au bara ara kamakurana. Tapomahilemi hangaNa hawe i hae-haena. Amin!

¹⁹Nupahawe tabeangku i Priska hai Akwila, hai i Onesiporus hantambi.

²⁰Erastus, ara mani i wanua Korintu. Tropimus, kupalehi tangana mahai i Miletus.

²¹Nupari-pari mai hangko damani hawe tempo makuli! Tabeanda wori Ebulus, Pudes, Linus hai Klaudia, hai hangko i ope-ope halalunta hampepepoinalai au arahe inde.

²²Kuharunga naporangaiko Pue. Hai Pue mowatikau ope-ope. Hangko iriko PAULU