Read Napu 1 Peturu 3 Bible Online

1 Peturu 3 - Napu bible

1 Peturu 3

¹Nodo wori ikamu towawine, hangangaa mengkorukau i tobalilomi bona ane arahe tobalilomi au bara mepoinalai i Ngkorana Pue Ala, babehiami iti ina mobaliki lalunda duunda mepoinalai. Barahe paraluu niuliangaa ba apa-apa,

²lawi ane moitahe babehiami au malelaha hai pengkorumi, itimi au moantihe mepoinalai i Pue.

³Ane nipeinao mewali towawine au makara, inee kamakara au i raoa pea, nodo mobubungai weluami ba mopamakara watami hai parewa ba hampi au masuli holona.

⁴Pongkana kamakarami mesupa hangko i lalumi. Hangangaa maalusu babehiami hai lolitami. Itimi kamakara au bara ara katebaliana, hai au napokatana Pue Ala.

⁵Lawi nodo wori poantinda towawine hangkoia au malelaha hai au meharungahe i Pue Ala. Towawine iti mewalihe makara lawi mengkoruhe i tobalilonda.

⁶Pandirina, Sara moula hawana Burahima tobalilona; Burahima iti nauli ampuna. Hai ikamu halalu, peisakau rauli anana Sara ane maroa babehiami hai barakau langa i apa pea.

⁷Nodo wori ikamu tobalilo, hangangaa mohintuwukau hai towawinemi, hai hangangaa nipekiri noumba rarami motulungihe, lawi rohonda bara nodo rohomi. Agaiana nauri nodo, towawinemi batena himbela hai ikamu i peitana Pue Ala, lawi hangko i kabulaNa laluNa Pue Ala mowei worihe katuwo au bara mokahopoa himbela hai ikamu. Idomi hai hintoto mpuuhe nibila. Lawi ane barahe nibila, pekakaemi bara ina napehadingi Pue Ala.

⁸Kahopoana, ikamu hangangaa mohintuwukau, hampepekirikau, hai mombepokaahikau nodo topohalalu. Hangangaa maahikau hai mengkaiwoikau.

⁹Ane ara tauna au mobabehi dake irikamu, inee nihurungi. Ane rakakabosaikau, inee worihe nikakabosai. Agina babehianda au kadake iti nihurungi hai pekakae au mamperapiahe pewati hangko i Pue Ala. Lawi Pue Ala mokakiokau mewali taunaNa bona molambikau pewati hangko Iria.

¹⁰I lalu Sura Malelaha teuki node, “Hema au mohaoki katana hai roa ngkatuwo, ia hangangaa mokampai pololitana, bona dati mekakabosai ba mepodongkoa.

¹¹Ia hangangaa mokabaha babehiana au kadake hai mobabehi apa au maroa. Hangangaa napari-pari mohintuwu hai hangka rangana,

¹²lawi Pue Ala mokampaihe ope-ope tauna au moula peundeaNa, hai Ia mampehadingi pekakaenda. Agaiana Pue Ala moewa ope-ope tauna au kadake babehianda.”

¹³Hema pae au ina mobabehi dake irikamu ane nibabehi liliu babehia au maroa?

¹⁴Agaiana ane rapana molambikau kapari hangko i babehiami au manoto, morasikau! Mewali, ane arahe tauna au mampopalangakau, ineehe nipokalanga hai inee karao inaomi.

¹⁵Agina nipaisare katuwomi i Kerisitu, hai nipangaku kaIana pea Ampumi. Nipasilolonga amimi pehanami i tauna au mekune irikamu kana i peharungami i Pue Ala. Agaiana ane nihanaihe, hangangaa nipamaalusu lolitami hai meadaikau.

¹⁶Hai hangangaa bula lalumi bona ane arahe tauna au mosasalai babehiami au maroa i peitana Kerisitu, ina maeahe.

¹⁷Agintami molambi kapari anti babehianta au maroa, ane iti peundeanami Pue Ala, paneke molambi kapari anti babehianta au kadake.

¹⁸Lawi ara wori hadua au molambi kapari, iami Kerisitu. Ia hambela pea mokira wataNa rapapate bona mohalea dosa manusia. Ia au bara ara salaNa mopahuruke au masala bona moantike i Pue Ala. Ia rapapate, agaiana rapatuwo hule anti kuasana Inao Malelaha.

¹⁹Hai anti kuasana Inao Malelaha, Ia laomi mopahawe bambari hangko i Pue Ala i tanoananda tomate[1] au ratarunggu i paidaanda tomate.

²⁰Ihira iti ratarunggu anti pesapuakanda i Pue Ala hangkoia i tempona mani Noho tuwo. Tongawami kasabarana Pue Ala, lawi Ia mampegia katebalikina lalunda tangana Noho mobabehi duanga mahile. Agaiana kahopoana, Pue Ala molaboa dunia hai owai. Ualu peahe tauna au mesua i lalu duanga mahile hai au Nahorema hangko i kapate.

²¹KaNahoremanda hangko i owai au molaboa dunia peisa rapopandiri ada mperiu to Sarani ide-ide, lawi ada iti moanti katuwo maroa irikamu. Ane tababehi ada mperiu iti, bara peake mobahoi watanta. Agaiana ara tunggaiata au melumbu hangko inditi. Ada mperiu iti taimba hambua pamperapita i Pue Ala bona Nabahoike hangko i dosanta.[2] Hai anti katuwona hule Yesu Kerisitu, Naampungi mpuumoke hangko i dosanta.

²²Hai i karapatuwoNa hule, Yesu mengkaoremi lao i suruga, mohuda ntanda i koanana Pue Ala. Ope-ope malaeka hai au makuasa hai au moparenta, rapopengkoru hahahe Iria.