Read Napu Yakobu 1 Bible Online

Yakobu 1 - Napu bible

Yakobu 1

¹Tabea hangko iriko, Yakobu, hawinana Pue Ala hai Pue Yesu Kerisitu. Sura ide kupakatuakau to Isaraeli au hampulo hai rontina au mahawukau i humalele dunia.

²Halalungku ope-ope! Ane narumpake mampopengaa kapari hai pekelo, inee masusa lalunta. Aginari tapokatana.

³Lawi taisa: ane pepoinalainta rapetandaka hangko i kanarumpata kapari, mewalike mantaha.

⁴Hai hangangaa mantaha liliuke duuna i kahopoana bona maroho ntepuu pepoinalainta hai barapi ara kamasalanta ba kamakuranta.

⁵Ane arakau au bara moisa rara mokadipura tuwomi, agina niperapi kanoto lalu hangko i Pue Ala, hai batena Naweikau. Lawi apa au Nakira, Nakiraiahe ope-ope tauna hangko i kabulana laluNa, barahe Nawei ngkahunda-hunda.

⁶Agaiana ane merapike i Pue Ala, hangangaa mepoinalai mpuuke. Bara peisa bata-bata lalunta. Lawi hadua tauna au bata-bata laluna, peisa rapandiri nodo balumba au nawui himburu node hou node mai.

⁷Lawi tauna au nodo, morompenga lalunda, bara tetida pampekirinda. Ido hai barahe peisa moharunga apa pea hangko i Pue.

⁹To Sarani au meahi-ahi tuwonda, hangangaa matanahe, lawi nauri nodo, batena napaiwongkohe Pue Ala anti pepoinalainda.

¹⁰Nodo worihe to Sarani au pebuku, hangangaa matanahe, ane tempona tuwonda napaiwoi Pue Ala. Lawi tauna au pebuku hampalai pea katuwonda nodo bunga.

¹¹Lawi ane nasimbaki alo au makere, liliu malau, alana maoru bungana hai matantami peraena. Nodo wori tauna au pebuku: ina matehe tanganda mourusi peawanda.

¹²Morasihe tauna au mantaha i lalu kapari hai pampetandaka. Lawi ane pepoinalainda mantaha i pampetandaka iti, ina molambihe katuwo au bara mokahopoa[1] au nadandimi Pue Ala i tauna au maahi Iria.

¹³Ane arake au rakelo bona mobabehi dake, inee tapehangu pekelo iti hangko i Pue Ala. Lawi Pue Ala bara peisa rakelo bona mobabehi dake, hai Ia bara wori mokelo tauna.

¹⁴Agaiana ope-ope tauna tekelo i temponda nadii peundeana lalunda au kadake.

¹⁵Ane mampeulaike peundeana lalunta, batena mobabehike dake. Hai ane iti au tababehi liliu, kahopoana ina naantike i kapate.

¹⁶Halalungku au kupokaahi! Ineekau rapakanawo!

¹⁷Ope-ope au maroa hai au bara ara kamakurana tahumba hangko i Pue Ala. Iami au mampopewali ope-ope au mewangka i langi. Ope-ope au mewangka iti, ara katebaliana. Agaiana Pue Ala, bara ara katebaliaNa, hai Iria bara wori ara kamakaindi.

¹⁸Napopewalimoke anaNa moula peundeaNa haduduaNa melempo i Ngkora Marasa, au bara ara kamasalana, bona hangko i ope-ope au Napopewali, ikitami au Napokatana ntepuu.

¹⁹Halalungku au kupokaahi! Nipailalu maroa lolita ide: ikita ope-ope hangangaa manaki talinganta mampehadingi lolitana tauna, hai ineeke sosa mololita hai ineeke hoholiga rumpu.

²⁰Lawi tauna au rumpu, barahe peisa mobabehi apa au hintoto moula peundeana Pue Ala.

²¹Ido hai hangangaa nikabaha ope-ope babehia au kedai hai babehia au kadake au rapobiasa tauna i dunia ide. Hangangaa modoko maroakau Ngkora au nahawuka Pue Ala i lalumi, lawi Ngkora iti au makuasa mohoremakau hangko i huku dosami.

²²Mewali, ane mohadikau Ngkorana Pue, hangangaa nipeulai. Inee nipehadingi mbero pea. Lawi ane nodo, mopakanawomokau watami haduduami.

²³Tauna au mampehadingi Ngkorana Pue hai bara napeulai, peisa rapandiri nodo hadua tauna au mampewao.

²⁴Karoona mampeita lenggena, padu hai barapi nakatuinao ba noumba lenggena.

²⁵Ido hai hangangaa nipailalu maroa Ngkorana Pue Ala hai nipeulai liliu. Lawi Ngkorana Pue bara ara kamakurana, hai ara kuasana mokabahake hangko i dosa. Mewali, inee nipehadingi pea Ngkora iti hai naliu inaomi. Hangangaa nipeulai Ngkora iti, lawi ope-ope tauna au mobabehi nodo, batena nawatihe Pue Ala i apa pea au rapobago.

²⁶Ane ara hadua tauna au manguli ia mosarani mpuu agaiana bara naisa mokampai pohumena bona maroa polololitana, mopakanawomi watana haduduana. Posaranina iti bara mobundu.

²⁷Ane mampeinaoke mewali tauna au maroa posaraninta hai au bara ara kamakuranta ba kamasalanta i peitana Pue Ala Umanta, idemi au hangangaa tababehi: motulungike anangkoi au ilu hai tobemba au meahi-ahi tuwonda, hai ineeke moula babehianda tauna au barahe moisa Pue Ala.