Read Napu Ibarani 3 Bible Online

Ibarani 3 - Napu bible

Ibarani 3

¹Halalu-halalu au mewali taunana Pue Ala au Nakakio mesua i suruga, nipailalu kahemana Yesu. Ia tuduana Pue Ala hai Tadulako Mpenomba Mahile au tapoinalai.

²Yesu matundu mampopolumao bago au Natudua Pue Ala. Nodo Musa hangkoia matundu mampopolumao bagona mokadipura souna Pue Ala; lempona, mokadipura taunana Pue Ala.

³Agaiana Yesu hintoto molambi pebila au meliu hangko i Musa, lawi tauna au moaro sou hangangaa meliu karabilana hangko i sou au naaro.

⁴Ope-ope sou, batena ara au moaro. Agaiana Pue Ala moaro hinangkana.

⁵Musa matundu mampopolumao bagona i souna Pue Ala nodo hadua topobago mampobagoa ampuna, hai mosabi kana i apa au ina napahawe Pue Ala.

⁶Agaiana Kerisitu, bara pea topobago. Ia Anana Pue Ala au matundu mampopolumao bagoNa nodo hadua tadulako au mokadipura ope-ope ihi souna Pue Ala. Ihi souna Pue Ala iti, ikita idemi, asala maroho liliu pepoinalainta hai meharunga liliuke i Pue Yesu duuna i kahopoana.

⁷Mewali, halalu, hangangaa nipehadingi maroa paturona Inao Malelaha au teuki i lalu Sura Malelaha node: “Alo ide ane mohadikau wotuna Pue,

⁸inee nipamatua lalumi nodo toiorumi hangkoia meewa i Pue i temponda mampetandaka kasabarana Pue i pada wungi.

⁹I tempo iti toiorumi mampetandakaNa, nauri moitamohe hinangka tanda kuasa au Kubabehiahe i lalu iba pulona parena.

¹⁰Ido hai malutamoNa irihira, hai mololitaNa, Kuuli, ‘Ihira ide tauna au matua lalunda, hai barahe mampeulai hinangka aturaNgku.

¹¹RumpuNa hai mosumpaNa, Kuuli: Barahe ina mesua i pengkarooangaa au Kupasilolongami.’ ”

¹²Halalu! Maroa-roakau, datikau ara au kadake lalumi. Ineekau nodo toiorumi iti au mopalehi pepoinalainda i Pue Ala au tuwo!

¹³Agina mombepakaroho mpolalukau alo-alona, datikau ara au rapakanawo duuna matua lalumi. Mombepakaroho mpolalukau liami mani tuwo i tempo au rahanga “alo ide,” lempona ara mani katepakami.

¹⁴Lawi ikita ide mohintuwu hai Kerisitu, asala apa au tapoinalai hangko i nguru-nguruna takingki liliu hangko i lalunta au bara bata-bata duuna i kahopoana.

¹⁵Inee naliu inaonta apa au tabasa inona au teuki node: “Alo ide ane mohadikau wotuna Pue, inee nipamatua lalumi nodo toiorumi hangkoia meewa i Pue.”

¹⁶Hemahe au mohadi wotuna Pue Ala, hai kahopoana meewahe? Bara pae to Isaraeli au naantihe nabi Musa mesuwu hangko i tampo Masiri?

¹⁷Hai hemahe au mopaara karumpuna Pue Ala i lalu iba pulona parena? Bara pae to Isaraeli au matehe i pada wungi anti kangkaiana dosanda?

¹⁸Hai ihira itimi au natunggai Pue Ala i lalu sumpaNa au node: “Barahe peisa molambi pengkarooangaa hihimbela hai Iko.” Barahe Napaliu molambi pengkarooangaa iti, lawi barahe moula hawaNa.

¹⁹Mewali, taisa: barahe peisa molambi pengkarooangaa hihimbela hai Pue Ala lawi barahe mepoinalai Iria.