Read Napu Ibarani 12 Bible Online

Ibarani 12 - Napu bible

Ibarani 12

¹Halalu! Peisa tauli: ope-ope tauna au maroho pepoinalainda iti motolelikike hai mosabiki katuwonta. Ido hai kuhuweki lalunta bona tatende ope-ope au doko mohomboki raranta meula i Pue. Ikita ide nodo tauna au momberiri. Hangangaa tatende dosanta au montimihike, hai mantahake moula rara au napakanotoake Pue Ala.

²Hangangaa mokamatake Yesu au mobungkahimi rara pepoinalainta hai au mopahandai pepoinalainta. Lawi Ia mantaha liliu i lalu kapari duuna mate i kau mombehape. KapateNa iti mepakaea ntepuu. Agaiana nauri nodo, bara Napailalu, Nahuhu pea wataNa rapaku i kau mombehape, lawi Napeinao molambi katana i bokona. Ide-ide mohudami ntanda i koanana kadera kadatuana Pue Ala i suruga.

³Nipeita halalu noumba kamaparina Yesu molindo tauna kadake au mosapuaka wataNa, hai kahopoana Ia rapapate. Mewali halalu, hangangaa nipekiri liliu noumba kamantahana Yesu i lalu kapari bona datikau malede hai masusa lalumi.

⁴Lawi ikamu raewa worikau tauna au kadake, agaiana i lalu pombealami moewa dosa, bara manikau rapapate nodo Yesu.

⁵Hai inee naliu inaomi paturona Pue Ala irikamu anaNa, au manguli, “Anangku, nipailalu maroa paturona Pue, hai inee koi inaomi ane Nakambaroakau.

⁶Lawi Pue Ala mokambaroa ope-ope tauna au Napokaahi, hai mokarumpui ope-ope tauna au Napoana.”

⁷Ane molambikau kapari, hangangaa mantahakau. Niimba peami paturo ba pekambaroa hangko i Umami au i suruga. Pue Ala mopaturokau nodo hadua uma mopaturo hai mokambaroa anana. Lawi bara ara anangkoi au bara nakambaroa umana.

⁸Ope-ope tauna au napoana Pue Ala, batena Nakambaroa. Mewali, ane rapana barakau nakambaroa Pue Ala, lempona barakau Napoana.

⁹Ikita ope-ope rakambaroamoke umanta i dunia, hai tabilahe. Apa mani Umanta au Ampu inaonta. Ane Nakambaroake, hangangaa mengkoru mpuuke alana molambike katuwo maroa.

¹⁰Tosaenta i dunia mopaturoke bahangkia pea parena kamahaena. Paturonda iti, ara hokana, lawi raweike lolita moula apa au maroa i peitanda. Agaiana Pue Ala mopaturoke bona molambike apa au maroa bona malelahake nodo Ia.

¹¹Tanganta rapaturo ba rakambaroa, mapari lalunta. Agaiana ane paturo iti tapeulai, maroa katuwonta, hai manoto babehianta.

¹²Ido hai ineekau mampomalea mampopolumao babehia au maroa. Nipakaroho pepoinalaimi au malede.

¹³Hangangaa nipakaroho peulami i Pue bona ane ara mani i olomi au bata-bata lalunda, barahe ina manawo, agaiana kamaroho-rohoari pepoinalainda.[14]

¹⁴Hangangaa nipari-pari mohintuwu hai ope-ope tauna. Nipari-pari wori bona malelaha tuwomi, lawi tauna au bara malelaha tuwona bara ina moita Pue.

¹⁵Mainga-ingakau dati ara rangami au mousuli hangko i Pue Ala hai mosapuaka ahiNa. Maroa-roakau datihe ara tauna au hawe mewali rasu i olomi, hai kahopoana mopakarugi pohintuwumi alana bosa tauna teanti i lalu dosa.

¹⁶Nipamaroa-roa babehiami bona datikau ara au mebualosi ba mobabehi babehia au merikai. Ineekau ara au bara meula i peundeana Pue Ala nodo Esau hangkoia, lawi ia bara moholoi pewatina Pue Ala hangko i katowutuna. Kirana au katouana nahumba hangko i umana anti katowutuna, napobaluri i adina, naintolohi pea hai hantabo paande.

¹⁷Niisato noumba tuntukana. Roo indo, Esau mampeinao molambi hule pewati iti hangko i umana, agaiana barapi rawei. Nauri moteria mamperapi pewati iti, barapi ara rara mopakaroa kanawoana.

¹⁸Halalu, ide-ide ane mohungkukikau Pue Ala bara himbela hai to Isaraeli. Hangkoia Pue Ala mongkora i to Isaraeli hangko i Bulu Sinai i kaNaweinda AturaNa. Bulu iti, bulu biasa au peisa rapetobo. Tanganda to Isaraeli molindo bulu iti, moitamohe api au lolaa, rambu, gawu au makaindi, hai himburu kebuu.

¹⁹Mohadimohe pomoni tatamburu au maoni hai ara wori hambua wotu au mololita irihira masisimbuku, Nauli, “Apa pea au moiho bulu ide hangangaa rawatui duuna mate, maroa binata ba tauna.” I temponda mohadi lolitana Pue Ala, langamohe hai rauli, “Kiperapi bona wotu iti ineemi mololita irikami, lawi langa wongkamia.”

²¹Apa au ralindo to Isaraeli iti mewulungai mpuu. Mogalori Musa, nauli wori, “Langana hai moradana.”

²²Halalu, barakau mohungkuki bulu au nodo. Agaiana ide-ide molindomokau Bulu Sion hai wanua Yerusale au i suruga, au napaidai Pue Ala au tuwo. Molindokau isabuna malaeka au moguluhe i lalu katana-tana.

²³Hawemokau i poguluanda ananahe Pue Ala au towutu au teukimi hanganda i lalu suruga. Hawemokau i Pue Ala au mobotusi kara-karanda ope-ope tauna. Molindomokau tanoananda tauna au manoto babehianda hangkoia hai au rapamalelahamohe i peitana Pue Ala.

²⁴Hawemokau i Yesu, au mewali nente, au mopakaroho dandina Pue Ala au wou au mopahintuwu manusia hai Pue Ala. I tempona Yesu rapapate, mabubumi waheNa. Hai waheNa iti masuli hangko i wahena Habeli hangkoia.[15]

²⁵Maroa-roakau, ineekau hawe moae Pue, au mongkorami irikita. To Isaraeli hangkoia, barahe mampoinalai lolitana Pue Ala au mongkora irihira i Bulu Sinai, hai batenda rahuku. Apa mani ikita au mohadi lolitana Pue Ala au mongkora irikita hangko i suruga. Ane tasapuaka NgkoraNa, batena barake tekabaha hangko i pehukuNa.

²⁶I tempona Pue Ala mongkora i to Isaraeli i Bulu Sinai, wotuNa mampopoenggo dunia. Agaiana ide-ide, ara dandiNa au manguli: “Hambela maniNa ina mampopoenggo dunia ide duuna magero. Hai bara pea dunia au Kupopoenggo agaiana langi wori.”

²⁷NgkoraNa au manguli “hambela mani”, lempona Pue Ala ina mampopoenggo hai mogero dunia au Napopewali ide, lawi dunia ide bara mantaha hawe i hae-haena. Mewali, i alo au ina mai, Pue Ala ina mogero hinangkana bona apa au bara peisa moenggo, iti pearai au tetida.

²⁸Mewali, halalu, anti katalambina kiranta i lalu poparentana Pue Ala au bara peisa moenggo, ido hai hangangaa tauli ngkaia kamaroana i Pue Ala, hai hangangaa menomba mpuuke Iria moula peundeaNa. Hangangaa tabila hai tapengkorui mpuu,

²⁹lawi Pue Ala au tapenombai nodo api au mepapumpu.