Read Napu Ibarani 11 Bible Online

Ibarani 11 - Napu bible

Ibarani 11

¹Au rauli pepoinalai, lempona apa au taharunga i Pue Ala, taisa batena ina mewali. Kehapiri bara mani taita apa au tapegia, manoto i lalunta ina mewali.

²Anti pepoinalainda, tauna hangkoia napokatanahe Pue Ala.

³Anti pepoinalainta, taisa langi hai tampo Napopewali Pue Ala hai lolitaNa pea. Mewali, ope-ope au taita, mewali hangko i apa au bara peisa taita.

⁴Anti pepoinalaina Habeli, ia mohuhu popenombana i Pue Ala au meliu kamaroana hangko i popenombana Kai, wutuna. Taisami kaarana pepoinalaina, lawi matana laluna Pue Ala modoko popenombana. Hai anti pepoinalaina, Habeli naimba Pue Ala tauna au manoto. Nauri matemi, agaiana ia mololita mani irikita, lawi anti pepoinalaina ia mewali pandiri irikita au tuwo ide-ide.

⁵Anti pepoinalaina, Heno bara mate. Ia raore tuwo-tuwo hangko i dunia ide. Watana bara ralambi, lawi naangka Pue Ala tuwo-tuwo hangko i dunia ide. I lalu Sura Malelaha teuki: hangko damani Heno raangka, ia napokatana Pue Ala.

⁶Mewali taisa mpuu: bara ara tauna au napokatana Pue Ala ane bara mepoinalai Iria. Lawi tauna au mohungkuki Pue Ala hangangaa raisa i lalunda: Pue Ala tou-tou mpuu ara, hai batena ina mowei hurungina au maroa i ope-ope tauna au tou-tou mohaoki Pue.

⁷Anti pepoinalaina, Noho mengkoru i hawana Pue Ala. Pue Ala mouliangaa kaina arana owai meumbala au molaboa dunia. Mewali, kehapiri bara mani naita pewalina, hawana Pue Ala napeulaimi hai nababehimi duanga mahile bona ia hai towawinena hai anana bara mate maliso. Ope-ope tauna i dunia rahuku, agaiana Noho anti pepoinalaina, ia Naimba Pue Ala manoto i peitaNa.

⁸Anti pepoinalaina, Burahima mampeulai hawana Pue Ala. Burahima nakakio hai natudu Pue Ala lao i tampo au karao, Nauliangaa, “Tampo au Kutudungiako ina mewali kiramu hai kiranda pemuleamu.” Mewali, kehapiri bara naisa iumba kalaoana, meangkami Burahima moula hawana Pue Ala.

⁹Kahawena i tampo iti, ia mepoinalai liliu i dandina Pue Ala au manguli tampo iti ina mewali kirana hai kiranda pemuleana. Nodo wori Isaki anana hai Yako ampuna, modoko dandina Pue Ala iti. Kehapiri tampo iti hangangaa mewali mpuu kiranda agaiana nodo peahe torare i tampo iti. Bara ara sounda haduduanda, bambaru pea au rapaidai.

¹⁰Lawi Burahima tangana mampegia hambua wanua au maroho pohudaana, au napopewali hai au naaro mpuu Pue Ala.

¹¹Anti pepoinalaina Burahima, Burahima hai Sara peisahe moana, nauri Burahima saemi hai Sara lalo. Iti mewali lawi manoto i laluna Burahima, Pue Ala ina mopabukei dandiNa iria.[13]

¹²I tempo iti Burahima sae ntepuumi; katouana barapi ina memule. Agaiana nauri nodo, anti pepoinalaina, Burahima mopaara bosa pemuleana au bara peisa teimba kabosanda. Kabosanda nodo kangkaiana betue i langi hai wungi i wiwi ntahi.

¹³Ope-ope tauna iti mampoinalai liliuhe dandina Pue Ala duuna i kapatenda, agaiana bara manihe mohumba apa au nadandiahe Pue Ala. Peisa tauli: moita ngkarao peahe pewalina. Raisa mahae mani hangko mewaliri. Agaiana nauri nodo, bara bata-bata lalunda i dandina Pue Ala. Matana mpuuhe mampegia pewalina, ido hai rauli: tuwohe i dunia ide nodo pea torare ba topolilo.

¹⁴Tauna au manguli nodo, tongawa hangko i lolitanda apa au rahaoki. Au rahaoki iami tampo au peisa mewali tamponda haduduanda.

¹⁵Bara tampo au rapalehi hangkoia au rahaoki. Lawi ane rapana tampo iti au rahaoki, ketepakatohe mesule inditi.

¹⁶Agaiana tampo au rahaoki, iami suruga au meliu kamaroana. Ido hai Pue Ala bara maea ane rauli Ia Pue Ala au rapenombai, lawi Napasilolongaamohe paidaanda i suruga.

¹⁷Anti pepoinalaina Burahima, i tempona napetandaka Pue Ala, ia lao mohuhu Isaki anana mewali popenombana. Hangkoia Pue Ala mololita iria, Nauli, “Batena pea pemuleana Isaki au ina raimba pemuleamu moula apa au Kudandiako.” Agaiana nauri nodo, bula laluna Burahima mohuhu anana au haduduana mewali popenombana.

¹⁹Lawi i tempo iti nauli laluna Burahima, Pue Ala makuasa mopatuwo hule Isaki. Hai peisa tauli: Burahima molambi hule anana hangko i kapate.

²⁰Anti pepoinalaina, Isaki mowati Yako hai Esau, hai mopahawe apa au ina mewali irihira i alo au ina mai.

²¹Anti pepoinalaina, hungkumi Yako mate, ia mowati ananahe Yusupu au rodua, liliu mopaisare waana i wuntu laina hai mekakae i Pue Ala.

²²Hungkumi Yusupu mate, anti pepoinalaina, napahawemi kaina padunda to Isaraeli hangko i tampo Masiri. Hai meawili, nauli, “Ane padukau hangko i tampo Masiri, buu rangkaku hangangaa nianti.”

²³Anti pepoinalainda, tosaena Musa mowunimohe Musa duuna tinuwuna talu wulana, lawi raita tosaena kamakarana, hai barahe langa moliungi hawana datunda to Masiri.

²⁴Anti pepoinalaina, i kahileanami Musa, ia bara mau rauli ampuna datunda to Masiri.

²⁵Bara naunde tuwo matana-tana au hampalai pea i lalu dosa, agaiana nauli laluna agina molambi kapari hihimbela hai taunana Pue Ala au bosa.

²⁶Naunde Musa rakakabosai anti pepoinalaina i Datu Topehompo au ina mai pane molambi peawana datu i tampo Masiri. Lawi ia meharunga liliu i Pue Ala bona mohumba hurungina au mahile i bokona.

²⁷Anti pepoinalaina, Musa mopalehi tampo Masiri; ia bara langa i karumpuna datunda to Masiri. Musa mantaha i lalu kapari, nodo au moitami Pue Ala, au bara raita.

²⁸Anti pepoinalaina, nababehimi ada Alo Posusa Pasa, hai motuduhe to Isaraeli mopariha wahe i sobo babanda bona ane moliu malaeka au mepapate, ananda au towutu bara ina rapapate nodohe ananda to Masiri au towutu.

²⁹Anti pepoinalainda, to Isaraeli hangkoia mowetahe Tahi Malei nodo peahe molumao i lorena. Agaiana to Masiri au mewulai, matehe maliso.

³⁰Anti pepoinalainda, to Isaraeli molumaohe motoleliki bente wanua Yeriko i lalu pitu alona duuna magero.

³¹Anti pepoinalaina, Rahab bara rapapate nodo tauna au hambomboeana au barahe mengkoru i Pue Ala. Rahab iti, hadua towawine au bara maroa babehiana. Agaiana i temponda bahangkia surodado to Isaraeli lao mampendenga boea Yeriko, nadokohe i souna, hai natulungihe.

³²Ngkaia mani au peisa kuuliangaakau, agaiana barapi handa tempoku motuntu kana irihira ope-ope. Bara manikau kutuntua Gideo, Barak, Simeso, Yepta, Daudi, Semueli hai nabi-nabi ntanina.

³³Anti pepoinalainda: mampopengkoruhe datu, moparentahe i kanoto-notoana, molambihe apa au nadandi Pue Ala, mokamumuhe nganga singa,

³⁴barahe mate i lalu api au lolaa, tekabahahe hangko i tauna au ina mopapatehe, nauri maledehe, agaiana mewalihe maroho ntepuu, pebaihe mombeala, hai monangihe surodado iwalinda.

³⁵Anti pepoinalainda, arahe towawine au molambi hulehe ananda au matemi, lawi rapatuwoa sulehe. Agaiana ara worihe au rapopeahi-ahi duunda mate anti pepoinalainda. Agindami rapapate panehe mosapuaka Pue Ala, lawi mampeinaohe rapatuwo hule bona molambihe katuwo au meliu kamaroana.

³⁶Arahe au rakakabosai hai rakandangi, ara worihe au rataka hai ratarunggu.

³⁷Arahe au rawatui duunda mate, arahe au ragaragaji, hai au rapapate hai piho. Arahe au meahi-ahi mpuu katuwonda, mehampi pearai koli dimba hai koli towau. Rapopeahi-ahihe hai rapapahaihe.

³⁸Melangkahe lao i pada wungi hai i tongku-tongkuna, maidahe i lia watu. Dunia ide barapi hintoto rapaidai tauna au nodo kamaroana lalunda.

³⁹Anti pepoinalainda, ope-ope tauna iti napokatanahe Pue Ala. Nauri nodo bara manihe mohumba apa au Nadandiahe.

⁴⁰Bara mani rahumba, lawi Pue Ala mopasilolongaake au meliu kamaroana bona i tempona ikita ara hihimbela hai ihira, ina Nawei worihe katuwo maroa au bara ara kamakurana.