Read Napu 2 Peturu 2 Bible Online

2 Peturu 2 - Napu bible

2 Peturu 2

¹Hangkoia arahe nabi au mepakanawo i olonda tauna au meula i Pue Ala. Nodo wori ide-ide, batena ara worihe i olomi guru agama au mepakanawo. Ihira ina mopahawehe paturo au bara tou au mopakanawo tauna, hai pelumbunami mosapuakahe Amputa au mohompo dosanda. Anti pesapuakanda iti, mopakanawomohe watanda haduduanda. Tauna iti holi-holi kaina maropunda.

²Agaiana kehapiri nodo, bosa tauna ina moula babehianda au merikai, alanda tauna ntanina ina mopapakoi paturona Yesu au tou.

³Guru au mepakanawo iti mohaoki peahe doi, mewali ina rapahaweakau lolita au rababehi haduduanda bona molambihe rasi hangko irikamu. Agaiana ara pehuku au mahaemi napasilolongaahe Pue Ala, hai karahukunda iti ina holiga mewali.

⁴Mogalorihe malaeka au madosa hangkoia, barahe nakabaha Pue Ala hangko i pehuku. Malaeka iti batenda Natende i lalu naraka hai Nataha i lalu kalolu tampo au makaindi duuna hawe alo pebotusi.

⁵Nodo wori manusia au kadake hangkoia, barahe nakabaha Pue Ala hangko i karahukunda. Dunia au hangkoia Nagero hai owai, alana matehe ope-ope tauna au mesapuaka. Batena pea nabi Noho hai pitu tinana au Natulungi datihe mate, lawi Noho mopahawe lolitana Pue Ala i ope-ope tauna bona mopakanotoahe rara moula peundeaNa.

⁶Nodo wori hangkoia Pue Ala mohuku to Sodomo hai to Gomora hangkoia lawi madosahe. Boeanda Nagero hai api bona kaNahukuna wanua iti mewali pepopainga i tauna au barahe mengkoru Iria.

⁷Agaiana ara hadua tauna au rahanga Looti au natulungi Pue Ala. Looti iti Napopesuwu hampai hangko i wanua Sodomo, lawi ia tauna au manoto laluna. I tempona Looti maida i wanua iti, masusa mpuu laluna moita babehianda tauna inditi, au barahe moisa atura hai au merikai.

⁸I tempo iti, karao mpuu inaona Looti, lawi ia tauna manoto, agaiana alo-alona naita hai nahadi babehianda au merikai.

⁹Mewali, hangko i ope-ope pandiri au kupahawe inona, tongawami kuasana Pue Ala motulungi tauna au menomba Iria datihe napakanawo pekelo. Hai tongawa wori kuasaNa mohuku ope-ope tauna duuna hawe alo pebotusi.

¹⁰Mantimi mpuu pehukuNa Pue Ala i tauna au raoaka moula peundeana lalunda au kadake hai au mopapakoi kuasaNa. Ane guru agama au mepakanawo iti, baihe mampemahile, hai barahe langa mopapakoi apa au meawa i suruga.

¹¹Mogalorihe malaeka, au melumbu kamakuasanda hangko i guru iti, barahe bai mopapakoi ba mosalai apa au meawa iti i lindona Pue Ala.

¹²Agaiana guru au mepakanawo iti, bara manoto pekirinda. Mosasalaihe apa au bara raisa. Babehianda nodo binata au bara ara pekirinda. Ihira nodo binata maila au rapoanaka bona rapakala hai rapapatehe. Ihira ina nahukuhe Pue Ala anti babehianda au kadake.

¹³Ina narumpahe pehuku hintoto hai babehianda. Babehianda tauna iti mepakaea mpuu. Mogalori mabaa, raunde mobabehi dake moula peundeana lalunda haduduanda. Ane maandehe hihimbela hai ikamu i posusami, mehiorohe moula peundeana lalunda. Ido hai rakakabosai worikau tauna ntanina.

¹⁴Ane mototokihe towawine, liliu rapokaelu, lawi raunde peami mobabehi au merikai. Barahe baha mobabehi dosa. Ane ara tauna au malede pepoinalainda, raopahe hai rapakanawo. Tauna au mepakanawo iti, mampokaelu liliuhe anu-anuna ranganda. Hararahe.

¹⁵Mehupemohe hangko i rara au tou, ido hai kadake babehianda. Moulahe rara au naporarai Bileam[1] anana Beor hangkoia, lawi Bileam mohaoki pea doi au nahumba hangko i babehiana au kadake.

¹⁶Bileam iti iami nabina Pue Ala, hai Pue Ala mowei kuasa i kalidena bona nabuku mololita nodo manusia. Anti babehiana Bileam au sala, ia nakambaroa kalidena alana barapi mewali tunggaiana au bara mesua akala.

¹⁷Guru au mepakanawo iti, napasilolongaamohe Pue Ala paidaa au meruu kamakaindina. Ihira peisa rapandiri nodo tibubu au bangi, hai nodo gawu au nawui himburu kebuu agaiana bara mopaara uda.

¹⁸Polololitanda mampemahile, hai bara mobundu. Modiihe lalunda tauna hai peundeanda au merikai alana tauna iti rapakanawohe, moleri tauna iti bara manihe mahae mopalehi babehianda au kadake.

¹⁹Rauli guru iti, “Ane nipeulai paturongki, ina tekabahakau hangko i atura-atura, hai peisa mobabehi apa pea peundeami.” Mole ihirari au tuwo nodo hawi, lawi nakuasaihe peundeana lalunda au kadake, hai hema au nakuasai peundeana laluna au kadake, lempona napohawi peundeana laluna iti.

²⁰Meahi-ahi mpuuhe tauna iti. Nguru-nguruna moisamohe Amputa Yesu Kerisitu, ido hai tekabahahe hangko i babehia au kadake i dunia ide, agaiana roo indo mesule hulehe i babehianda au kadake duuna moulahe babehia iti. Kahopoana rumihi mpuu kamaruginda hangko i nguru-nguruna.

²¹Aginami barahe moisa rara au tou, pane moisahe rara au tou agaiana moaehe hawana Pue Ala au rapahaweamohe.

²²Ara ngkora pandiri au manguli node: “Dike moande hule bolana, hai boe au radoi mentumba hule i reta.” Lolita ide mokanai tauna iti inona, lawi tauna iti mesule hulehe i babehianda au kadake au rapalehimi hangkoia.