Read Napu Yakobu 5 Bible Online

Yakobu 5 - Napu bible

Yakobu 5

¹Idemi paturongku i tauna au pebuku. Aginami moteriakau, lawi ina narumpakau kapari.

²Matalami peawami. Hampimi natatami alimpepi.

³Bulawami hai salakami, tagarami. Tagara iti mopakanoto kamasalami i lalu pampopobundumi kapebukumi. Ido hai ina rahukukau nodo tauna au naande api. Morampukau anu-anu i dunia, agaiana barapi mahae ina hawemi kahopoa dunia ide!

⁴Ikamu barakau mobaiari saronda tauna au mobagohe i bondemi. Ide-ide nipehadingi peraroanda! Tauna au meparehe i bondemi, meraroahe merapi tulungi hai peraroanda napehadingimi Pue Ala au makuasa.

⁵Mampopeawamokau tuwomi hai matana-tana pearaikau i dunia ide; nodokau binata au mopakarudu watanda sadudua duuna hawe temponda rasambale!

⁶Mohuku hai mopapatemokau tauna au barahe masala, hai barahe meewa.

⁷Halalu-halalu! Hangangaa sabarakau mampegia kahaweNa hule Pue. Nipeita noumba kasabaranda topobonde mampegia powuana tuda-tudanda. Sabarahe mampegia uda i temponda mantuda hawe i powuana.

⁸Nodo wori ikamu, hangangaa sabarakau. Hangangaa nipatetida lalumi, lawi barapi mahae ina hawe mpuu Amputa.

⁹Halalu, ineekau mohume-hume hai mombesasalai datikau narumpa pehuku. Lawi ara hadua topebotusi au hungkumi, hai barapi mahae ina hawemi!

¹⁰Halalungku ope-ope! Nikatuinaohe nabi hangkoia au mobambari Ngkorana Pue. Sabarahe hai mantahahe mantodiha kapari. Maroa ane tapeulai kasabaranda.

¹¹Tauna au mantaha i lalu kapari, ihirami au rauli morasi. Niisami tuntukana Ayubi au mantaha i lalu kapari. Hai kahopoana, ia nawati Pue Ala. Lawi Pue Ala maroa laluna hai maahi ntepuu.

¹²Halalu-halalu! Hangko i ope-ope paturongku, idemi au paraluu ntepuu: ineekau mosumpa mokabelai langi ba tampo ba apa pea au ntanina. Ane tunggaiami manguli io, niuli “Io.” Ane tunggaiami manguli bara, niuli “Bara,” datikau narumpa pehuku.

¹³Ane ara i olomi au molambi kapari, agina mekakae. Ane ara au matana, hangangaa monani motoia Pue Ala.

¹⁴Ane ara au mahai, maroa ane mokakiokau penatua, bona penatua iti peisahe mampekakaea hai morirohi tomahai iti hai lana i lalu hangana Pue.

¹⁵Ane pekakae iti tou-tou mpuu hangko i pepoinalai, tomahai iti batena maoha. Hakina ina napakaoha Pue Ala, hai dosana teampungi worimi.

¹⁶Ido hai hangangaa mangaku salakau i hangka rangami, hai mombepekakaeakau bona maohakau. Tauna au manoto babehianda pemoso mpuu pekakaenda.

¹⁷Nikatuinao tuntukana nabi Elia hangkoia. Nabi Elia iti, tauna biasa himbela hai ikita. Ia mekakae hangko i laluna mpuu dati keuda. Hai bara mpuu keuda i lalu talu parena hai ini wulana.

¹⁸Roo indo, ia mekakae hule bona langi mopaara uda, hai mowuami tuda-tuda.

¹⁹Halalu-halalu! Ane ara i olomi hadua au morara ntani hangko i paturo au tou, hai ara wori hadua au monini mesule i Pue,

²⁰nikatuinao lolita ide: hema au moanti hadua tauna au madosa menoso hangko i babehiana au masala, ia mohorema rangana iti hangko i kapate, hai dosana rangana au ngkaia iti, teampungi. Hangko iriko YAKOBU