Read Napu Pilemo 1 Bible Online

Pilemo 1 - Napu bible

Pilemo 1

¹Sura ide hangko iriko Paulu, au ratarunggu anti pobagongku mopahawe bambari kana i Kerisitu Yesu, hai hangko i Timotiu, halalunta hampepepoinalai. Kipakatu sura ide irio Pilemo, halalungki hampopobago au kipokaahi.

²Kipakatu wori i Apia, halalungki towawine au kipokaahi, hai i Arkipus, halalungki au hampopobago, hai i ope-ope jumaa au moguluhe i soumi.

³Tabea: kiharunga Pue Ala Umanta hai Pue Yesu Kerisitu ina mowatikau hai moweikau roa ngkatuwo.

⁴I lalu pekakaengku, kukabelai liliuko halalu, hai kuuli ngkaia kamaroana i Pue Ala.

⁵Lawi kuhadimi bambari au manguli noumba kamarohona pepoinalaimu i Pue Yesu hai kamahilena ahimu i ope-ope to Sarani.

⁶Mekakaena bona hangko i pohalalunta i lalu hangana Pue Yesu ina tetambai kapandeta moisa ope-ope pewati au maroa au tahumba anti pohintuwuta hai Kerisitu.

⁷Halalungku, Matana mpuuna hai tepalindo lalungku anti kamahilena ahimu iti, lawi oio au mopakaroho lalunda ope-ope tauna au mepoinalai i Pue Yesu.

⁸Halalungku Pilemo! Katouana, peisako kuparentai mobabehi apa au hintoto, lawi naweina Kerisitu kuasa.

⁹Agaiana kukatuinao kamahilena ahimu, ido hai barako kuparentai. Kupahawe pea pamperapiku irio. Iko Paulu, hadua tosae au tangangku ratarunggu anti pobagongku i Kerisitu Yesu,

¹⁰hai kuperapi bona nudoko maroa woia ide anangku, Onesimus. Kupoanami, lawi tangangku ratarunggu inde, iko au mopaguru bona mepoinalai i Pue Yesu.

¹¹Ane hangkoia, ia barapi mobundu irio Pilemo [lawi melangka hangko irio]. Agaiana ide-ide, ia mobundu mpuu, maroa irio maroa iriko.

¹²Mewali ide-ide, anangku au kupokaahi ide, kutudu mesule hule irio.

¹³Ane moula pea peundeaku, kekutaha mani inde hihimbela hai iko, lawi kuimbami pahurumu au motulungina tangangku ratarunggu anti pobagongku mobambari Ngkora Marasa.

¹⁴Agaiana bara turu inaongku motaha inde ane bara mani himbela pekirinta. Peundeaku bona apa au nubabehi, nubabehi mpuu hangko i lalumu. Barako kupari-paria moula peundeaku.

¹⁵Babila hangko i pegaakina sangka ide, naporara Pue bona ia peisa mesule irio hawe i hae-haena.

¹⁶Hai Onesimus iti, ineemi nuimba hawimu lawi melumbu tuwona hangko i kahawina. Ide-ide hangangaa nuimbami halalumu hampepepoinalai au nupokaahi. Ane iko maahina iria, apa mani oio. Hangangaa nupokaahi lawi ia hangka manusiamu hai halalumu i lalu Pue Yesu.

¹⁷Mewali, ane nuimbana halalumu hampepepoinalai, kuperapi bona nudoko hule Onesimus nodo kanudokongku.

¹⁸Ane ara salana ba indana irio, ikorai au mohalea,

¹⁹hai au teuki ide, iko haduduangku au mouki: iko Paulu ina mobaiari ope-ope indana. (Barako paraluu kupopaingaa kaikona au mopahaweako Ngkora Marasa. Mewali, anti kamolambimu katuwo maroa, moinda woriko iriko.)

²⁰Halalu, anti pohintuwuta hai Pue, kuperapi bona nupeulai wongkoia pamperapiku ide. Anti pohalalunta i lalu Kerisitu, nudoko hulemi Onesimus bona matana lalungku.

²¹Moukina sura ide, lawi kupoinalai kaina nubabehiana apa au kuperapi. Hai kupoinalai apa au nubabehi batena melumbu hangko i apa au kuperapi.

²²Hai kuperapi wori bona nupasilolongaana haogu lincu i soumu, lawi kuharunga Pue Ala ina mohanai pekakaemi bona tekabahana hangko i tarunggu ide, alana peisakau kusondaki.

²³Epafras, au ara hihimbela hai iko i lalu tarunggu anti pobagona mopahawe bambari kana i Kerisitu Yesu, mopakatu wori tabeana irikamu.

²⁴Tabeanda wori halalungku au hampopobago, iami Markus, Aristarkus, Demas hai Lukasi.

²⁵Amputa Yesu Kerisitu mowatikau ope-ope. Hangko iriko PAULU