Read Napu 2 Peturu 3 Bible Online

2 Peturu 3 - Napu bible

2 Peturu 3

¹Halalungku au kupokaahi! Idemi surangku au karombelana irikamu. I lalu surangku au nguru-nguruna hai au karombelana ide, kuhuweki lalumi hai kupopaingaakau paturo au tou bona malelaha pekirimi.

²Tunggaiaku bona nikatuinao apa au rapahawemi nabi au malelaha hangkoia, hai bona nikatuinao wori hawana Amputa Pue Yesu au mohoremamoke hangko i huku dosanta. HawaNa iti nihadi hangko irikami suroNa.

³Ara au hangangaa nikatuinao ntepuu: i alo-alo au ina mai i kahopoa tempo ide, ina hawehe tauna au nakuasai peundeana lalunda au kadake. Tauna iti ina mokakabosaikau,

⁴rauli, “Yesu modandi ina hawe hule. Agaiana iumbami? Bara kipoinalai, lawi matemohe toiorunta hangkoia hai mepongka hangko i pewalina dunia duuna ide-ide, dunia ide bara ara katebaliana.”

⁵Tauna au mololita nodo, raoaka motuko pekirinda. Bara raunde mokatuinao noumba Pue Ala mampopewali langi hai tampo hangkoia hai NgkoraNa. Dunia ide Napopewali hangko i owai, hai lorena au ara i dunia ide mesupa hangko i owai.

⁶Hai owai napake wori Pue Ala mogero dunia ide.

⁷Langi hai tampo au ara hawe ide-ide nakadipura Pue Ala hai NgkoraNa duuna i alo pebotusi. I tempo iti, langi hai tampo ide ina Nagero Pue Ala hai api, hai ope-ope tauna au bara mengkoru Iria ina Nahuku.

⁸Arahe tauna au manguli, “Mahae gaga kahawena hule Pue Yesu.” Agaiana, ikamu halalungku au kupokaahi, hampaka ide inee mpuu naliu inaomi: i lalu peitana Pue, hasabu parena himbela pea hai hangalo, hai hangalo himbela pea hai hasabu parena. Katouana Pue bara mokaweweangi popabukeina dandiNa. Anti kasabaraNa irikamu, ido hai bara mani hawe ide-ide. Bara naunde Pue ane ara hadua tauna au rahuku. PeundeaNa bona ope-ope tauna menoso hangko i dosanda.

¹⁰Agaiana batena mpuu ina hawe Pue! Hai i kahaweNa iti, ina tingkara mpuuhe tauna, nodo i kahawena hadua topanangka. I alo iti, ina rahadi hambua pomoni au melangaki, hai i tempo iti peami, langi ina magero. Hinangkana au ara ina naande api. Dunia ide hihimbela hai ihina ina pumpu.

¹¹Mewali, halalu, ane nodo kamagerona hinangkana au ara, noumbamoke ikita ide? Hangangaa tapamalelaha babehianta hai mengkoruke i Pue Ala.

¹²Lawi ikita ide mampegiake alo pebotusina Pue Ala. Agina tapamaroa-roa peulanta i Pue Ala bona holiga hawe Alo iti. I alo iti, langi ina naande api, hai hinangkana au ara ina magonu anti kamapanana.

¹³Agaiana ikita mampegiake apa au nadandimi Pue Ala, iami langi hai dunia au wou, au rapaidai tauna au manoto.

¹⁴Mewali halalu au kupokaahi, tangami mampepegia alo iti, nipari-pari meula i Pue bona maroa pohintuwumi hai Ia, hai bona bara ara kamasalami ba kamaeami ane hawekau i lindona Pue Ala.

¹⁵Hangangaa takatuinao apa tunggaiana kasabarana Pue. Ope-ope tauna naweihe Pue Ala katepaka bona tehoremahe. Paturo ide naukia worikau hadua halalunta au tapokaahi, iami Paulu. Hai apa au nauki Paulu i lalu surana moula kanoto lalu au nakiraia Pue.

¹⁶I lalu ope-ope surana, teuki paturo nodo au kupahaweakau inona, agaiana ara paturona Paulu au mapari ralempo. Paturo iti ragoli-goli pea tauna au bara manoto pekirinda hai au bara maroho pepoinalainda. Tauna iti mobabaliki worihe paturo ntanina hangko i Sura Malelaha. Hangko i babehianda iti molambihe pehuku hangko Pue Ala.

¹⁷Agaiana ikamu, halalu au kupokaahi, niisato ope-ope iti. Mewali, mainga-ingakau i guru agama au mepakanawohe, datikau raanti i lalu kamasalanda alana bata-bata lalumi kana i apa au nipoinalaimi.

¹⁸Hangko i kabulana laluna Amputa Yesu Kerisitu hai kanoto lalu au Naweikau, hangangaa nipakaroho peulami Iria au mohoremake hangko i huku dosanta. Tatoiami Amputa mepongka ide-ide hawe i hae-haena. Amin. Hangko iriko, PETURU