Read Napu Titu 2 Bible Online

Titu 2 - Napu bible

Titu 2

¹Agaiana oio Titu, hangangaa mepaturoko hai paturo au tou.

²Ane tobalilo au saemohe, hangangaa nupaturohe bona rabuku morempeki peundeana lalunda, bona manoto lalunda hai hintotohe mewali tosae au rabila. Pepoinalainda i Pue Yesu hangangaa maroho mpuu. Hangangaa maahihe i ranganda hangko i lalunda, hai hangangaa mantahahe i lalu kapari.

³Nodo wori towawine au saemohe, nupaturohe bona babehianda hintoto hai tauna au mengkoru i Pue Ala; ineehe manguli au bara tou kana i ranganda, hai ineehe paka maenu-enu. Hangangaa mopaguru liliuhe ranganda bona maroa babehianda.

⁴Ane nodo babehianda, towawine au sae iti peisamohe mopaguru towawine au mangura manihe bona raisa wori mampokakaia tobalilonda hai ananda,

⁵bona manoto lalunda, malelaha katuwonda, mokadipura maroahe ananda hai sounda, maroa lalunda, hai mengkoruhe i tobalilonda. Ane nodo poantinda, bara ina ara tauna au mopakoi Ngkorana Pue Ala.

⁶Nodo worihe tobalilo au mangura mani, nupaturohe bona raisa morempeki ope-ope peundeana lalunda au kadake.

⁷Hai oio, Titu, ope-ope babehiamu hangangaa mewali pandiri. Ane mepaturoko, mepaturoko hangko i lalumu mpuu, hai hangangaa manoto babehiamu.

⁸Pololitamu hangangaa au manoto liliu hai au bara ara kamasalana. Ane nodo babehiamu, ina maeahe tauna au moewake, lawi bara ara lolita kadake au peisake rasalaia.

⁹Ane tauna au hawi tuwona, nupaturohe bona mengkoruhe i ampunda i paka-pakana, hai hangangaa mopamatanahe laluna ampunda. Ineehe mehahanai,

¹⁰hai ineehe mopanangka anu-anuna ampunda. Hangangaa rapamaroa-roa liliu babehianda hai matunduhe i ampunda. Lawi ane nodo babehianda, ope-ope tauna ina motoia paturo kana i Pue Ala, Topehoremanta.

¹¹Kabulana laluna Pue Ala tongawami i ope-ope tauna, lawi Nabungkahimi rara bona peisake tehorema hangko i huku dosanta.

¹²Hai Napaturoke bona mokabahake babehianta au moula pea peundeana lalunta au kadake hai au bara hintoto hai peundeaNa. Napaturoke bona mewalike matopa, tapamaroa babehianta, hai mengkoruke Iria lianta mani tuwo i dunia ide.

¹³Lawi ide-ide, tanganta mampegia alo pewalina apa au taharunga, iami alo au buke katana-tana. I tempo iti, ope-ope tauna ina moita kuasana Pue Ala au mahile tuwoNa, hai Datu Topehoremanta, iami Yesu Kerisitu.

¹⁴Yesu mokirami wataNa rapapate mohuru dosanta bona Nakabahake hangko i ope-ope babehianta au kadake, hai Napopewalike taunaNa au malelaha hai au madota mobabehi au maroa.

¹⁵Mewali, Titu, ope-ope ide hangangaa nupaturoahe. Nupakaroho lalunda hai nuweihe lolita. Ineeko maea, lawi raweimoko kuasa mopaguruhe. Ineehe nupogiangaa bahema pea mopapakoiko.