Read Napu Ibarani 9 Bible Online

Ibarani 9 - Napu bible

Ibarani 9

¹I lalu podandina Pue Ala au napahawe Musa i to Yahudi hangkoia, ara ada mpenomba, hai ara wori sou penombaanda au rababehi tauna.

²Sou iti nodo haogu Bambaru. I lalu Bambaru iti, ara hantau rindi bana au moparioloki roogu hologa. Hologa au kaisa rahanga Hologa Malelaha. I lalu hologa iti, ara biti hulo,[5] meja roti popenomba,[6] hai roti au rapopenomba i Pue Ala. Hai i taleu rindi bana iti ara hologa karooguna au rahanga Hologa Malelaha Ntepuu.

⁴I hologa iti, ara meja pointua dupa[7] au rababehi hangko i bulawa, hai ara wori haogu peti au rahanga Peti Podandi.[8] Peti iti ralapisi hai bulawa, i raoana hai i laluna. I lalu peti iti, ara pahalo bulawa au raihii roti manna, ara laina Haruni au motumbe, hai ara wori rompeka watu au rapoukii hawa hampulo au hangko i Pue Ala.

⁵I wongko peti iti, ara rombua kerub, kapinda tebinihi mobobongi petuko peti. Hangko i kerub iti, tongawa peawana Pue Ala. Petuko iti rahanga Petauki Podame.[9] Agaiana ope-ope iti ineemi rapambaha inde.

⁶Nodomi karaatorona Bambaru Malelaha hangkoia. Alo-alona tadulako mpenomba mesua i hologa au nguru-nguruna mampopolumao bagonda.

⁷Agaiana au peisa mesua i hologa karombuana, batena pea Tadulako Mpenomba Mahile au mesua hambela pea hampare. Hai ane mesua, hangangaa moanti wahe. Wahe iti, iami wahe binata au nahuhu i Pue Ala, mohuru kamasalana haduduana hai salanda tauna bosa au bara raoaka.

⁸Kana i ada mpenomba iti, Inao Malelaha mopaguruke node: ane ara mani Bambaru Malelaha hangkoia, tauna biasa bara mani peisa mesua i lalu Hologa au Malelaha Ntepuu bona mohungkuki Pue Ala.

⁹Ope-ope iti mewali ngkora pandiri irikita au tuwoke ide-ide. Lempona: barake peisa mopamalelaha lalunta i peitana Pue Ala i pohuhunta binata hai popenomba ntanina Iria.

¹⁰Lawi ada iti mokanai pea watanta, nodo ada hai palia i paande hai paenu, hai bahangkia pakana ada mpobahoi wata. Pue Ala moweike ada bona tapeulai tanganta mampegia dandiNa au wou.

¹¹Agaiana ide-ide, hawemi Kerisitu mewali Tadulako Mpenomba Mahile au moanti katuwo maroa au tahumba ide-ide.[10] Ia mesua i lalu Bambaru Malelaha i suruga au meliu kamaroana hai au meliu kamalelahana hangko i Bambaru Malelaha au naaro Musa hangkoia. Lawi sou penombaa au napesuangi Kerisitu, bara rababehi tauna; lempona bara hangko i dunia ide.

¹²I tempoNa mesua i lalu Bambaru Malelaha, Ia liliu lao i lalu Hologa Malelaha Ntepuu molindo Pue Ala. Hai wahe au Naanti mesua, bara wahe towau laki ba wahe ana japi laki, agaiana waheNa haduduaNa. PesuaNa iti, hambela pea i hae-haena, lawi hai waheNa iti, Ia mohompomi dosanta hawe i hae-haena.

¹³Moula Aturana Musa, ane arahe tauna au masala moula atura agama,[11] hangangaa rabahoihe hai wahe towau laki ba japi laki au rasambale. Nodo wori, tauna iti hangangaa rakamburangiahe awu ana japi au rahuwe bona mewalihe malelaha. Mewali, ane wahe hai awu iti peisa rapake mobahoi tauna au masala moula atura agama au mokanai pea watanta,

¹⁴pelumbunami wahena Kerisitu! Anti kuasana Inao Malelaha au tuwo hawe i hae-haena, Kerisitu mohuhu wataNa i Pue Ala bona rapapate mewali popenomba au bara ara kamakurana. WaheNa iti mobahoi lalunta hangko i hinangka babehianta au moantike i kapate bona peisake menomba i Pue Ala au tuwo.

¹⁵Anti popenombaNa au bara ara kamakuraNa, Kerisitu mewali Nente au mopahawe podandi au wou, au mopahintuwu manusia hai Pue Ala. Iti Nababehi bona ope-ope tauna au nakakio Pue Ala molambi pewati au bara mokahopoa moula apa au nadandiahe Pue Ala i anaNa. Lawi i tempona mani ara podandi au nguru-nguruna au napahawe Musa, manusia moliungi Aturana Pue Ala. Ido hai Kerisitu mate mohompo peliunginda iti.

¹⁶Ane pandirina ara hadua tosae au mampeinao mokira-kira anu-anuna i anana, ia hangangaa mobabehi mpuu sura peawili au mopakanoto pokira-kirana anu-anuna. Agaiana sura peawili iti bara mani peisa rapake ane topeawili iti bara mani mate.

¹⁷Lawi ihi sura peawili iti bara peisa rapopobundu ane tuwo mani topeawili. Agaiana ane topeawili iti matemi, hangko peisari rapopobundu.

¹⁸Nodo wori, hangangaa ara kapate au mopakaroho podandina Pue Ala au napahawe nabi Musa. Kapate iti rapatongawa i wahe binata au raanti. Node tuntukana:

¹⁹Karoona Musa mopahawe hinangka parenta au ara i lalu Aturana Pue Ala i ope-ope to Yahudi, ia moalami wahe ana japi hai wahe towau laki nagalo hai owai. Roo indo, naala worimi hisop hambokea au raboke hai wulu dimba au malei, naeme i lalu wahe, hai nahimpeka i Sura Aturana Pue Ala hai i tauna bosa.

²⁰Tangana Musa mobabehi iti mololitami, nauli, “Idemi wahe au mopakaroho podandina Pue Ala irikamu, hai hangangaa nipeulai podandiNa iti.”

²¹Nodo wori, Musa mohimpeka wahe i Bambaru Malelaha hai i hinangkana parewa au rapake menomba i Pue Ala.

²²Moula Aturana Musa, paka-pakana hangangaa rabahoi hai wahe. Ane bara ara wahe hangko i kapate, bara teampungi dosanta.

²³Ane Bambaru Malelaha au i dunia ide hai anu-anu au ara i laluna, ope-ope iti mopandiri irikita kana apa au ara i suruga. Bambaru Malelaha au i dunia ide hangangaa rabahoi hai wahe binata au rapopenomba i Pue Ala. Agaiana ane sou penombaa au i suruga, hangangaa ara popenomba au meliu kamaroana.

²⁴Lawi paidaa malelaha au napesuangi Kerisitu, bara paidaa au rababehi tauna. Paidaa malelaha iti iami suruga. Hai Kerisitu mesua mpuu i suruga. Ide-ide, arami i lindona Pue Ala mamperuruike.

²⁵Tadulako Mpenomba Mahile agama Yahudi, pare-parena mesua i lalu Hologa Malelaha Ntepuu moanti wahe binata, bara wahena haduduana. Agaiana Kerisitu, bara bosa belana mohuhu wataNa i Pue Ala.

²⁶Lawi ane rapana nodo, kebosa belana Ia hangangaa mantodiha kapari duuna mate mepongka hangko i pewalina dunia hangkoia. Mewali, ide-ide hawe i kahopoa dunia au tepakanotomi, Ia mai i dunia moumpahi dosa manusia hambela pea, i pohuhuNa wataNa rapapate.

²⁷Himbela hai manusia au rapatoka hambela pea mate, hai roo indo hangangaa rabotusi kara-karanda.

²⁸Nodo wori, Kerisitu hambela pea mohuhu wataNa i Pue Ala mohalea dosa tauna bosa. Hai hambela tempo, Ia ina mai i karombelana i dunia ide. Kamaina iti, barapi mai mohalea dosanta. Agaiana mairi moanti katehorema i tauna au mampepegia kahaweNa.