Read Napu 1 Peturu 4 Bible Online

1 Peturu 4 - Napu bible

1 Peturu 4

¹Mewali, Kerisitu molambimi kapari tangana mani tuwo i dunia ide. Ido hai ikamu wori hangangaa nipakaroho lalumi bona masilolongakau mohalea kapari nodo Ia. Lawi hema au mohaleami kapari au nodo, barapi ina mobabehi dosa.

²Mewali, i tempomi mani tuwo i dunia ide, inee nipeulai peundeana lalumi au kadake. Hangangaa moulakau peundeana Pue Ala.

³Lawi mahae gagamokau mobabehi babehianda tauna au barahe moisa Pue. I tempo iti, merikai babehiami, moulakau peundeana lalumi au kadake, malangu-langukau, mosusa liliukau, masurokoakau, hai menombakau i anitu au bara hintoto rapenombai.

⁴Agaiana ide-ide, rapowulimi rangami au hangkoia lawi barapohe niporanga mobabehi hinangka babehia au kadake. Ido hai rakakabosaimokau.

⁵Agaiana hambela tempo tauna iti hangangaa mohanai Pue Ala kana i babehianda au kadake. Lawi Pue Ala ina mobotusi kara-karanda ope-ope tauna, maroa au tuwo mani ba au matemohe.

⁶Ido hai Ngkora Marasa rabambaria worihe tauna au mate, bona kehapihe mate nodo ope-ope manusia anti kamadosanda, batenda molambi worihe katuwo maroa moula peundeana Pue Ala.

⁷Halalu, kahopoa dunia ide hungkumi hai ope-ope ihina ina matanta. Ido hai hangangaa mainga-ingakau hai nipamanoto pekirimi bona peisakau mekakae.

⁸Au melumbu hangko i hinangkana, iami pombepokaahimi hadua hai hadua. Hangangaa mombepokaahikau hangko i lalumi mpuu, lawi ane nibabehi nodo, ina nibuku wori moampungi salanda rangami.

⁹Hangangaa matanakau ane ara toraremi, hai ineekau mohume-hume.

¹⁰Ikita ope-ope molambimoke kapande au montani-ntani moula apa au naweike Pue Ala. Mewali hangangaa tapake kapande iti bona motulungike ranganta hai tapopolumao maroa bago au naweimoke Pue Ala hangko i kabulana laluNa.

¹¹Hema au motuntu, hangangaa mopahawe apa au nadokomi hangko i Pue Ala. Hema au motulungi rangana, hangangaa metulungi hangko i karoho au nalambi hangko i Pue Ala. Hangangaa nibabehi nodo bona i hinangkana au mewali, Pue Ala rapomahile i lalu hangana Yesu Kerisitu, lawi Pue Ala au makuasa hai hintoto rapomahile hawe i hae-haena! Amin.

¹²Halalu au kupokaahi! Inee nipotingkara kapari au morumpakau. Kapari iti peisa rapandiri nodo api, lawi napake Pue Ala mampetandaka kamarohona pepoinalaimi. Agaiana inee nipehangu kapari au morumpakau iti melumbu hangko i apa au biasana.

¹³Aginari nipokatana, lawi molambimokau kirami i lalu kapari au morumpa Kerisitu. Ido hai halalu, ane hawe tempona Kerisitu mopatongawa peawana tuwoNa i ope-ope tauna, ina matana mpuukau.

¹⁴Morasikau, halalu, ane rakakabosaikau anti peulami i Kerisitu, lawi Inao Malelaha au meawa au hangko i Pue Ala maida liliu i lalumi.

¹⁵Agaiana inee mpuu ara hadua i olomi au molambi kapari lawi mepapate ba manangka ba mobabehi au kadake ba mampesuaki peami urusana rangana.

¹⁶Agaiana ane rapopeahi-ahikau anti katoSaranimi, inee nipokaea. Niuli ngkaia kamaroana i Pue Ala lawi ikamu au rauli topeulana Kerisitu.

¹⁷Hawemi tempona Pue Ala ina mobotusi kara-karanda ope-ope tauna. Hai ikita au Napoana, batena ioru Nabotusi kara-karanta. Mewali ane kara-karanta au ioru Nabotusi, manoto ina melumbu pehukuNa i tauna au barahe mepoinalai i Ngkora Marasa au hangko Iria.

¹⁸I lalu Sura Malelaha teuki node: “Mogalori tauna au manoto babehianda, hangangaa motodihahe kapari, hangko molambirihe katuwo maroa. Apa mani tauna au kadake hai au bara mengkoru i Pue Ala!”

¹⁹Ido hai, halalu, ane arakau au molambi kapari moula peundeana Pue Ala, nipaisare katuwomi i Pue Ala au mampopewali hinangkana, hai hangangaa nibabehi liliu babehia au maroa. Hai Pue Ala ina mopabukei ope-ope dandiNa irikamu.