Read Napu Ibarani 2 Bible Online

Ibarani 2 - Napu bible

Ibarani 2

¹Mewali, hangangaa tapamaroa-roa mpuu pampeulainta bambari au tou au tahadimi bona datike mopalehi pepoinalainta.

²Lawi aturana Pue Ala au rapahawe malaeka i toiorunta hangkoia bara ara katebaliana. Hai hema pea au bara mampehadingi hai mampeulai atura iti ina molambi pehuku au hintoto hai babehianda,

³melumbu mani pehukuna Pue Ala irikita ane barake mopailalu bambari katehorema. Hai bambari katehorema iti melumbu ntepuu kuasana hangko i aturana Musa, lawi nguru-nguruna bambari iti napahawemi Anana Pue Ala haduduaNa. Hai tauna au nguru-nguruna mohadi lolitana Yesu hangkoia mopakanotoake katouna bambari iti.

⁴Hai Pue Ala mopakaroho ntepuu posabinda, lawi Naweihe kuasa mobabehi ngkaia pakana tanda kuasa hai tanda au metingkarai. Hai Nawei worihe kapande au montani-ntani hangko i Inao Malelaha moula peundeaNa.

⁵Bara malaeka au ina molambi kuasa hangko i Pue Ala bona moparenta dunia wou au ina mai au tapololita ide-ide.

⁶Agaiana manusiari au ina molambi kuasa iti. Iti tepakanoto i lalu Sura Malelaha au manguli node: Apa woia pae manusia pane Nukatuinao? O Pue Ala, apa pae ana manusia pane Nukadipura?

⁷I tempo au hampalai pea, ia Nupaiwoi hangko i malaeka. Nusongkoi hai peawa hai pebila.

⁸Nupopengkoru hinangkana iria. Mewali, au tabasa inona: Pue Ala mowei kuasa i manusia bona moparenta hinangkana. Lempona, bara ara hampaka au bara nakuasai manusia, nauri ide-ide, bara mani taita manusia mokuasai hinangkana.

⁹Agaiana ide-ide tongawami kamakuasana Yesu. I katuwoNa au hampalai i dunia ide, kamahilena tuwoNa tepaiwoi hangko i malaeka. Lawi anti kabulana laluna Pue Ala irikita, Napakanoto bona Yesu rapapate mopahuru ope-ope tauna. Hai anti pohuhuNa wataNa rapapate, ide-ide Ia rapomahile hai raweimi pohudaa au meawa hai tebila.

¹⁰Pue Ala mampopewali hinangkana moula pobotusiNa. TunggaiaNa bona bosa tauna Napopewali anaNa hai Napopeawahe. Ido hai Pue Ala mopakanoto bona Yesu molambi kapari duuna mate. Pobotusina Pue Ala iti hintoto, lawi hangko i kapari au nahumba Yesu, Yesu mewali Topehompo au bara ara kamakuraNa. Ia au mobungkahi rara bona peisake tehorema.

¹¹Yesu, au mopamalelaha tauna, hai tauna au Napamalelahami, hadua pea Umanda. Ido hai Yesu bara maea mouli kaNapohalalunda.

¹²Nauli Yesu i Pue Ala node, “Ina Kupatolele hangaMu i hahalaluNgku. I pogulua taunaMu, kutoiaKo.”

¹³Nauli mbuli Yesu: “PeharungaNgku, batena pea Pue Ala.” Hai hambela mbuli Yesu manguli: “IdemoNa, hihimbela hai ananahe Pue Ala au NaweimoNa.”

¹⁴Tauna au napoanahe Pue Ala, tauna biasa peahe au hangangaa mate. Ido hai Yesu mewali wori manusia hai tuwo nodo tauna biasa bona anti kapateNa Ia mogero kuasana Datu Tokadake au mopaara kapate.

¹⁵Hai kapatena Yesu iti, naporara Pue Ala mokabahake hangko i kapate. Lawi hangkoia, tuwoke nodo hawi. Ikita rapandiri nodo hawina Datu Tokadake lawi mampokalangake kapate.

¹⁶Mewali, tongawami: bara malaeka au Natulungi Pue Yesu, agaiana ikitari pemuleana Burahima au Natulungi.

¹⁷Ido hai Yesu hangangaa mewali manusia au himbela hai ikita halaluNa i paka-pakana bona Ia mewali Tadulako Mpenomba Mahile. Hai i lalu pampopolumaona bagoNa i Pue Ala, Ia matundu hai maahi laluNa. Hai i lalu pobagoNa iti, Ia mopaara kateampunginda manusia.

¹⁸Yesu molambi womi kapari i kanakeloNa Datu Tokadake, ido hai peisa motulungi tauna au molambi pekelo lawi Ia mampoliungimi pekelo iti.