Read Napu Ibarani 7 Bible Online

Ibarani 7 - Napu bible

Ibarani 7

¹Melkisedek iti, iami datu i wanua Salem[3] hangkoia hai ia wori hadua tadulako mpenomba au mampopolumao bago mpenomba i Pue Ala au makuasa i hinangkana. I pesulena Burahima hangko i pombealaa monangi bahangkia datu, Melkisedek mai mampohidupaa hai mowati Burahima.

²Roo indo, Burahima mohuhu i Melkisedek, hangkira hampulo hangko i ope-ope anu-anu au narampaki hule hangko i iwalinda. Hanga Melkisedek, lempona: ‘Datu au manoto’. Lawi ia datu i Salem, mewali rahanga wori: “Datu au moanti roa ngkatuwo”, lawi lempona hanga Salem: ‘roa ngkatuwo’.

³Kana i Melkisedek, bara ara teuki kana i umana ba inana ba pemuleana. Bara wori ara teuki kana i pepongkana tuwona ba kahopoana tuwona. Peisa tauli: Melkisedek iti peisa rapahimbela hai Anana Pue Ala, lawi mewali tadulako mpenomba hawe i hae-haena.

⁴Mewali, peisa taita noumba kamahilena tuwona Melkisedek, lawi mogalori Burahima au mahile tuwona, au rapouma ope-ope to Yahudi, mobila wori Melkisedek hai mowei Melkisedek hangkira hampulo hangko i anu-anuna au nahumba i lalu pombeala.

⁵Moula atura agama Yahudi, ope-ope to Yahudi hangangaa mohuhuhe hangkira hampulo hangko i polambianda i pemuleana Lewi,[4] au mewalihe tadulako mpenomba, nauri mohalalutohe lawi pemuleana hahahe Burahima.

⁶Melkisedek, bara pemuleana Lewi. Agaiana nauri nodo, ia molambi hangkira hampulo hangko i Burahima. Hai nauri Burahima molambi dandina Pue Ala, bara Burahima au mowati Melkisedek agaiana Melkisedekri au mowati Burahima.

⁷Hai taisa ntepuu: tauna au rawati tepaiwoi tuwona hangko i topewati. Mewali, Melkisedek meliu kamahilena tuwona hangko i Burahima.

⁸Nodo wori Melkisedek meliu kamahilena tuwona pane pemuleana Lewi au mewalihe tadulako mpenomba. Agaiana tadulako mpenomba au molambihe hangkira hampulo iti, iamohe tauna biasa au peisahe mate. Agaiana Melkisedek au molambi wori hangkira hampulo iti, bara ara teuki i lalu Sura Malelaha kana i kapatena, mewali tongawa Melkisedek tuwo liliu.

⁹I tempona Burahima mohuhu hangkira hampulo i Melkisedek, himbelami hai pemuleana Lewi au mewalihe tadulako mpenomba au mohuhu hangkira hampulo i Melkisedek, mole ihirari au hintoto modoko hangkira hampulo hangko i hahalalunda.

¹⁰Lewi iti, ampu i kuntuna Burahima. I kamaina Melkisedek mampohidupaa Burahima, Lewi bara mani ara. Mewali, ane Melkisedek modoko hangkira hampulo hangko i Burahima, manoto Melkisedek i wongko tuwona hangko i Lewi hai pemuleanahe.

¹¹Pue Ala mopahawe aturaNa i to Yahudi melempo i pemuleana Lewi au Naangkahe mewali tadulako mpenomba, agaiana i kanatadalukoinda Haruni barahe mewali manoto i peitana Pue Ala. Ido hai Pue Ala moangka hadua tadulako mpenomba ntanina, himbela hai Melkisedek, au bara hangko i pemuleana Haruni.

¹²Mewali, ane pemuleana Lewi au mewalihe tadulako mpenomba rapahuru hai hadua tadulako mpenomba au ntanina, au bara pemuleana Lewi, Aturana Musa hangangaa rapahuru wori.

¹³Au ratunggai inde, bara tauna hangko i pemuleana Lewi, agaiana hangko i pemulea au ntanina au bara hambela mampopolumao bago tadulako mpenomba.

¹⁴Lempona, Amputa Pue Yesu, bara rapoanaka hangko i pemuleana Lewi, agaiana hangko i pemuleanari Yehuda, Moleri i lalu atura tadulako mpenomba au nauki Musa, bara ara au teuki kana i tinana Yehuda.

¹⁵Tongawa pemuleana Lewi hangangaa rapahuru i lalu pobagonda mewali tadulako mpenomba, lawi hawemi Tadulako Mpenomba Mahilenta au himbela hai Melkisedek, au bara hangko i pemuleana Lewi.

¹⁶Hai Ia bara mewali tadulako mpenomba moula atura au mopakanoto tinana au peisa mewali tadulako mpenomba. Ia mewali tadulako mpenomba moula kuasaNa hai katuwoNa au bara mokahopoa.

¹⁷Lawi i lalu Sura Malelaha, teuki node: “Oiomi tadulako mpenomba i hae-haena au mopaliliu bagona Melkisedek.”

¹⁸Atura au nauki Musa, au ngkaia kamakurana hai barapi mobundu, rakabahami.

¹⁹Lawi Atura iti bara moanti tauna mewali manoto i peitana Pue Ala. Ido hai atura iti rapahuru hai rara au meliu kamaroana. Ane tapeulai rara iti, tongawa irikita ina mohintuwuke hai Pue Ala.

²⁰Melumbu hangko inditi, Yesu mewali tadulako mpenomba moula sumpana Pue Ala. Ane tadulako mpenomba au ntanina, barahe raangka mewali tadulako mpenomba moula sumpana Pue Ala.

²¹Agaiana i karaangkana Yesu mewali tadulako mpenomba, Pue Ala mosumpa, Nauli, “Mosumpami Pue hai bara ina Napenosoi: Oiomi tadulako mpenomba i hae-haena.”

²²Podandi iti meliu kamaroana, lawi napahawemi Pue Ala hai sumpa, hai Yesu mopakarohomi podandi iti au mopahintuwuke hai Pue Ala.

²³Ara mbuli hampaka: ane pemuleana Lewi au mewali tadulako mpenomba, bosahe, lawi tauna biasa peahe au hangangaa mate. Mewali ane hadua mate, napahuru tohaduana.

²⁴Agaiana pohudaana Yesu mewali tadulako mpenomba bara ara kahopoana hai bara melimba i tohaduana, lawi Ia tuwo i hae-haena.

²⁵Ido hai Nabuku mokabahake hangko i huku dosanta hai moweike katuwo maroa au bara ara kamakurana, asala mohungkukike Pue Ala i lalu hangana Yesu. Lawi Ia au tuwo i hae-haena hai mamperurui liliuke i lindona Pue Ala.

²⁶Mewali, Yesu itimi Tadulako Mpenomba Mahilenta au taparaluu, lawi Ia pea au peisa motulungike. Ia malelaha tuwoNa, bara ara salaNa ba kamakuraNa. Nauri mewali manusia, Ia bara madosa nodo manusia. Ia raangkami i hambua pohudaa au meliu kamapangkana hangko i ope-ope au i langi.

²⁷Yesu bara nodo Tadulako Mpenomba Mahile ntanina au hangangaa mohuhuhe popenombanda alo-alona: nguru-nguruna popenomba au mohuru dosanda haduduanda, hai roo indo popenomba au mohuru dosanda tauna bosa. Agaiana Yesu hambela pea mohuhu popenomba i Pue Ala. Iti Nababehi i tempoNa mohuhu wataNa rapapate. PopenombaNa iti Nahuhu hambela pea; barapi ina rahuleki hawe i hae-haena.

²⁸Tauna au mewali Tadulako Mpenomba Mahile moula Aturana Musa, tauna biasa au malede. Agaiana bahangkia parena hangko i karaangkanda to Lewi mewali tadulako mpenomba, Pue Ala mohowara sumpaNa, hai moula sumpaNa iti, Naangkami AnaNa au haduduaNa mewali Tadulako Mpenomba Mahile. Hai AnaNa iti mewali Topehompo au bara ara kamakuraNa hai au tuwo i hae-haena.