Read Napu Ibarani 13 Bible Online

Ibarani 13 - Napu bible

Ibarani 13

¹Mombepokaahi liliukau hadua hai hadua nodo topohalalu.

²Hangangaa nipopehupehe tauna au moliu i soumi, lawi bara niisa mole malaekatohe pae. Lawi arahe au mampopehupe tauna au moliu i sounda, rapehangu manusia, mole malaekari!

³Hangangaa mokatuinaokau rangami au i lalu tarunggu. Hangangaa nihalea kaparinda nodo worikau ratarunggu hihimbela hai ihira. Hai nitulungihe tauna au rapopeahi-ahi anti pepoinalainda. Hangangaa nihalea kamaparinda nodo worikau au rapopeahi-ahi hihimbela hai ihira.

⁴Ope-ope tauna hangangaa mampeulai ada posamboko. Ada iti inee nilingkai. Lawi tauna au mebualosi hai au mobabehi babehia merikai, batenda ina nahuku Pue Ala.

⁵Inee worikau mohaoki liliu doi. Nipokatana apa au ara irikamu. Lawi ara lolitana Pue Ala au manguli: “Barako Kupalehi, hai barako Kukabaha.”

⁶Ido hai maroho lalunta, hai tauli: “Pue motulungina, barana langa. Bara kupokalanga apa au rababehiana tauna.”

⁷Hangangaa nikatuinao liliuhe tadulakomi au mopahaweamokau Ngkorana Pue Ala. Nipeita noumba tuwonda hawe i kapatenda, hai nipeulai pepoinalainda.

⁸Yesu Kerisitu bara tebaliki; Ia himbela pea hangkoia, ide-ide, hawe i hae-haena.

⁹Mewali ineekau mampeulai paturo wou au mepakanawo hai au mosisala hai pepoinalainta, nodo ada hai palia i paande. Lawi ada iti bara moanti katuwo maroa. Aginami tapakaroho lalunta hangko i kabulana laluna Pue Ala, lawi iti au moanti katuwo maroa irikita.

¹⁰Irikita, ara au meliu kamaroana hangko i ada agama Yahudi. Irikita, arami popenombata au mohompo salanta, hai tadulako mpenomba au mampeulai ada agama Yahudi barahe molambi kiranda hangko i popenombata iti.[16]

¹¹Hangkoia ane hambaa binata rasambale mohuru dosa, wahena naanti Tadulako Mpenomba Mahile i lalu Hologa Malelaha Ntepuu, agaiana watana raanti lao i raoa wanua hai rahuwe duuna mewali awu.

¹²Nodo wori Yesu raanti lao i raoa babaka wanua hai rapapate bona waheNa mopamalelaha tauna bosa.

¹³Mewali halalu, nodo Yesu au raanti lao i raoa wanua bona rakakabosai tauna, ikita wori hangangaa mokabahake hinangka au hangko i dunia ide, hai meula peake i Yesu, kehapirike rakakabosai.

¹⁴Lawi i lalu dunia ide, bara ara paidaa roonta; Mohaokike paidaa au ina mai.

¹⁵Mewali, halalu, anti kanatulunginta Yesu, hangangaa mohuhu liliuke popenombata i Pue Ala. Popenombata iti, lempona petoianta au mampomahile hangaNa.

¹⁶Ineekau mokabaha babehiami au maroa. Hangangaa motulungikau rangami, lawi itimi popenomba au napokatana Pue Ala.

¹⁷Nipeulaimi hawanda tadulakomi hai mengkorukau irihira. Lawi ihira au mokadipura katuwomi, hai au hangangaa mohanaihe Pue Ala kana i pobagonda. Nipeulai hawanda bona matanahe mobago. Ane bara nipeulai hawanda, ina masusa lalunda, hai ane nodo barapi ina ara pobunduana irikamu.

¹⁸Kiperapi bona nipekakaea liliungkai. Kiisa kabulana lalungki, lawi i paka-pakana kipeinao mobabehi liliu au manoto.

¹⁹Kuperapi mpuu bona nipekakaea wongkoia bona holigana mesule irikamu.

²⁰Mekakaena i Pue Ala, pongka roa ngkatuwo au mopakaroho podandiNa au mopahintuwuke hai Ia hawe i hae-haena, melempo i wahena Amputa Yesu au rapapate hai au Napatuwo hule hangko i kapate, hai Naangka mewali Toporewu au meliu kamaroana irikita dimbaNa.

²¹Kuperapi bona handa kaNaparewaimi i hinangkana au maroa bona peisakau mobabehi peundeaNa. Kuperapi bona anti pohintuwuta hai Yesu Kerisitu, Pue Ala mobago i lalunta bona Napokatana mpuuke. Tatoiami Pue Yesu hawe i hae-haena. Amin.

²²Halalu-halalu, kuperapi bona nipehadingi maroa-roa ide paturongku, nauri ihi surangku ide sosoe pea.

²³Bona niisa wori: halalunta Timotiu rakabahami hangko i tarunggu. Ane polo hawe inde, kuporanga lao mosondakikau.

²⁴Nipahaweangkai tabeangki i ope-ope tadulakomi hai i ope-ope halalu hampepepoinalaimi inditi. Halalumi hampepepoinalai to Italia mopakatu worihe tabeanda irikamu.

²⁵Pue mowatike ope-ope.