Read Napu Ibarani 10 Bible Online

Ibarani 10 - Napu bible

Ibarani 10

¹Aturana Pue Ala au napahawe Musa mewali pandiri irikita kana i apa au ina mai. Hangko i Atura iti, bara mani taisa katuwo maroa au tahumba hangko i Kerisitu. Taita mewao-wao pea, bara lenggena ntepuu. Moula Aturana Musa iti, pare-parena tauna au mampeinao mohungkuki Pue Ala hangangaa moanti liliu popenombanda au himbela. Agaiana barahe peisa mewali manoto i peitana Pue Ala anti poantinda popenombanda.

²Ane rapana tauna iti tebahoi mpuumi hangko i dosanda, kebarapohe ina moanti popenomba popoampungi dosa, lawi raisa dosanda teampungi hawe i hae-haena hai barapi ina mapari pekirinda anti kamadosanda.

³Agaiana bara nodo. Hangko i popenombanda au raanti pare-parena, mokatuinao liliuhe kamadosanda.

⁴Lawi wahe japi laki hai towau laki bara peisa moumpahi dosa.

⁵Ido hai pane i kahawena Kerisitu i dunia ide, Ia mouliangaa Pue Ala node: “Bara Nuperapi popenomba, hai bara Nuunde popenomba au rahuwe ba binata au rasambale bona mohuru dosa tauna, agaiana wataNgkumi au Nupasilolonga bona mewali popenomba Irio au Nupokatana.

⁷Ido hai kuuli: O Pue Ala, idemoNa maiNa mobabehi peundeaMu, nodo au teuki i lalu Sura Malelaha kana i wataNgku.”

⁸Nguru-nguruna nauli Kerisitu node: “Pue Ala bara mamperapi popenomba, hai barapi mounde popenomba au rahuwe ba binata au rasambale bona mohuru dosa,” nauri popenomba iti hintoto hai Aturana Pue Ala au nauki Musa.

⁹Roo indo, Nauli mbuli, “IdemoNa Pue Ala, maiNa mobabehi peundeaMu.” Mewali, ada au hangkoia barapi Napokana Pue Ala, lawi arami tunggaiaNa au wou, itiri au Napokana.

¹⁰Yesu Kerisitu mobabehi mpuumi peundeana Pue Ala: wataNa hambela pea Napopenomba i Pue Ala. Hai hangko i popenombaNa iti, Napamalelahamoke hawe i hae-haena.

¹¹Alo-alona ope-ope tadulako mpenomba agama Yahudi mampopolumaohe bagonda, hai mohuhu liliuhe popenomba au himbela, au bara peisa moumpahi dosa.

¹²Agaiana Kerisitu, hambela pea mokira wataNa rapapate mohuru dosa manusia, hai popenombaNa iti barapi paraluu rahuleki hawe i hae-haena. Karoona mohuhu popenombaNa, mengkaoremi lao i suruga hai mohuda ntanda i koanana Pue Ala.

¹³Ide-ide Kerisitu mampegia tempona Pue Ala mampopengkoru Iria ope-ope tauna au mampoiwali.

¹⁴Mewali, anti kapateNa au hambela pea, Napamanotomoke i peitana Pue Ala hawe i hae-haena. Au ratunggai inde, iami ikita ope-ope au tanganta Napamalelaha.[12]

¹⁵Paturo ide napakanotoa worimoke Inao Malelaha lawi i lalu Sura Malelaha, teuki node:

¹⁶Nauli Pue Ala: “Idemi podandiKu au wou au ina Kubabehi hai ihira i alo-alo au ina mai. HawaNgku ina Kuwoli i lalunda hai Kuuki i lalu pekirinda.”

¹⁷Roo indo, Nauli wori: “Dosanda hai salanda barapi ina Kukatuinao.”

¹⁸Mewali, ane teampungi mpuu dosanta hai salanta, barapoke hangangaa moanti popenomba ntanina au mohuru dosanta.

¹⁹Halalu! Ane Tadulako Mpenomba Mahile hangkoia, peisahe mesua i lalu Hologa Malelaha Ntepuu lawi moantihe wahe binata. Nodo wori ikita: anti wahena Yesu i kapateNa, barapoke langa mohungkuki Pue Ala i paidaaNa au malelaha.

²⁰Ane mohungkuki Pue Ala, molumaoke i rara au wou. Rara iti au Nabungkahiake Yesu bona moantike i katuwo maroa. I lalu sou penombaa to Yahudi hangkoia, rindi bana mohomboki rara tauna bosa mesua i lalu Hologa Malelaha Ntepuu. Agaiana ikita, barapi ara au mohomboki raranta mohungkuki Pue Ala, lawi Yesu mobungkahiake rara i tempona mohuhu wataNa rapapate.

²¹Yesumi au mewali Tadulako Mpenomba Mahilenta au mokadipura souna Pue Ala i suruga.

²²Lalunta Napamalelahami hai waheNa bona taisa kadanapi ara kamanawonta. Watanta rariu hai owai tanda kaNabahointa hangko i dosanta. Ido hai kuhuweki lalumi, halalu, bona mohungkukike Pue Ala hangko i lalunta mpuu hai hangko i pepoinalainta au maroho.

²³Hangangaa meharunga liliuke i Yesu, hai ineeke langa mopangaku kaIana Amputa, lawi Pue Ala mopabukei liliu dandiNa irikita.

²⁴Hangangaa mombekakamatake hai mombehuweki mpolaluke bona mombepokaahike hangko i lalunta mpuu hai mobabehi liliuke apa au maroa.

²⁵Ineeke mokaraohi pogulu-gulu i lalu penomba, nodo au rababehi tauna ntanina, agaiana hangangaa hirampu liliuke menomba bona peisake mombepakaroho mpolalu, pelumbunami i tempo ide, lawi taisa barapi mahae Pue ina hawemi.

²⁶Lawi ane mohadimoke hai moisamoke Ngkora Marasa au hangko i Pue, hai roo indo taoaka mobabehi liliu dosa, barapi ara popenomba ntanina au peisa mohuru dosanta.

²⁷Barapi ara au peisa taharunga, batena pearai karumpuna Pue hai api pehukuNa au rumihi, au ina mopapumpu hinangka iwaliNa.

²⁸Hangkoia ane ara hadua tauna au mosapuaka Aturana Musa hai arahe rodua ba talu tauna au mosabiki katouna kamasalana, bara ara ampungiana, batena rahuku mate.

²⁹Ane tauna au mosapuaka Aturana Musa nodo karahukuna, pelumbunami tauna au mokabaha pepoinalainda i Yesu! Tauna iti moihe-ihehe Anana Pue Ala, lawi rauli bara ara pobunduana wahena Yesu au mopakaroho dandina Pue Ala hai au mopamalelahahe. Mopakoimohe Inao Malelaha au naweike Pue Ala hangko i kabulana laluNa.

³⁰Mewali, inee mpuu takabaha pepoinalainta halalu, lawi taisa Pue Ala au manguli: “Iko au makuasa mehurungi, Iko au makuasa mehuku.” Hai teuki wori: “Pue ina mobotusi kara-karanda taunaNa.”

³¹Melangaki mpuu, ane nahukuke Pue Ala au tuwo.

³²Nikatuinao, halalu, noumba katuwomi hangkoia i pepongkami mepoinalai i Pue Yesu. I tempo iti, narumpakau ngkaia kapari anti peulami i Pue. Agaiana nauri nodo, barakau mousuli; mia-mia maroho liliu pepoinalaimi.

³³Hambela-hambela rakakabosaikau hai rapopeahi-ahikau i lindonda tauna bosa; ara tempona mantodiha sambela worikau hai rangami au rapopeahi-ahihe.

³⁴Maahi lalumi i tauna au ratarunggu anti peulanda i Pue Yesu. Ane anu-anumi rarampaki, bara nipokaehua. Agaiana batemi matana, lawi niisa kaarana au rapasilolongaakau i suruga au meliu kamaroana hai au bara mokahopoa.

³⁵Mewali, inee mpuu nikabaha pepoinalaimi iti, lawi ane mepoinalai liliukau, ina mahile mpuu hurungina au nihumba.

³⁶Kehapiri apa pea au mewali, hangangaa mantahake. Nipeulai liliu peundeana Pue Ala hai ina molambikau apa au Nadandiakau.

³⁷Barapi mahae, ina tepabukei Ngkorana Pue Ala au manguli: “Au ina mai batena mai, KahaweNa bara ina molia-lia.

³⁸Tauna au manoto i peitaNgku ina molambihe katuwo maroa hangko i pepoinalainda. Agaiana ane arahe au mousuli hangko i pepoinalainda, barahe Kupokana.”

³⁹Agaiana ikita ide, halalu, barake tauna au mousuli hangko i pepoinalainta, hai au ina rahuku. Ikita ide, tauna au mepoinalai hai au molambi katuwo maroa.