Read Napu Yakobu 2 Bible Online

Yakobu 2 - Napu bible

Yakobu 2

¹Halalu-halalungku! Amputa, Pue Yesu Kerisitu, meawa mpuu tuwoNa. Mewali, ane tou-toukau mepoinalai i Pue Yesu, ineekau mampopontani tauna.

²Rapana ara rodua tauna au hawe i pogulu-guluanta, hadua mesisikale bulawa hai mehampi makara, hai hadua meahi-ahi tuwona hai mehampi magenta-genta.

³Ane melumbu pebilami i tauna au makara hampina, pane niuliangaa, “Maike mohuda i pohudaa au maroa inde,” agaiana i tauna au meahi-ahi tuwona niuli: “Meangkamoko inditi,” ba niuliangaa: “Mohudamoko i lanta,”

⁴lempona, mampopontanimokau hangka rangami, hai mampelenggekau tauna moula tunggaiami au kadake.

⁵Halalungku au kupokaahi! Nipehadingi maroa: tauna au meahi-ahi tuwonda i dunia ide napileihe Pue Ala bona mewalihe pebuku i pepoinalainda. Ina molambi sosoranda i lalu poparentaNa moula dandina Pue Ala i tauna au maahi Iria.

⁶Agaiana ikamu mokakabosairikau tauna au meahi-ahi iti hai moadaikau topebuku. Bara pae tauna au pebuku itimohe au moewakau hai moantikau i lindona topoparenta?

⁷Bara pae ihirami au mopapakoi hangana Pue Yesu au tebila hai au mewali Amputa?

⁸Maroa babehiami ane mampeulaikau hawana Datunta au i lalu Sura Malelaha au manguli, “Nipokaahi hangka rangami nodo pampokaahimi watami haduduami.”

⁹Agaiana ane mampopontanikau tauna moula tuwonda ba lenggenda, madosamokau. Tongawami kamadosami, lawi moliungimokau Aturana Pue Ala.

¹⁰Hema au moliungi hampaka pea hangko i ope-ope Aturana Pue Ala, himbela pea hai moliungimi ope-ope Atura iti.

¹¹Lawi nauli Pue Ala, “Inee mebualosi.” Hai Nauli wori, “Inee mepapate.” Mewali, kehapirikau bara mebualosi, agaiana mepapatekau, batena moliungi manikau Aturana Pue Ala.

¹²Ido hai hangangaa nipamaroa-roa pohohowarami lolita hai babehiami. Lawi kara-karanta ina rabotusi moula Aturana Pue Ala au mokabahake hangko i huku dosanta.

¹³Lawi hema au bara ara kamaahina i rangana ina rahuku, hai i karahukuna iti, bara ina ara kamaahina Pue Ala iria. Agaiana tauna au ara kamaahina i rangana, Pue Ala ina motudungia kamaahiNa iria i alo pebotusi.

¹⁴Halalu-halalu! Apami bunduna ane tauli mepoinalaike i Pue, agaiana babehianta bara moula peundeaNa. Ane nodo pepoinalainta, barake ina tehorema.

¹⁵Pandirina, ara hadua halalunta au moparaluu pehampi, hai bara wori handa paandena alo-alona,

¹⁶hai niuliangaa node, “Maroa-roako i rara! Kuharunga molambiko badu au maroa hai maandeko hawe mabuhu!” Agaiana ane bara niwei apa au naparaluu, apami bunduna?

¹⁷Nodo wori hai pepoinalainta. Ane tauli mepoinalaike i Pue, agaiana babehianta bara moula peundeaNa, pepoinalainta iti mate, lempona pepoinalainta mbero-mbero pea.

¹⁸Manoto ara au ina manguli node, “Hadua tauna meharunga i pepoinalaina, hai tohaduana meharunga i babehiana au maroa.” Agaiana kuuli: ane bara maroa babehiamu, bara ina raita pepoinalaimu iti. Hangko i babehiangku au maroa, ina kupopaitaa woriko pepoinalaingku i Pue.

¹⁹Ba nipoinalai hadua pea Pue Ala? Tou mpuu diti. Agaiana ane noiti pea, bara handa! Lawi mogalorihe seta, mampoinalai worihe kahaduana pea Pue Ala. Ido hai moradahe anti kalanganda.

²⁰Ntuli mpuukau? Ba niuli handami pepoinalaimi i Pue Ala nauri bara ara babehiami au maroa? Ane nodo pepoinalaimi, bara ara pobunduana!

²¹Hangangaa nikatuinao tuntukana Burahima: ia naimba Pue Ala tauna manoto anti kamaroana babehiana, lawi ia masilolongami ina mampopenomba Isaki anana, i Pue Ala i wongko watu pohuwea popenomba.

²²Hangko i tuntukana iti, pepoinalaina Burahima tongawa i babehiana. Mewali, anti babehiana au maroa, bara ara kamakurana pepoinalaina.

²³Ido hai tepabukeimi apa au teuki i lalu Sura Malelaha au manguli: “Burahima mepoinalai i Pue Ala, ido hai naimba Pue Ala tauna au manoto.” Mewali, Burahima rauli himadana Pue Ala.

²⁴Mewali taisami, tauna au maroa babehianda naimbahe Pue Ala manoto i peitaNa, agaiana tauna au mepoinalai pea hai bara maroa babehiana bara Naimba manoto i peitaNa.

²⁵Nodo wori tuntukana Rahab hangkoia, hadua towawine au bara maroa adana. I temponda bahangkia surodado to Yahudi ratudu lao mependenga, napopehupehe Rahab i souna hai natulungihe padu moliu i rara ntanina. Anti babehiana iti, ido hai naimbami Pue Ala tauna au manoto.

²⁶Mewali, ane ara hadua tauna au barapi moinao, lempona matemi. Nodo wori, pepoinalainta i Pue, ane bara tongawa i babehianta, lempona matemi pepoinalainta, barapi ara pobunduana.