Read Napu Yakobu 3 Bible Online

Yakobu 3 - Napu bible

Yakobu 3

¹Halalu-halalungku! Ineekau bosa au mampeinao mewali guru agama. Lawi taisami halalu, tauna au mewali guru agama hangangaa mampeulai peundeana Pue Ala, hai ane masalake ina melumbu pehukuNa irikita pane pehukuNa i tauna ntani.

²Ikita ope-ope, madahake mobabehi sala. Agaiana ane rapana arahe tauna au bara mobabehi sala i polololitanda, ihira au malelaha tuwonda hai au peisa mokuasai ope-ope peundeana lalunda.

³I dunia ide, au kokoi peisa mokuasai au mahile. Pandirina peisake mohamai dara bona mampeulai peundeata. Mewali, nauri mopake peake hama au kokoi, peisake mokuasai dara au mahile.

⁴Nodo wori hambua kapala tahi au mahile au nawui himburu kebuu. Kapala mahile iti peisa napopolumao topoanti, iumba pea peundeana, nauri mopake pea peguli[2] au kokoi.

⁵Nodo wori dila manusia. Nauri kokoi pea, agaiana peisa tapake mantindora kana i paka-pakana au mahile. Peita, api au kokoi peisa moande pandulu au maemba.

⁶Nodo wori lolita au tapahawe hai dilanta. Dilanta iti nodo api, lawi peisa tapake mobabehi dake. I watanta ide, dilanta mopaara hinangkana dosa au mopakedai humalele watanta hai dilanta peisa rapandiri nodo api hangko i naraka au mopakarugi ope-ope katuwonta.

⁷Ope-ope binata au maila, nodo tadasi, binata au mendele hai ikane i lalu owai, peisahe rapakanondo, hai arami au rapakanondo manusia.

⁸Agaiana bara ara hadua tauna au peisa mopakanondo dila manusia! Dila manusia kadake mpuu, hai bara peisa rakuasai. Lolita au tapahawe hai dilanta nodo ipo au mepapate.

⁹Dilanta peisa tapake motoia Pue Ala Umanta. Agaiana peisa wori tapake mopapakoi ranganta au napopewali Pue Ala moula lenggeNa haduduaNa.

¹⁰Hangko i humena hadua tauna, mesuwu lolita petoia hai lolita petunda-tunda. Halalu-halalungku! Katouana, barake peisa nodo!

¹¹Ane rapana ara owai tumbu, peisa pae mesupa sambela owai au matawaa hai owai au mapai?

¹²Kau ara bara mowua saitun. Hai anggoro bara mowua wua ara. Mata owai au kebure bara mopaara owai au matawaa. Halalu nodo wori dilanta, bara hintoto ane tapake mohowara apa au maroa hai mohowara mbuli apa au kadake.

¹³Ane ara tauna i olomi au maroa pekirinda hai au manoto lalunda, iti hangangaa rapatongawa i babehianda au maroa au mesuwu hangko i lalunda au mengkaiwoi moula apa au hintoto i tauna au manoto lalunda.

¹⁴Agaiana ane ara lalumi mahina i rangami hai nipeinao mopaioru watami haduduami, ineekau mampemahile hai inee nipehangu ikamumi tauna au manoto lalumi. Lawi babehia iti mosisala hai paturo au tou.

¹⁵Kanoto lalu au nodo, bara hangko i Pue Ala, agaiana hangko i dunia, hangko i peundeana lalunta hai hangko i seta!

¹⁶Lawi ane arahe tauna au mahina hai au mohaoki peahe peundeana lalunda, batena ina ara pobungka-bungka hai mampopengaa babehia au kadake.

¹⁷Agaiana tauna au molambihe kanoto lalu hangko i Pue Ala, node babehianda: malelaha lalunda, raunde mohintuwu hai ranganda, maalusu poantinda, matunduhe hai motulungi peamohe tauna. Maroa babehianda, barahe mampopontani tauna hai poantinda moula kabulana lalunda.

¹⁸Tauna au mohaoki pohintuwu, babehianda moula mpuu peundeana Pue Ala.